العاشقى “قارلىعاش” قانات قاقتى وبلىستا مەكتەپكە دەيىنگى بالالار مەكەمەلەرىن كوپتەپ اشۋ جۇمىستارى جۇيەلى تۇردە قولعا الىنۋدا.
سولاردىڭ ءبىرى – اقتاۋ قالاسىندا “بالاپان” باعدارلاماسى اياسىنداعى “قارلىعاش” اتتى شاعىن بالالار ورتالىعى. ايماعىمىزدا العاش اشىلعان جەكە مەنشىك ورتالىقتا بالالار تاربيەسى ءۇشىن بارلىق جاعداي جاسالعان. جۇمىسقا تاجىريبەلى ماماندار تارتىلىپتى. ورتالىق باسشىسى ايماققا بەلگىلى ازامات, عىلىم كانديداتى ءالىمجان ساعىنباەۆ وسىناۋ بالالار مەكەمەسىن ءوزى باسقاراتىن “مەيىربيكە” مەديتسينالىق كوللەدجى جانىنان اشىپ وزدەرى ورنالاسقان شاعىن اۋدان تۇرعىندارىنان يگى تىلەك, جىلى لەبىز ەستىدى. ەلباسى نۇرسۇلتان نازارباەۆتىڭ بالالارعا دەگەن اكەلىك قامقورلىعىنا ساي وسى جىلدىڭ اياعىنا دەيىن اقتاۋدا 17 بالاباقشا اشۋ كوزدەلۋدە, – دەيدى وبلىس اكىمىنىڭ ورىنباسارى قانىبەك جۇماشەۆ. جالپى, مەكتەپكە دەيىنگى بالالار مەكەمەلەرىنىڭ اۋىلدىق جەرلەردە دە ءجيى اشىلا باستاۋىن قۇپتارلىق جاعداي دەۋگە بولادى.
جولامان بوشالاق, ماڭعىستاۋ وبلىسى.
بۇلدىرشىندەردى قۋانتىپ قايتتى. وبلىس ورتالىعىنداعى وتباسىلىق ۇلگىدەگى بالالار اۋىلىنا جومارت جاندار اركەز دەمەۋشىلىك جاساپ تۇرادى. بۇل جولى ونىڭ تاربيەلەنۋشىلەرىنە بانك قىزمەتكەرلەرى وزدەرىنىڭ سىي-سياپاتتارىن ارقالاي كەلدى. الدىمەن بالالار اۋىلىنا “ەۋرازيالىق بانك” وكىلدەرى اتباسىن تىرەپ, 70 مىڭ تەڭگەنىڭ تارتۋىن سىيلاسا, ولاردان كەيىن ىلە-شالا كەلگەن “حالىق بانكى” زەينەتاقى قورىنىڭ قىزمەتكەرلەرى دە مول بازارلىقپەن قۋانتتى. 200 مىڭ تەڭگەنىڭ زاتتاي سىيلىقتارىن ۇسىنىپ, 22 بالاعا دەمالىس لاگەرلەرىنە جولداما ۇلەستىردى. ال “قازپوشتا” اق جەرگىلىكتى فيليالى 63 مىڭ تەڭگەگە اياق-كيىم جانە ساندىق فوتوكامەرا سىيلادى. بۇلدىرشىندەر جاقسى وقۋعا, ءتارتىپتى بولۋعا ۋادە ەتىپ, ءان-جىردان شاشۋ شاشتى.
ءومىر ەسقالي,سولتۇستىك قازاقستان وبلىسى.
كاسىپورىن ايىپپۇلعا كەسىلدى. تابيعات كەنىشىن يگەرىپ جاتقان كاسىپورىنداردىڭ كەيدە وزىمبىلەمگە سالىنىپ, جالعاندى قونىشىنان باساتىن ۋاقىتتارى بولادى. بۇل, اسىرەسە, قورشاعان ورتاعا بايلانىستى. مۇندايدا ولارعا زاڭدىق تۇرعىدا توقتام سالارداي پارمەن كەرەك. سوزاقتا ۋران كەنىشىن يگەرىپ جاتقان “كاتكو” بىرلەسكەن كاسىپورنىنىڭ قورشاعان ورتاعا كەلتىرىلگەن زالالى انىقتالىپ, 15,5 ملن. تەڭگە ايىپپۇل سالىندى. سوت شەشىمىمەن تولەندى. ءسويتىپ, وبلىستىق پروكۋراتۋرانىڭ ىمىراعا بارمايتىندىعى وزگە كاسىپورىنداردىڭ ەكولوگيا ماسەلەسىنە سەرگەك قاراۋىنا وڭ ىقپال ەتۋدە.
باقتيار تايجان, وڭتۇستىك قازاقستان وبلىسى.
جاڭا باسشىلار تاعايىندالدى. وبلىستاعى حالىقتىڭ الەۋمەتتىك جاعدايىمەن تىكەلەي اينالىساتىن جۇمىسپەن قامتۋدى ۇيلەستىرۋ جانە الەۋمەتتىك باعدارلامالار مەن جولاۋشى كولىگى جانە اۆتوموبيل جولدارى باسقارمالارىنا جاڭا باسشىلار تاعايىندالدى. وبلىس اكىمىنىڭ وكىمىمەن بۇعان دەيىن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باستىعىنىڭ ورىنباسارى لاۋازىمىنداعى ۇمسىن بالابيەۆا اتالعان باسقارماعا, ال وبلىستىق جولاۋشى كولىگى جانە اۆتوموبيل جولدارى باسقارماسىنا بۇعان دەيىن ورىنباسار لاۋازىمىنداعى قوبىلان ماناپوۆ سول مەكەمەگە باستىق بولىپ تاعايىندالدى. دەمەك, جاڭا لاۋازىمداعىلارعا اتالعان سالاداعى جۇمىس تانىس, ءارى ۇجىممەن بايلانىستارىنىڭ قالىپتاسقانىن كورسەتەدى.
كۇمىسجان بايجان, الماتى وبلىسى.
ۇلت بىرلىگى – ەل ۇيىتقىسى. “جاس عالىمدار اليانسى” قوعامدىق بىرلەستىگىنىڭ باستاماسىمەن “ىنتىماعى جاراسقان ەلدە باق تۇرار” اتتى تۇرىك ەتنوورتالىعى وكىلدەرىمەن قىزعىلىقتى كەزدەسۋ بولدى. ونىڭ بارىسىندا سان الۋان ۇلت وكىلدەرى ۇلتتار تاتۋلىعى جايلى پىكىر الماسىپ, “ەل بىرلىگى” دوكتريناسى جايلى ءوز ويلارىن ورتاعا سالدى. قورقىت اتا اتىنداعى قمۋ-ىندە ءبىلىم الىپ جاتقان تۇرىك ستۋدەنتتەرى وزدەرىنىڭ قازاق ەلىنە دەگەن قۇرمەتتەرى زور ەكەنىن ستۋدەنت-جاستاردىڭ تاتۋ-ءتاتتى ءومىر ءسۇرۋىنىڭ ماڭىزى اسا زور بولىپ تابىلاتىنىن جەتكىزدى. كەزدەسۋ الەۋمەتتىك سەنىمدىلىكتى قالىپتاستىرۋ جانە ۇلت بىرلىگى مەن قاي ۇلتتىڭ بولماسىن تۇراقتى دامۋىن قامتاماسىز ەتۋدى مۇرات تۇتتى. مۇنداي كەزدەسۋلەر تاريحى تەرەڭ, تاعدىرى ءبىر ۇلتتار ءۇشىن الداعى ۋاقىتتا دا جالعاسىن تابا بەرمەك.
ەركىن ءابىل, قىزىلوردا.
ەلى اقىنىن قۇرمەتتەدى. ءوزىنىڭ ليريكاعا تولى, ادام جانىن ىزگىلىككە بولەيتىن ولەڭدەرىمەن ەرەكشەلەنەتىن تالانتتى اقىن نۇرلان ماۋكەن ۇلىنىڭ ارامىزدان كەتكەنىنە 5-6 جىل بولدى. الايدا, اقىن ۇلدارىن زايساندىق جەرلەستەرى ۇمىتپاپتى. زايسان اۋداندىق ءماسليحاتىنىڭ دەپۋتاتتارى بۇرىنعى گاگارين كوشەسىن اقىن نۇرلان ماۋكەن ۇلىنىڭ اتىمەن اتاۋ جونىندە شەشىم قابىلدادى. نۇرلان ماۋكەن ۇلى ۇزاق جىلدار زايساندا, وسكەمەندە قىزمەت جاسادى. كەندى التايدىڭ ءوسىپ-وركەندەۋى, عاجايىپ ادامدارى ونىڭ قاناتتى جىرلارىنا ارقاۋ بولدى. ومىردەن قىرشىن كەتكەن سەزىمتال اقىننىڭ ەسىمىن ءوزى وقىعان جامبىل اۋىلىنداعى ورتا مەكتەپكە بەرۋ جونىندەگى ۇيعارىم بۇل كۇندەرى وبلىستىق ونوماستيكا كوميسسيانىڭ قاراۋىندا جاتىر.
وڭداسىن ەلۋباي, شىعىس قازاقستان وبلىسى, زايسان اۋدانى.
تالانتتى سازگەرگە تاعزىم. بيىلعى جىلى سەمەيدەگى مۇقان تولەباەۆ اتىنداعى مۋزىكا كوللەدجىنىڭ قۇرىلعانىنا – 55, ال وسى وقۋ ورنىندا قىرىق جىل ەڭبەك ەتكەن بەلگىلى سازگەر, ۇلاعاتتى ۇستاز تەمىرجان بازارباەۆتىڭ تۋعانىنا 75 جىل تولىپ وتىر. جۋىردا اباي اتىنداعى دراما تەاترىندا وتكەن اتالعان كوللەدج تۇلەكتەرىنىڭ ەسەپ بەرۋ كونتسەرتى تالانتتى سازگەردىڭ مەرەيتويى قۇرمەتىنە ارنالدى. وسى شارانىڭ قارساڭىندا تەمكەڭ تۇرعان ۇيگە ەسكەرتكىش تاقتا ورناتىلدى. سونىڭ ءبارىنىڭ باسى-قاسىندا كوللەدج ديرەكتورى وتانتاي كارىبجانوۆ جۇرگەنىن ايتا كەتكەن ءجون.
داۋلەت سەيسەن ۇلى, سەمەي.
ەل ىشىندە تالاپتى جاستار كوپ. وتكەن اپتادا وبلىس ورتالىعىنداعى “شاڭىراق” دەپ اتالاتىن حالىق شىعارماشىلىعى مەن مادەني-ساۋىق قىزمەتى سارايىندا وتكەن اۋىل جاستارىنىڭ باسىن قوسقان “نار تاۋەكەل!” اتتى سايىس وسىنى كورسەتتى. راسىندا دا, ەل ىشىندە تالانتتى جاستار تۇرعاندا اۋىل كەشىنىڭ كوڭىلدى, ويىن-ساۋىق دۋمانعا تولى ەكەنى دە ءسوزسىز. وبلىستىق مادەنيەت باسقارماسىنىڭ ۇيىمداستىرۋىمەن وتكەن بۇل سايىسقا ەكىباستۇز, اقسۋ قالالارىنىڭ اۋىلدىق اۋماقتارىنان جانە وبلىس ورتالىعىنا جاقىن ورنالاسقان پاۆلودار اۋدانىنان اۋىل جاستارى قاتىستى. شالعايداعى اۋىلداردىڭ جاستارى دا قازىر كەلەسى سايىسقا دايىندىق ۇستىندە. ال بۇل جولى ونەرلى ونەرپازدار انىقتالىپ, كەنجەكول, شاقات, جەتەكشى اۋىلدارىنىڭ جاستارىنا سىي-سياپات جاسالدى.
فاريدا بىقاي, پاۆلودار.