كوكشەتاۋداعى “بىرلىگىمىز جاراسقان!” پاتريوتتىق اكتسياسى قازاقستان رەسپۋبليكاسىنىڭ مەملەكەتتىك رامىزدەر كۇنىنەن باستاۋ الۋىنىڭ ماڭىزى ايرىقشا. جالاۋلار جەلبىرەگەن تاۋەلسىزدىك الاڭى ايشىقتى بەزەندىرىلۋىمەن كوز تارتادى. مەرەكەلىك ءسان-سالتاناتتاعى قالالىقتاردىڭ كوڭىلدەرى كوتەرىڭكى, جۇزدەرى جارقىن. داۋىس كۇشەيتكىشتەر ارقىلى رۋھ كوتەرەر قىمبات رامىزدەرىمىزدىڭ قادىر-قاسيەتىن پاش ەتكەن جالىندى سوزدەر ەرەكشە ەكپىنمەن قالىقتاۋدا.
سالتانات ەلباسى نۇرسۇلتان نازارباەۆتىڭ بيىلعى جولداۋىنداعى “سالاماتتى ءومىر سالتى مەن ادامنىڭ ءوز دەنساۋلىعى ءۇشىن ىنتىماقتى جاۋاپكەرشىلىگى قاعيداتى – دەنساۋلىق ساقتاۋ سالاسىنداعى جانە حالىقتىڭ كۇندەلىكتى تۇرمىسىنداعى مەملەكەتتىك ساياساتتىڭ ەڭ باستى ءماسەلەسى بولۋى ءتيىس” دەگەن تاپسىرماسىنىڭ تياناقتىلىعىن دارىپتەگەن شارامەن باستالدى. “وليمپيادالىق جۇگىرۋ كۇنى” رەسپۋبليكالىق اكتسياسىنىڭ اياسىندا جارىس جولىنا جەڭىل اتلەتشىلەر شىقتى. وعان وبلىستىڭ 52 وقۋ ورنى مەن ەڭبەك ۇجىمدارىنان 600 ادام قاتىستى. قالانىڭ ەڭ كورىكتى اباي كوشەسىنىڭ بويىمەن مەكتەپ وقۋشىلارى مەن ستۋدەنتتەر, جۇمىسشىلار مەن قىزمەتكەرلەر, زەينەتكەرلەر زامانا كوشىن العا سۇيرەي زىمىراۋدا.
– قازاقستان جاستارىنىڭ الدىندا ۇلكەن مىندەتتەر تۇر, – دەيدى جارىس جەڭىمپازى, اقكول اۋداندىق ىشكى ىستەر ءبولىمىنىڭ قىزمەتكەرى الەكساندر چەرۆياكوۆ. –سوندىقتان, ءبىز زامانداستارىمىزدىڭ ءتانى ساۋ, جانى تازا بولۋىن قالايمىز. بۇل – جاي جۇگىرىس ەمەس, زامانا كوشىنەن وزىق بولۋدى مەڭزەيتىن جۇگىرىس.
جارىس جولىندا مۇمكىندىگى شەكتەۋلى جاندار تاباندىلىق پەن باتىلدىقتىڭ, نامىس پەن جىگەر-قۋاتتىڭ قايران قالارلىق ۇلگىسىن تانىتتى. ولاردى جينالعان قاۋىم مارە تورىندە “بارەكەلدى” ماداق سوزدەرىمەن, القىزىل ىقىلاس گۇلدەرىمەن قارسى الدى.
ودان كەيىن الاڭعا قازاقستان رەسپۋبليكاسىنىڭ مەملەكەتتىك رامىزدەرىن وبلىس اۋماعىندا ناسيحاتتاعان اۆتوجورىق ماشينەلەرى كەلدى. اقمولا وبلىسىنىڭ اكىمى سەرگەي دياچەنكو “بىرلىگىمىز جاراسقان!” پاتريوتتىق اكتسياسىن اشىپ, جينالعانداردى ماڭىزدى مەرەكەمەن قۇتتىقتادى. سونداي-اق, ءوڭىر باسشىسى جاستار اراسىندا پاتريوتتىق تاربيەنى ورىستەتۋدەگى بەلسەندىلىگى ءۇشىن ءبىر توپ جاسقا “جىل پاتريوتى” ارنايى جۇلدەسىن تاپسىردى. ولاردىڭ اراسىندا سوڭعى ازيا ويىندارىندا ۇزىندىققا سەكىرۋدەن التىن مەدالدى جەڭىپ العان سپورت شەبەرى ليۋدميلا گرانكوۆسكايا دا بار.
كوكشە جاستارى مەملەكەتتىك ءرامىزدەر كۇنى وزدەرىنىڭ جازعى ەڭبەك سەمەسترىن باستاۋدى يگى داستۇرگە اينالدىرعان. مىنە, بۇگىن دە اۋەگە ستۋدەنتتىك ەڭبەك وتريادتارىنىڭ ايىرىم بەلگىلەرىن بايلاعان شارلار ۇشىرىلدى. جۇرتشىلىق جاستاردىڭ ء“بىزدى بيىكتەن كورىڭىزدەر!” دەگەن يشاراتىنا قابىل بولسىن ايتتى.
اكتسيانىڭ رەسمي ءبولىمى تاۋەلسىزدىك الاڭىندا مەملەكەتتىك تۋدىڭ كوتەرىلۋى مەن مەملەكەتتىك ءانۇراننىڭ شىرقالۋىمەن اياقتالدى. سالتاناتتى ءراسىمدى اتقارۋ قۇرمەتى وبلىس اكىمى سەرگەي دياچەنكوعا, كوكشەتاۋ قالاسىنىڭ قۇرمەتتى ازاماتى, جەڭىستىڭ 65 جىلدىعىنا بايلانىستى ماسكەۋدەگى قىزىل الاڭداعى مەرەكەلىك پارادقا قاتىسۋشى بالتاش سەيىتوۆكە, “نۇر وتان” حدپ اقمولا وبلىستىق فيليالىنىڭ “جاس وتان” جاستار قاناتى جەتەكشىلەرىنىڭ ءبىرى ينديرا سۇلەيمەنوۆاعا بەرىلدى.
مەرەكە وبلىس ورتالىعىنىڭ مادەنيەت مەكەمەلەرى ارتىستەرىنىڭ كەڭ كولەمدى كونتسەرتتىك باعدارلاماسىمەن جالعاستى.
باقبەرگەن امالبەك,
اقمولا وبلىسى.
رامىزدەر – ەلدىڭ رۋحى
كەنشىلەر قالاسى ەكىباستۇزدا ەلىمىز بويىنشا رەسپۋبليكالىق ءىىى پاتريوتتار فورۋمى بولىپ ءوتتى. وتانىمىزدىڭ ەنەرگەتيكالىق ورتالىقتارىنىڭ ءبىرى سانالاتىن كەنشىلەر قالاسىندا بۇل كۇندەرى 140 مىڭ حالىق تۇرادى. بىرقاتار ەتنوس وكىلدەرى تاتۋ-ءتاتتى عۇمىر كەشۋدە. ەلىمىزدىڭ تۇكپىر-تۇكپىرىنەن جەتكەن قوناقتار “مەملەكەت” ء“رامىز” “پاتريوت” تاقىرىبىنداعى ميتينگكە قاتىسۋ ءۇشىن قالاداعى “قاينار” ءبىلىم بەرۋ جانە سالاماتتى ءومىر سالتىن قالىپتاستىرۋ كەشەنىنە كەلدى. بۇل جاسوسىپىرىمدەر مەن بالالارعا ارنالعان كەشەن بىلتىر “جول كارتاسى” باعدارلاماسى اياسىندا 155 ميلليون تەڭگە قارجى ءبولىنىپ, ءىشى-سىرتىنا تۇگەلدەي قايتادان كۇردەلى جوندەۋ, جاڭارتۋ جۇمىستارى جۇرگىزىلىپ پايدالانۋعا بەرىلگەن بولاتىن. بالالار ءۇشىن 200 ورىندىق جيىلىس زالى, بي زالى, كافە اشىلىپ, تۋريستىك قىزىعۋشىلىققا ارنالعان سكالودروم جاسالدى. جارقىراعان كەشەن ءىشى زاماناۋي ۇلگىدەگى قۇرال-جابدىقتار, جيھازدارمەن جابدىقتالدى.
قوناقتار كەشەن ءىشىن ارالاپ كوردى, بالالار ءوز ونەرلەرىن كورسەتتى. كەزەك-كەزەك تۋريستىك-الپينيستىك سكالودرومعا شىعىپ, سپورتتىق جىگەرلىلىكتەرىن بايقاتتى. سونىمەن قاتار, بالالاردىڭ قاداعالاۋسىز قالماۋلارىن, كامەلەتكە تولماعاندار اراسىندا قۇقىق بۇزۋشىلىقتىڭ الدىن-الۋ, بوس ۋاقىتتارىن مازمۇندى وتكىزۋ, ازاماتتىق سانا-سەزىمدى, پاتريوتيزم مەن وتانسۇيگىشتىككە باۋلۋ, سالاماتتى ءومىر سالتىن قالىپتاستىرۋ, بالالاردىڭ جازعى دەمالىستارىن ۇيىمداستىرۋ بۇل كەشەندى ورتالىقتىڭ نەگىزگى ءمىندەتتەرى بولىپ تابىلادى. بالالار ءار سالا بويىنشا ەلىمىزدە وتەتىن بارلىق بايقاۋلار مەن كونكۋرستارعا قاتىسادى. ميتينگتە فورۋمنىڭ مارتەبەلى قوناقتارى ەلىمىزدىڭ پارلامەنتى سەناتىنىڭ دەپۋتاتى, “نۇر وتان” حدپ جانىنداعى سىبايلاس جەمقورلىققا قارسى كۇرەس جونىندەگى رەسپۋبليكالىق قوعامدىق كەڭەس توراعاسى ورالباي ابدىكارىموۆ, اكادەميك عاريفوللا ەسىم, قازاقستان رەسپۋبليكاسىنا ەڭبەگى سىڭگەن ساۋلەتشى, مەملەكەتتىك ەلتاڭبانىڭ اۆتورى جانداربەك ءمالىبەكوۆ, ەكىباستۇز قالاسىنىڭ اكىمى نۇرلان نابيەۆ, “ەكىباستۇز ماەس-2” ستانساسى” اق-تىڭ جۇمىسشىسى سەرىك زاڭ ۇلى ءسوز سويلەپ, جينالعانداردى تاۋەلسىزدىگىمىزدى اسقاقتاتار رامىزدەردى قۇرمەتتەۋگە, ەلدىڭ جارقىن بولاشاعى ءۇشىن حالقىمىزدىڭ ىنتىماق-بىرلىگىن قاستەرلەۋگە شاقىردى.
ەگەمەن ەلدىڭ رۋحى – مەملەكەتتىك ءانۇران شىرقالىپ, ەلدىڭ تۇتاستىعىن پاش ەتەتىن ەلتاڭباسى جارقىراعان, كوكتە اسقاق بايراعى – تۋى جەلبىرەگەن سالتاناتتى شارادا ەكىباستۇزدىق ونەرپازدار ءلاززات شۋشاەۆا, الەكساندر ۆەرەششاك, قۋات قۇدايقۇلوۆ, “ارمان” ۆوكالدىق توبى پاتريوتتىق اندەردى اۋەلەتتى.
فاريدا بىقاي,
پاۆلودار وبلىسى,
ەكىباستۇز قالاسى.
مەملەكەتتىك رامىزدەر – بيىك مەرەيىمىز
بيىلعى تابيعات تاڭعالارلىقتاي. جازىمىز جاڭبىرلى, قالامىز دا, دالامىز دا جاسانىپ-اق تۇر. ال, ماۋسىمدا وتكەن جىلى پايدالانۋعا بەرىلگەن اسەم اقتاۋداعى “مەملەكەتتىك رامىزدەر” الاڭى بارلىق كۇنى دەرلىك سالتاناتتى شارالارعا تولى بولۋدا. ونى ءبارى دە جاڭا الاڭدا الىستان مەنمۇندالاپ تۇرعان تاۋەلسىز قازاق ەلىنىڭ الىپ كوك بايراعىنىڭ استىندا اسەم دە اسەرلى ءوتىپ جاتادى. كەشە عانا “نۇر وتان” حدپ ماڭعىستاۋ وبلىستىق فيليالى ەل پرەزيدەنتى نۇرسۇلتان نازارباەۆتىڭ “جاسىل ەل” باعدارلاماسىن جۇزەگە اسىرۋ ماقساتىندا اقتوبەلىكتەردىڭ “اۋىلدىڭ كوركەيۋى – ەلدىڭ كوركەيۋى” اتتى مارافون-ەستافەتاسىن ايماقتا “جاسىل باقتى ماڭعىستاۋ” دەگەن اتاۋمەن جالعاستىرعان اۋقىمدى اكتسيا وتكىزگەن-ءدى. وندا جينالعاندار كوپشىلىكتى ولكەمىزدى كوك جەلەككە بولەنگەن ايماققا اينالدىرۋعا شاقىردى. بارشا تۇرعىندارعا, جاستارعا ۇندەۋدە ءاربىر اۋىلدا “بالبوبەكتەر باعىن”, “جاس ۇلاندار باعىن”, “مەكتەپ تۇلەكتەرىنىڭ اللەياسىن” قۇرۋعا ۇسىنىستار جاسالدى.
ال بۇل كۇنى اكتسيا باستالعانعا دەيىن كوشەدەگى راديودان پاتريوتتىق اندەر شىرقالىپ تۇردى. ءويتكەنى, شارا ماقساتى جاستارىمىزدى قازاقستاندىق پاتريوتيزمگە تاربيەلەۋ, دوستىق, تاتۋلىققا, رەسپۋبليكامىزدىڭ مەملەكەتتىك رامىزدەرىن قۇرمەتتەۋگە شاقىرۋ بولدى. ەلىمىزدىڭ بويتۇمارىنداي تۋىمىزدىڭ, ەلتاڭبامىز بەن ءانۇرانىمىزدىڭ ءمان-ماڭىزىن, قادىر-قاسيەتىن تەرەڭدەتە ناسيحاتتاۋ ەدى. سوندىقتان دا ورتالىق الاڭنان “مەملەكەتتىك رامىزدەر” الاڭىنا بەت العاندار “نۇر وتان” حدپ “جاس وتان” جاستار قاناتىنىڭ جاستارى, “اقتاۋ” ستۋدەنتتەر اليانسى, “جاسىل ەل” جاساقتارى, جوعارى, ارناۋلى وقۋ ورىندارىنىڭ ستۋدەنتتەرى بولدى. ولاردىڭ ءبارى وزدەرىنىڭ قازاقستاننىڭ ازاماتى ەكەندىكتەرىن, تاۋەلسىز قازاق ەلىنىڭ مەملەكەتتىك ءرامىزدەرىن, ءتىلىمىز بەن ءمادەنيەتىمىزدىڭ الىپ بەرگەن ەڭ اسىل جاقۇتتارى ەكەندىگىن ءان مەن جىرعا قوتى.
ءتۇس اۋا جاستار شەرۋى ورتالىق كوشەدەگى ايگىلى اقىن قاشاعان كۇرجىمان ۇلىنىڭ ەسكەرتكىشى تۇسىنان باستالىپ, “مەملەكەتتىك رامىزدەر” الاڭىنا كەلدى. بۇل جەردە ەل بولاشاقتارىن وبلىس, قالا باسشىلارى, قوعامدىق ۇيىمدار وكىلدەرى مەن اقتاۋ قالاسىنىڭ قۇرمەتتى ازاماتتارى قارسى الدى. وبلىس اكىمىنىڭ ورىنباسارى قانىبەك جۇماشەۆ: “مەملەكەتتىك رامىزدەر ەلدىگىمىزدىڭ بەينەسى, ەگەمەندىگىمىزدى ايگىلەيتىن ەرەكشە ۇلتتىق قاستەرلى بەلگىلەر. ولاردى قاستەرلەي بىلەتىن سىزدەر, جاستار – ەلىمىزدىڭ بولاشاعى, تاۋەلسىزدىگىمىزدىڭ تىرەگىسىزدەر”, – دەدى. سالتاناتتا “نۇر وتان” حدپ جاستار قاناتىنىڭ اتقارۋشى حاتشىسى ن.قاراساەۆ, اقتاۋ گۋمانيتارلىق كوللەدجىنىڭ وزات ستۋدەنتى س.پانوۆا, اسكەري قىزمەتكەر ب.ەسماعانبەتوۆ, ت.ب. ءسوز سويلەدى. “جاس وتان” جاستار قاناتىنا مۇشەلەر سالتاناتتى تۇردە قابىلداندى. ۇلكەن ورلەۋ ۇستىندە وتكەن پاتريوتتىق اكتسيا سوڭى وبلىستىڭ بەلگىلى كوركەمونەرپازدارىنىڭ كونتسەرتىنە ۇلاستى.
جولامان بوشالاق, اقتاۋ.