فۋتزالدان قازاقستان ۇلتتىق قۇراماسى 2024 جىلعى الەم چەمپيوناتىنا جولداما بەرەتىن سوڭعى ىرىكتەۋ كەزەڭىن ءساتتى باستادى. سىرت الاڭدا نيدەرلاند قۇراماسىمەن شەبەرلىك بايقاسقان جەرلەستەرىمىز الاڭ يەلەرىنەن 2:0 ەسەبىمەن باسىم ءتۇستى.
كەلەسى جىلى وزبەكستاننىڭ باس شاھارى – تاشكەنتتە جالاۋى جەلبىرەيتىن الەم چەمپيوناتىنىڭ ىرىكتەۋ كەزەڭىن قازاقستان قۇراماسى ەكىنشى اينالىمنان باستادى. ول كەزەڭدە ريكاردا كاكا شاكىرتتەرى سلوۆەنيا جانە چەرنوگوريا قۇرامالارىمەن باق سىناسىپ, ءوز توبىندا ءبىرىنشى ورىنمەن ەليتالى كەزەڭدە ويناۋ مۇمكىندىگىنە يە بولدى. ال الەم چەمپيوناتىنا جولداما بەرەتىن سوڭعى ىرىكتەۋدە جەرلەستەرىمىز جەرەبە قورىتىندىسى بويىنشا نيدەرلاند, رۋمىنيا جانە ازەربايجان قۇرامالارىمەن بىرگە ا توبىنا ءتۇستى.
وتكەن اپتادا ەل قۇراماسى سوڭعى ىرىكتەۋ ساتىسىنداعى العاشقى ويىنىن سىرت الاڭدا وتكىزىپ, نيدەرلاند فۋتزالشىلارىنان باسىم ءتۇستى. المەرە قالاسىندا وتكەن تارتىستى ويىندا قازاقستان قۇراماسى ءار تايمدا ءبىر-ءبىر گولدان سوعىپ, ىرىكتەۋدەگى ماڭىزدى ءۇش ۇپايىنا قول جەتكىزدى. العاشقى تايمدا ەدسون ەسەپتى اشسا, ەكىنشى تايمدا داۋرەن تۇرساعۇلوۆ تابلوداعى كورسەتكىشتى ەسەلەپ, ويىننىڭ نۇكتەسىن قويدى – 2:0.
ستاتيستيكاعا كوز جۇگىرتەر بولساق, قازاقستان مەن نيدەرلاند قۇرامالارى بۇعان دەيىن تەك ءبىر مارتە كەزدەسكەن ەكەن. 2019 جىلى الەم چەمپيوناتىنىڭ ەكىنشى ىرىكتەۋ كەزەڭىندە جولدارى ءتۇيىسىپ, سول كەزدە دە قازاقستان قۇراماسىنىڭ مەرەيى ۇستەم بولعان ەدى – 5:0.
ءبىزدىڭ توپتاعى ەكىنشى ويىندا رۋمىنيا قۇراماسى ءوز الاڭىندا ازەربايجان فۋتزالشىلارىن قابىلداپ, 3:1 ەسەبىمەن جەڭىسكە جەتتى. ءسويتىپ, ءبىرىنشى تۋردان كەيىن ا توبىندا قازاقستان مەن رۋمىنيا قۇرامالارى ءۇش ۇپايمەن كوش باسىنا شىقتى. الايدا رۋمىندار كوپ گول سوعۋ كورسەتكىشىمەن تۋرنير كەستەسىندە قازاقستاندى ەكىنشى ورىنعا ىعىستىردى. ەندى ا توبىنىڭ قوس مىقتىسى 20 قىركۇيەك كۇنى الماتىداعى بالۋان شولاق سپورت كەشەنىندە شەبەرلىك بايقاسادى. دەمەك ەليتالىق راۋندتىڭ ەكىنشى تۋرىنان كەيىن ا توبىندا جالعىز كوشباسشى پايدا بولۋى مۇمكىن.
ىرىكتەۋ سايىستارىنىڭ ەرەجەسى بويىنشا ەليتالى كەزەڭدە باق سىناپ جاتقان ەۋروپانىڭ 20 قۇراماسىنىڭ تەك جەتەۋى عانا كەلەسى جىلعى الەم چەمپيوناتىنا قاتىسا الادى. ياعني بەس توپتا ۇزدىك شىققان بەس قۇراما جاھاندىق دوداعا تىكەلەي جولداما السا, ەكىنشى ورىن العان ەڭ ۇزدىك ءتورت قۇراما ءبىر-بىرىمەن ەلەكتىك ويىن وتكىزىپ, قالعان ەكى جولدامانى ساراپقا سالادى.