5-12 قىركۇيەك كۇندەرى پولشانىڭ بىدگوشش قالاسىندا ۇيىمداستىرىلعان شاحماتتان ايەلدەر اراسىنداعى ءىح كوماندالىق الەم چەمپيوناتىندا تاريحي ناتيجە تىركەپ, كۇمىس مەدال جەڭىپ العان قازاقستان قۇراماسىنىڭ شاحماتشىلارى ەلگە ورالدى.
استانا قالاسىنىڭ حالىقارالىق اۋەجايىنان ويىنشىلار مەن باپكەرلەردى تۋىستارى, دوستارى, باق وكىلدەرى, سپورتتى دامىتۋ ديرەكتسياسى مەن استانا قالاسى سپورت جانە دەنە شىنىقتىرۋ باسقارماسىنىڭ قىزمەتكەرلەرى زور ىقىلاسپەن كۇتىپ الدى.
«ۇلتتىق قۇرامانى جاستاردان جاساقتاپ اپارعانىمىز ءبىزدىڭ باسىمدىعىمىز بولدى دەي الامىز. ويتكەنى جاس سپورتشىلارىمىز جىلدام شاحمات ويناۋعا بەيىم. ەرەجە بويىنشا ءار جۇرىسكە 10 سەكۋندتان بەرىلەدى. بۇل, اسىرەسە, فرانتسيا قۇراماسىمەن بولعان ويىندا قاتتى كومەكتەستى. ءيا, كومانداداعى بارلىق ويىنشى – جاسوسپىرىمدەر, جاستار اراسىنداعى الەم چەمپيونى. الايدا ەشقايسىسى ەرەسەكتەر اراسىنداعى مۇنداي ءىرى سىندا ەشقاشان كوزگە تۇسپەگەن. سوندىقتان مامانداردىڭ كوبى پولشاداعى چەمپيوناتتىڭ «توسىن سىيى» دەپ ءبىزدىڭ شاحماتشىلاردى ايتتى. سونىڭ ىشىندە الۋا نۇرمانوۆا ەرەكشە كوزگە ءتۇستى.
الدا تاعى دا ماڭىزدى باسەكەلەر بار. ازيا ويىندارىندا كوماندا ساپىن تاجىريبەلى جانسايا ابدىمالىك پەن دينارا سادۋاقاسوۆا تولىقتىرادى. نەگىزگى قارسىلاسىمىز قىتاي مەن ءۇندىستاننىڭ دا دايىندىعى جوعارى دەڭگەيدە ەكەنى بەلگىلى», دەدى پاۆەل كوتسۋر باق وكىلدەرىنە بەرگەن سۇحباتىندا.
سپورتتى دامىتۋ ديرەكتسياسى ءباسپاسوز قىزمەتىنىڭ مالىمەتىنشە, ۇلتتىق قۇراما كوشباسشىسى ءبيبىسارا اساۋباەۆا پولشاداعى دودادان كەيىن بىردەن گەرمانياعا كەزەكتى جارىسقا قاتىسۋ ءۇشىن ۇشىپ كەتكەن. بليتس شاحماتتان ەكى دۇركىن الەم چەمپيونى قىتايدىڭ حانچجوۋ قالاسىندا وتەتىن ءحىح جازعى ازيا ويىندارىنا الداعى اپتادا سول مەملەكەتتەن اتتانادى.
ايتا كەتەيىك, بيىل قازاقستان ايەلدەر اراسىنداعى كوماندالىق الەم چەمپيوناتىندا العاش رەت جۇلدەگە يە بولدى. پولشاداعى سايىستىڭ بارلىق جۇلدەگەرى (گرۋزيا, قازاقستان, فرانتسيا) ا توبىندا ونەر كورسەتكەنىن ايتا كەتكەن ءجون. وسى ۋاقىتقا دەيىن ايەلدەردىڭ دۇنيەجۇزى دوداسىندا جەتى مەملەكەتتىڭ ويىنشىلارى تۇعىر ساتىسىنا كوتەرىلگەن.