مادەنيەت جانە اقپارات ءمينيسترى ايدا بالاەۆا Facebook پاراقشاسىندا وقۋشىلاردىڭ مەكتەپكە حيدجاب كيىپ بارۋىنا قاتىستى پىكىر ءبىلدىردى, دەپ حابارلايدى Egemen.kz.
«اتا زاڭىمىزعا سايكەس قازاقستاندا ءدىن مەملەكەتتەن بولىنگەن. ءسوز جوق, مەملەكەت ءدىن بوستاندىعىنا كەپىلدىك بەرەدى. بىراق ءبىز–زايىرلى ەلمىز! سول ءۇشىن دە مەملەكەتتىك ساياساتتىڭ بارلىق ماسەلەلەرى ءدىني پاتۋالارمەن ەمەس, ازاماتتىق نورمالارمەن رەتتەلەدى. قۇقىقتىق-ءنورماتيۆتى اكتىلەر ءاربىر وقۋشىعا مەكتەپ قابىرعاسىندا ارنايى بەكىتىلگەن فورما كيۋدى مىندەتتەيدى, ويتكەنى ءبىلىم بەرۋ ەرەكشەلىگى بىرىڭعايلىلىقتى تالاپ ەتەدى», دەپ جازدى مينيستر.
وسى تۇستا مينيستر ەل كونستيتۋتسياسى بويىنشا مەكتەپتىڭ مىندەتى–وقۋشىلارعا ساپالى ءبىلىم بەرۋگە كەپىلدىك بەرۋ جانە ونى قامتاماسىز ەتۋ ەكەنىن اتاپ ءوتتى.
«مەكتەپتە بالا ەڭ الدىمەن ساپالى ءبىلىم الۋ كەرەك. سودان كەيىن بارىپ, ەرجەتە كەلە, ءدىني نانىم–سەنىمىن, قانداي كيىم ۇلگىسىن كيەتىنىنىن ءوزى شەشەدى دەپ ويلايمىن», دەپ تۇيىندەدى مادەنيەت جانە اقپارات ءمينيسترى.
بۇعان دەيىن اتالعان ماسەلەگە بايلانىستى قازاقستان مۇسىلماندارى ءدىني باسقارماسىنىڭ رەسمي مالىمدەمەسىن جاريالاعان ەدىك.