جىلداعى داستۇرگە ساي الماتى قالاسىنىڭ ورتالىعىندا الماتى وبلىسىنىڭ اۋىل شارۋاشىلىعى تاۋار وندىرۋشىلەرىنىڭ قاتىسۋىمەن كەڭەيتىلگەن جارمەڭكە ۇيىمداستىرىلدى. بۇل شارانى قالا تۇرعىندارى اسىعا كۇتەرى انىق. سەبەبى ءوڭىردىڭ ءار تۇكپىرىنەن كەلگەن ونىمدەر دەلدالسىز تۇتىنۋشىلارعا تىكەلەي ساۋدالانۋدىڭ ناتيجەسىندە باعا بازاردان اناعۇرلىم ارزانعا تۇسەدى. وسى ءبىر ءتيىمدى ءساتتى پايدالانىپ, قىستىڭ قامىن جاساپ قالۋعا تىرىسقان قالا تۇرعىندارىنىڭ جارمەڭكە الاڭىنا بەت العان قاراسى قالىڭداپ, كۇن كوتەرىلە كەلە ساۋدانىڭ كورىگىن قىزدىردى.
«الماتى وبلىسىندا ءداستۇرلى تۇردە ءداندى داقىلدار جانە الما, المۇرت, ءجۇزىم, كوكونىستەردىڭ بارلىق ءتۇرى ءوسىرىلىپ, مال مەن قۇس شارۋاشىلىعى قارقىندى دامىعان. بيىلعى جىلى رەسپۋبليكادا سارى ورىك ءوسىرۋ بويىنشا 1-ورىندى, كارتوپ پەن كۇرىش ءوسىرۋ بويىنشا 2-ورىندى الىپ وتىر.
سونداي-اق ءوڭىرىمىز قۇس ءوسىرۋ مەن قۇس ەتىن وڭدەۋ بويىنشا الدىڭعى ورىندا. وبلىستا 8,3 ملن باس قۇس تىركەلگەن, ياعني رەسپۋبليكا بويىنشا جالپى قۇس سانىنىڭ 17 پايىزىن قۇرايدى. جىل باسىنان بەرى 141,4 مىڭ توننا بارلىق تۇردەگى ەت ءوندىرىلدى. ونىڭ ىشىندە 62,1 مىڭ تونناسى برويلەردىڭ قۇس ەتى. وبلىس قۇس ەتىنە دەگەن الماتى قالاسى تۇرعىندارىنىڭ سۇرانىسىن 100 پايىز قامتاماسىز ەتىپ وتىر», دەيدى وبلىس اكىمىنىڭ ورىنباسارى الماس باتانوۆ.
ءوڭىردىڭ الىس-جاقىن رايىمبەك, كەگەن, ۇيعىر, بالقاش, جامبىل, ەڭبەكشىقازاق, تالعار, قاراساي, ىلە اۋداندارىمەن قاتار, قوناەۆ قالاسىنىڭ اۋىلشارۋاشىلىق تاۋار وندىرۋشىلەرى بۇل كۇنى جارمەڭكەگە جالپى كولەمى 179,3 توننا ءونىم الىپ كەلدى. ونىڭ ىشىندە 20,3 توننا ەت ونىمدەرى, 6 توننا ءسۇت ونىمدەرى, 20,6 توننا كارتوپ, 25,4 توننا كوكونىس, 22 توننا الما مەن جەمىس-جيدەك جانە 45,2 توننا باسقا دا ونىمدەر ساۋدالاندى.
«مۇنداي ءىرى جارمەڭكەگە العاش رەت ءوز ءونىمىمدى الىپ كەلدىم. تابيعي بالدىڭ ءۇش ءتۇرى ساۋدالانادى. ءدامىن تاتقان تۇتىنۋشىلار ءدان ريزا كەيىپپەن ساتىپ الىپ جاتىر. ونىمدەرىمىزدى وتكىزۋدە جارمەڭكەنىڭ پايداسى تيۋدە», دەيدى كەگەن اۋدانىنان كەلگەن جاس ومارتاشى يگىلىك ءابدىراسىل.
ال جەكسەنبى كۇنى الماتى قالاسى اكىمدىگىنىڭ ۇيىمداستىرۋىمەن تۇڭعىش پرەزيدەنت ساياباعىندا «Apple Fest» فەستيۆالى ءوتتى. وڭىردە 11 مىڭ گەكتارعا جۋىق الما باعى بار بولسا, ونىڭ ىشىندە ايگىلى اپورت 1 259 گەكتاردى قۇرايدى.
اتالعان الما فەستيۆالىنە تالعار, قاراساي, ەڭبەكشىقازاق جانە ۇيعىر اۋداندارىنىڭ شامامەن 25 باۋ-باقشا سەرىكتەستىكتەرى قاتىستى. جارمەڭكەدە المانىڭ جوعارى سۇرىپتى 13 ءتۇرى ۇسىنىلدى.
الماتى وبلىسى