الا دوپقا اۋەسى اۋعان فۋتبول جانكۇيەرلەرى اسىعا كۇتكەن ەۋروپاداعى كلۋبتىق دەڭگەيدەگى ەڭ ءىرى ءۇش ءتۋرنيردىڭ توپتىق كەزەڭدەگى ويىندارى باستالدى. جىل سايىن ەۋروكۋبوگتىڭ كۇزگى ماۋسىمىندا دوپ تەبۋدى ادەتكە اينالدىرعان ەلىمىزدىڭ كوماندالارى بۇل جولى بىلگەنىنەن جاڭىلعان جوق. بىلتىر ەل بىرىنشىلىگىندە ۇزدىك شىققان ەلوردانىڭ «استاناسى» بيىل كونفەرەنتسيا ليگاسىنىڭ توپتىق كەزەڭىندە ونەر كورسەتۋ مۇمكىندىگىنە يە بولدى.
بۇعان دەيىن چەمپيوندار ليگاسى مەن ەۋروپا ليگاسىنىڭ توپتىق سايىستارىندا باق سىناپ, قارت قۇرلىقتىڭ ادۋىندى كوماندالارىنا ازۋىن باتىرىپ ۇلگەرگەن «استانا» اراعا ءۇش سالىپ قايتادان ەۋروكۋبوك باسەكەلەرىنىڭ توپتىق كەزەڭىنە ورالدى. ەلوردالىق ۇجىم بۇل جولى بىرەر جىل بۇرىن عانا تۇساۋى كەسىلگەن كونفەرەنتسيا ليگاسىندا باق سىناماق. بىراق جەرلەستەرىمىزدىڭ بۇل ليگادا العاشقى قادامى اسا ءساتتى باستالا قويعان جوق. س توبىندا حورۆاتيانىڭ «دينامو زاگرەب», چەحيانىڭ «ۆيكتوريا» جانە كوسوۆونىڭ «بالكاني» كوماندالارىمەن سىنعا تۇسەتىن «استانا» العاشقى تۋردا «دينامومەن» كەزدەسىپ, 5:1 ەسەبىمەن ويسىراي جەڭىلدى.
وتاندىق مامان گريگوري بابايان جاتتىقتىراتىن ەلوردالىق كلۋب حورۆاتيانىڭ كومانداسىمەن بيىلدىققا وسىمەن ءۇشىنشى مارتە, ال جالپى بەس رەت جاسىل الاڭدا جولىعىپ, بارلىعىندا دا قارسىلاستارىنا جول بەردى. ەڭ وكىنىشتىسى, كەيىنگى ءۇش ماتچتىڭ ەسەبىن قوسا ەسەپتەگەندە «استانا» «شاقپاق جەيدەلى» ەلدىڭ داڭقتى كومانداسىنان جالپى ەسەپتە 11:1 ەسەبىمەن تاس-تالقانى شىعىپ جەڭىلدى. «استانا» العاش رەت چەمپيوندار ليگاسىنىڭ ەكىنشى ىرىكتەۋ كەزەڭىندە ءوز الاڭىمىزدا 2:0 ەسەبىمەن جەڭىلسە, زاگرەبتەگى ويىندا 4:0 ناتيجەسىمەن جەرلەستەرىمىز جانارىمەن جەر شۇقىپ قايتتى. وسى ويىنداردان قورىتىندى شىعارا الماعان گريگوري بابايان شاكىرتتەرى بۇل جولى سىرت الاڭدا تاعى دا ماسقارا بولىپ جەڭىلدى. كەيىنگى جىلدارداعى ۇلتتىق قۇرامامىزدىڭ ءتاۋىر ويىنىنان كەيىن ەۋروپادا ەلىمىزدىڭ بەت بەينەسىنە اينالىپ ۇلگەرگەن «استانا» كلۋبىنىڭ كۇرەۋى جانكۇيەرلەردىڭ ىزاسىن تۋعىزعانى انىق.
وسىدان بىرەر اي بۇرىن عانا وتكەن كەزدەسۋلەردە «دينامو» ساپىندا حورۆاتيا قۇراماسىنىڭ نەگىزگى قاقپاشىسى دومينيك ليۆاكوۆيچ, «استانا» قاقپاسىنا ءبىر ەمەس, ءۇش گول سوققان لۋكا يۆانۋشەچ, تاسقامال قورعاۋشى يوسيپ سۋتالو جانە تاعى باسقا نەگىزگى قۇرامدا ويناعان مىقتى فۋتبولشىلار كوماندادان كەتىپ قالسا دا, ولاردىڭ ورنى ويسىراپ قالعان جوق, قايتا كۇشەيە تۇسكەنىن كەشەگى ماتچتىڭ ەسەبى ايتىپ تۇر. ال وسى ۋاقىت ارالىعىندا «استانانىڭ» ويىنى كەرى كەتىپ بارا جاتقانداي.
زاگرەبتىڭ «ماكسيمير» ستاديونىندا وتكەن ەكى ۇجىم اراسىنداعى كەزدەسۋدىڭ العاشقى بولىگىندە ەلوردالىقتار ءبىر گول وتكىزىپ السا دا, جامان ويىن كورسەتكەن جوق ەدى. الايدا ەكىنشى تايمدا «استانا» فۋتبولشىلارى الاڭدا نە ءۇشىن جۇرگەندەرىن ۇمىتىپ قالسا كەرەك, ايتەۋىر ءوز قاقپالارىنا باقانداي ءتورت گول وتكىزىپ الدى. دينامولىقتار العاشقى ەكى گولىن پەنالتيدەن سوقسا, قالعان ءۇش توبىن ويىن جاعدايىندا ءبىزدىڭ قاقپاعا ەنگىزدى. اتاپ ايتقاندا, كەزدەسۋدىڭ 43-ءشى جانە 53-مينۋتىندا برۋنو پەتكوۆيچ 11 مەترلىك ايىپ دوبىنان ءمۇلت كەتپەسە, 58-مينۋتتا ماركو بۋلات, 85-ءشى مينۋتتا انتونيو مارين جانە ماتچ اياقتالار تۇستا, ەكىنشى تايمدا الاڭعا شىققان تيبور حاليلوۆيچ مەرگەندىگىمەن كوزگە ءتۇستى. ال «استانا» ساپىنان جالعىز جۇبانىش گولىن ماتچتىڭ 78-مينۋتىندا قورعاۋشى كامو وگانەسيان سوقتى. قورىتىندى ەسەپ – 5:1.
بۇل جەڭىلىستەن كەيىن «استانا» كلۋبىنىڭ جانكۇيەرلەرى الەۋمەتتىك جەلىلەردە باس باپكەر گريگوري باباياننىڭ جۇمىسىنا كوڭىلدەرى تولمايتىنىن جانە ونىڭ ءوز ەركىمەن وتستاۆكاعا كەتۋىن تالاپ ەتىپ جاتىر. گ.بابايان بولسا, ماتچقا دەيىنگى جانە ماتچتان كەيىنگى ءباسپاسوز ءماسليحاتىندا دا «دينامونىڭ» جوعارى دەڭگەيدەگى قارسىلاس ەكەنىن, ولار كونفەرەنتسيا ليگاسىندا ەمەس ەۋروپا ليگاسىندا ويناۋعا لايىق ۇجىم ەكەنىن ايتۋدان جالىققان جوق. ال «استانا» شە, مۇنداي ويىنىمەن كونفەرەنتسيا ليگاسىندا ويناۋعا لايىق پا؟
كونفەرەنتسيا ليگاسىنىڭ ءبىرىنشى تۋر ويىندارىنان كەيىن س توبىندا «دينامو» مەن «ۆيكتوريا» كوماندالارى ءۇش ۇپايمەن كوش باستادى. چەحيا كومانداسى العاشقى تۋردا كوسوۆانىڭ «بالكاني» كومانداسىن ءوز الاڭىندا 1:0 ەسەبىمەن تىزە بۇكتىردى. ەلوردالىقتار ەكىنشى تۋردا ءوز الاڭىندا چەحيانىڭ «ۆيكتوريا» كلۋبىن قابىلدايدى. كەزدەسۋ 5 قازانعا جوسپارلانعان.
سونداي-اق ۇلتتىق قۇرامامىزدىڭ كوشباسشى فۋتبولشىسى باقتيەر زاينۋتدينوۆ ونەر كورسەتەتىن تۇركيانىڭ «بەشيكتاش» كلۋبى دا كونفەرەنتسيا ليگاسىنىڭ توپتىق كەزەڭىندەگى العاشقى تۋر ويىنىن سىرت الاڭدا بەلگيانىڭ «گەنك» كومانداسىمەن وتكىزىپ, 1:1 ەسەبىمەن تەڭ ءتۇستى. جەرلەسىمىز بۇل ويىندا الاڭعا ەكىنشى تايمدا قوسالقى قۇرامنان شىقتى.