باۋىرجان مومىش ۇلى مەن ءىلياس وماروۆتىڭ ءوزارا جازىسقان ورەلى حاتتارىن وقىپ وتىرساڭىز, باۋىرمالدىقتىڭ, ادال دوستىق پەن شىنايى جاناشىرلىقتىڭ قانداي بولاتىنىن تاني تۇسكەندەي بولاسىز.
بۇل وزىنشە ءبىر بولەك اڭگىمە. ايتپاعىمىز, تاياۋدا قوستانايعا ءىلياس وماروۆتىڭ تۋىسى مىرزاتاي نۇرپەيىسوۆ كەلگەن ەدى. قاريانىڭ قولىندا ءبىراز دۇنيە بار ەكەن, سونىڭ ءبىرى – باۋىرجان باتىردىڭ سۋرەتى. سۋرەت سىبىردە سالىنعان.
– باۋىرجان سىبىردە بولادى عوي. ول جاققا ءدال نە ماقساتپەن بارعانىن انىق بىلمەيمىن. باتىردىڭ پورترەتىن كەلىستى ەتىپ سالعان سۋرەتشى تۋرالى دا دەرەگىم جوق. سول سۋرەتتى فوتوعا ءتۇسىرىپ, ىلياسقا جىبەرەدى. ءىلياس اعامىزدىڭ ۇيىندە جەكە ءارحيۆى بار. سودان ۇلكەن قىزى ينگيلسينا ەكەۋمىز قاراپ وتىرىپ تاۋىپ العان دۇنيە عوي. بۇل فوتوسۋرەت باۋىرجان مەن ءىلياستىڭ تىرشىلىكتە سىيلاسىپ, ءبىر-ءبىرىن قادىر تۇتىپ وتكەنىن كورسەتەدى. داڭقتى قولباسشىنىڭ ىلياسقا دەگەن قۇرمەتى – بۇل. باۋىرجاننىڭ ء«اي, ءىلياس, سەن ەڭ ۋمنىي قازاقسىڭ عوي», دەگەن ءسوزى قالعان. مۇنداي جوعارى باعانى ەكىنىڭ بىرىنە بەرە بەرمەگەن ول كىسى. ءىلياس اعامنىڭ ەكىنشى قىزى – الميرا, بالاسى – «قايرات» فۋتبول كلۋبىنىڭ ارداگەرى, بەلگىلى كومەنتاتور دياس وماروۆ. تامەرلان دەگەن بالاسى – تەحنيكا عىلىمدارىنىڭ دوكتورى. ولاردىڭ ءبارى ومىردەن ءوتىپ كەتتى, – دەدى قاريا.
باۋىرجان مومىش ۇلى ءىلياس وماروۆقا جولداعان فوتوسۋرەتىنىڭ استىڭعى بەتىنە توتە جازۋمەن ءۇش اۋىز ولەڭ جازعان ەكەن. مىرزاتاي قاريا ونى احمەت جازۋىن تانيتىن ءبىر-ەكى قىز بالاعا وقىتىپ, كيريلل قارپىنە ءتۇسىرتىپ الىپتى. ولەڭ مازمۇنى بىلايشا ورىلەدى:
ءىلياس,
سىبىردە سالىنىپ ەد بۇل سۇگىرەت
ءسىبىردى كورگەندەر – از, كورمەگەن – كوپ,
كوردىم دەپ وتىرعام جوق مەن ۋايىم جەپ.
مەنەن بۇرىن بولعاندار ەرتەگىدەي,
سورلاپتى نە تۇتقىن بوپ, نە پەندە بوپ.
ءسىبىردىڭ سىر ساندىقتاي سىرى دا مول,
تىڭداساڭ, وتە زارلى مۇڭى دا مول.
جازعىتۇرىم جايناعان اشىق كۇندەي,
دەنەڭدى جادىراتار نۇرى دا مول.
ءسىبىر سىرىن ايتادى سىرلاسقانعا,
ءسىبىر مۇڭىن شاعادى مۇڭداسقانعا.
جەل-بوران سۇراپىلمەن ەر تىلدەسەر,
ءومىردىڭ قىرىن باسىپ ۋ تاتقاندا.
مىرزاتاي نۇرپەيىسوۆ قازىر استانادا باۋىرجان مومىش ۇلى داڭعىلىنىڭ بويىندا تۇرادى. قاريا ءوزىنىڭ كىندىك قانى تامعان قاراوبادان شىققان ءىلياس وماروۆ, مالىك فازىلوۆ, ومىرزاق سۇلتانعازين سىندى ەلەۋلى تۇلعالارعا وبلىس ورتالىعى قوستانايدىڭ تورىنەن كوشە اتى بەرىلسە دەگەن تىلەگىن ارقالاي كەلگەن ەكەن, شارۋاسى ماندىماي, رەنجىڭكىرەپ كەتتى.
قوستاناي وبلىسى