قازاقستاندا 10,3 ملن گەكتار ەگىن جينالدى, بۇل جوسپارلانعان الاڭنىڭ 59,9%-ىن قۇرايدى. بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى, دەپ جازادى Egemen.kz.
مينيسترلىكتىڭ مالىمەتىنشە, 9,5 ملن اۋىل شارۋاشىلىعى داقىلدارى, ونىڭ ىشىندە 6,9 ملن توننا بيداي ورىلعان.
«بيىلعى ۆەگەتاتسيالىق كەزەڭدە فەرمەرلەر بىرقاتار قيىندىققا تاپ بولدى. وڭتۇستىك وڭىرلەردە قۇرعاقشىلىق بولدى, ال سولتۇستىگىندە جاڭبىر جاۋدى. بۇل ەگىننىڭ جاي-كۇيىنە جانە جينالعان داقىلدىڭ ساپاسىنا كەرى اسەر ەتتى. اۋا رايىنىڭ قولايسىزدىعىنا قاراماستان, استىقتىڭ كۇتىلەتىن ءونىمى قازاقستاندى نان, ۇن جانە ماكارون ونىمدەرىمەن تولىق قامتاماسىز ەتۋگە جەتكىلىكتى بولادى. ەلىمىزدە وتكەن جىلعى جوعارى ساپالى استىقتىڭ مول قورى بار. ونىمدىلىكتىڭ تومەندەۋىنە بايلانىستى ەكسپورتتىق الەۋەت تومەندەيدى, الايدا رەسپۋبليكا ءداستۇرلى ەكسپورتتىق نارىقتارداعى ءوز پوزيتسياسىن ساقتايدى», دەلىنگەن ۆەدومستۆو مالىمەتىندە.
1-ءشى سۇرىپتى ۇننان جاسالعان بيداي نانىنىڭ باعاسىن تۇراقتاندىرۋ ءۇشىن ازىق-ت ۇلىك كورپوراتسياسى ىشكى نارىقتى رەتتەۋ قىزمەتى ارقىلى ازىق-ت ۇلىك استىعىن ساتادى. بۇل مەحانيزم العاش رەت وتكەن جىلى قولدانىلعان بولاتىن. بيىل دا جالعاسادى. ناتيجەسىندە نان ءپىسىرۋ كاسىپورىندارى شيكىزاتپەن قامتاماسىز ەتىلىپ, نان وتاندىق نارىققا بەلگىلەنگەن باعامەن شىعادى.
قازىر ماڭىزدى مىندەت – فەرمەرلەرگە قاجەتتى قولداۋ كورسەتۋ. اتاپ ايتقاندا, استىقتى كەپتىرۋ ءۇشىن جەڭىلدەتىلگەن ديزەل وتىنىن ءبولۋ ماسەلەسى پىسىقتالدى. وبلىستاردىڭ استىق كەپتىرۋگە ارنالعان وتىنعا جالپى قاجەتتىلىگى 73 مىڭ توننا. ونىڭ 19 مىڭ تونناسىن قولدا بار رەزەرۆ ەسەبىنەن جابۋ جوسپارلانىپ وتىر.
بارلىق استىق قابىلداۋ كاسىپورىندارىنىڭ استىقتى قابىلداۋعا دايىندىعى قايتا تەكسەرىلدى. ولاردىڭ تاۋلىك بويى جۇمىس ىستەۋىن قامتاماسىز ەتۋ تاپسىرىلدى. اكىمدىكتەر استىق كەپتىرۋ قىزمەتىنىڭ باعالارىن كوتەرمەۋ ماسەلەسىن باقىلاۋعا الدى, تاريفتەردى نەگىزسىز كوتەرۋ فاكتىلەرى انىقتالسا ءتيىستى شارالار قابىلدانادى. رەسپۋبليكا بويىنشا استىقتى ساقتاۋدىڭ جالپى سىيىمدىلىعى 29,9 ملن توننانى قۇرايدى.
سونداي-اق فەرمەرلەر ءۇشىن ايىپپۇل سانكتسيالارىن قولدانباي نەسيەلەردى تولەۋ مەرزىمىن ۇزارتۋ ماسەلەلەرى جەكە پىسىقتالىپ جاتىر, بۇل بولاشاقتا ولاردىڭ نەسيە تاريحىنىڭ بۇزىلماۋىنا مۇمكىندىك بەرەدى.
ازىق-ت ۇلىك كورپوراتسياسى قولدا بار استىق قورىنىڭ تۇقىم رەتىندە پايدالانۋ جارامدىلىعىنا ساراپتاما جاساۋدى باستادى. پارامەترلەرگە سايكەس كەلەتىن استىق بولەك جينالادى. وبلىستاردىڭ وتىنىمدەرى بويىنشا مۇنداي استىق تۇقىمدارى ەگىن ەگەتىن فەرمەرلەرگە تاۋارلىق كرەديت رەتىندە بەرىلەدى.
ءوز كەزەگىندە, جوسپار بويىنشا 1,9 ملن توننا استىق تۇقىمى قاجەت بولسا, قازىر ونىڭ 695,4 مىڭ تونناسى نەمەسە 35%-ى جينالدى. سوڭعى جىلدارداعى تالداۋ كورسەتكەندەي, ەگىلگەن تۇقىمنىڭ شامامەن 60%-ى وتاندىق ۇلەسكە تيەسىلى.