امان-ەسەن جەڭىلدەپ, بوسانۋدان كەيىنگى بولىمگە اۋىسقان كەزىم. ءبىر بولمەدە ءۇش ايەل جاتقانبىز. توردەگى توسەكتىڭ جانىندا بالا ارباسى جوق ەكەن. بالا ارباسى جوق ايەل دەزينفەكتسيا جاسايتىن مامانداي بۇركەنە كيىنىپ, ءبىر جاققا كەتتى.
ول شىعىپ كەتكەننەن كەيىن كورشى كەلىنشەكتەن بىلگەنىمدەي, رەانيماتسياداعى شالا تۋعان شاقالاعىنا كەتىپتى. سولاي ەكى كۇن قاتىنادى. ءبىز وعان تالاي تۋىسىمىزدىڭ 6,5-7 ايىندا تۋعان شالا شاقالاعى ادام بولىپ كەتكەنىن ايتىپ, ءۇمىت سىيلاۋعا تىرىساتىنبىز. «سوڭعى رەت ۋدز-گە تۇسكەندە بالاعا اۋا جەتىسپەي جاتىر دەپ شۇعىل وپەراتسيامەن بالامدى الدى. نەبارى 700 گرامم بوپ تۋعان شارانام ەندى رەانيماتسيادا جاتىر. الدىڭعى ەكى بالامدا ومىراۋ ءسۇتىم سۇيىق بولىپ ەدى. مىنا بالامدا قويۋ بولعانىن قارامايسىز با؟ سيستەماداعى ءسابيىمدى ەمىزە الماي وتىرعانىم مىناۋ», دەپ كۇرسىندى ومىراۋىن ساۋىپ وتىرىپ. ۇيدە ەكى بالاسى كۇتىپ جۇرگەنىن ايتىپ, كوڭىلىن اۋلاعان بولدىق. ءۇشىنشى كۇنى تەرەزەگە قاراپ تۇردى. ەسىك الدىندا مۋزىكالاتقان, انيماتسيالىق كيىمدەر كيىپ, قويىلىم قويىپ, بيلەپ جاتقان جۇرتتى كورىپ تۇر ەكەن. كوزىنەن جاستىڭ اققانىن ءومىر مەن ءولىم اراسىنداعى ءسابيى ەسىنە تۇسكەندىكتەن دەپ ويلادىم. ويلانىپ تۇرعاندا پالاتاعا ءبولىم مەڭگەرۋشى مەن تاعى ءبىر كىسى قوسا كىردى. مەڭگەرۋشى الگى ايەلگە: ء«سىز نەگە ەمىڭىزدەن باس تارتىپ جاتىرسىز؟ اناليزدەرىڭىز جاقسى ەمەس, سىزگە تولىققاندى ەم الۋ كەرەك. بۇدان كەيىن دە بالا كوتەرۋگە دەنساۋلىق كەرەك قوي», دەدى. سول ساتتە دىبىس شىعارماي جىلاپ العان كەلىنشەك: «ماعان ەندى ەشتەڭەنىڭ قاجەتى جوق. ەم الۋدىڭ دا ءمانى قالمادى. مەنى ۇيگە جىبەرىڭىز, قايتقىم كەلەدى. مۇندا ءسابيىم ءۇشىن عانا ءجۇردىم, ەندى ول دا ۇستاپ تۇرعان جوق, كەتكىم كەلەدى», دەپ جىلاپ جىبەردى. جانىمدا پىسىلداپ جاتقان ءسابيىم اياق-قولىن قاتتى داۋىستان ەربەڭدەتىپ كەتتى, بالاما قاراپ, اماندىعىنا شۇكىرلىك ەتىپ, جاناردان ىستىق جاس تومەن سىرعىدى. ە-ە-ە, بىرەۋ سىرتتا دۋمانداتىپ جاتقاندا, مۇندا بىرەۋ جىلاپ تۇرادى ەكەن عوي, سويتسەم... مەڭگەرۋشىمەن قوسا كىرگەن پسيحولوگ ەكەن, ول شاراناسىنان ايىرىلعان انامەن ءبىرشاما اڭگىمەلەسكەن بولدى, بىراق جان جاراسى جازىلماعان كۇيى, ەمىن سوڭىنا دەيىن الماستان, بوتاداي بوزداپ, شەتىنەگەن ءسابيىن الىپ پەرزەنتحانادان شىقتى.
جاقىندا شىمكەنت قالاسىنداعى №2 اۋرۋحانانىڭ باس دارىگەرىنىڭ ايتقانىن وقىعاندا, وسى جايت ويىما ورالدى. دارىگەر باقىتجان پازيلوۆ «پەرزەنتحانادا اۋىر بوسانعان ايەلدەر عانا ەمەس, شاقالاعى رەانيماتسيادا ءومىر مەن ءولىمنىڭ اراسىندا جاتقان نەمەسە تۋا سالا شەتىنەپ كەتكەن انالار بار. وزگەلەر ءسابيىن دۋمانداتىپ شىعارىپ اكەتىپ جاتقانداعى ولاردىڭ كوڭىل كۇيى قانداي بولارى بەلگىلى. سوندىقتان ارتىق شۋ-دۋماننىڭ ورنىنا پەرزەنتحانا اۋلاسىنا ءبىر كوشەت قوندىرىپ كەتسەڭىزدەر, ءبىز الگى تالعا شاقالاقتىڭ اتى-ءجونىن جازىپ قويار ەدىك», دەپتى.
ءيا, كەيىنگى كەزدە پەرزەنتحانادان انا مەن بالانى تويلاتىپ شاعارىپ الۋ سانگە اينالدى. «بايدىڭ اسىن بايعۇس قىزعانادى» دەمەڭىز, وزگەنىڭ كوڭىل كوتەرگەنىن كورە الماي تۇرعان تۇگىمىز جوق. بىراق بىرەۋ ءومىر مەن ءولىمنىڭ اراسىندا ارپالىسىپ جاتقاندا, ەكىنشى بىرەۋدىڭ دۋمانداتقانى ەرسى كورىنەدى. تويلاسىن, تالاسىمىز جوق, تەك پەرزەنتحانادان تىس جەردە. جوعارىداعى دارىگەردىڭ جاپ-جاقسى ۇسىنىسىن تويلاۋدى بارىنەن ارتىق كورەتىندەر قولدار-قولداماسى بەلگىسىز. دۋمانداتۋدان باس تارتا المايتىندارعا تىم بولماسا انا مەن ءسابيدى قۋانىپ, ۇيىندە قالاعانىنشا مۋزىكالاتىپ, ءتىپتى ات شاپتىرىپ كۇتىپ الۋعا بولاتىنىن ەسكە سالعىمىز كەلەدى.
ارينە, تۇسىنىگى بار ادام تۇيسىگى جەتىپ ۇعىنار, دۇرىس قابىلدار. ال قابىلدامايتىندارعا, ءسوز وتپەيتىندەرگە قاتاڭ تالاپ, قاۋقارلى زاڭ كەرەك. ويتكەنى سوزگە بىرەۋ قوناق بەرەدى, ءبىرى توقتامايدى. سوندىقتان ءبىزدىڭ ويىمىزشا, پەرزەنتحانانىڭ ماڭىندا, اۋلاسىندا دۋمانداتۋعا, مۋزىكالاتىپ, شۋلاۋعا زاڭمەن تىيىم سالىنۋعا ءتيىس. سەبەبى ۇلتتىق ستاتيستيكا بيۋروسىنىڭ دەرەگىنە سۇيەنسەك, كەيىنگى بەس جىلدا (2017-2021 جىلدارى)
16 مىڭ 671 بالا شەتىنەپ كەتكەن, ياعني جىلىنا 3 مىڭنان اسا ءسابي جاسقا جەتپەي بۇل فانيمەن قوشتاسقان. ۇلتتىق ستاتيستيكا بيۋروسى بىلتىرعى مالىمەتتى ءالى اشىق دەرەككوزگە شىعارماعان ەكەن. ال 2021 جىلى 4 مىڭعا تارتا (3 732) ءسابي 1 جاسقا دەيىن ومىردەن ءوتىپتى. بۇل ساناقتىڭ سىرتىندا نەبىر اۋىر دياگنوزبەن تۋعان بالالار, بالا ۇستىندە قايتىس بولعان ايەلدەر, ءتۇرلى تاعدىرلار بار. ءتۇرلى تاعدىردىڭ ارتىندا شىعارىپ الاتىن ادامى جوق نەمەسە شار مەن تورت تۇگىلى قاجەت ءدارىسىن الۋعا شاماسى جوق انالار, ەشكىم پەرزەنتحانادان شىققانىن كۇتپەيتىن, بىردەن بالالار ۇيىنە جونەلتىلەتىن تاستاندىلار تۇر... ال ولار مۋزىكالاتقانداردىڭ قۋانىشىنا كوڭىلدەنىپ, ورتاقتاسا الا ما؟ ءاي, قايدام...