ءۇمىت سىيلاعان ءۇش ۇپاي

كەشەگى ويىندا ۇلتتىق قۇراما فۋتبولشىلارىن قولداۋعا مەملەكەت باسشىسى قاسىم-جومارت توقاەۆ ارنايى بارىپ, جىگىتتەردىڭ جەڭىسىنە ەلمەن بىرگە كۋا بولدى. سونىمەن قاتار كاسىپقوي بوكس الەمىندە ەلەۋلى تابىسقا قول جەتكىزىپ, ءۇش ءتۇرلى نۇسقا بويىنشا الەم چەمپيونى اتانىپ, قازاق ەلىن الەمگە تانىتىپ جۇرگەن ماقتانىشىمىز گەننادي گولوۆكين مەن ونىڭ سىڭارى ماكسيم گولوۆكين اقش-تان ارنايى كەلدى. ولار ۇلتتىق قۇرامامىزدى قولداۋعا كەلەتىنىن الەۋمەتتىك جەلىدەگى پاراقشاسىندا مالىمدەگەن ەدى. وسى ورايدا «استانا ارەنانى» باسىنا كوتەرىپ, ايقاي مەن قيقۋعا باسقان جانكۇيەرلەر فۋتبولشىلارىمىزعا زور قولداۋ بىلدىر­گەنىن دە ەرەكشە اتاپ وتكەن ءجون. ەلىمىز­دەگى وتباسى كۇنىنە تۇسپا-تۇس كەلگەن ويىندا جانكۇيەرلەر مەن فۋتبولشىلار ءبىر وتباسى بولىپ, تۇماندى البيوننان كەل­گەن فۋتبولشىلاردىڭ ەكپىنىن باستى.

ماتچتان ءبىر كۇن بۇرىنعى ءباسپاسوز ءماسليحاتىندا قازاقستان ۇلتتىق قۇراما­سىنىڭ باس باپكەرى ماگومەد اديەۆ سولتۇستىك يرلانديامەن وتەتىن ويىندا نەگىزگى قۇرامدا وزگەرىستەر مەن تاك­تيكالىق تۇزەتۋلەر بولاتىنىن مالىم­دەگەن ەدى. ايتقانىنداي, فينليانديامەن بولعان ءبىرىنشى ويىندا ونەر كورسەتكەن قورعاۋشى لەۆ سكۆورتسوۆتىڭ ورنىنا ەركىن تاپالوۆتى شىعارسا, ورتاداعى يسلامبەك قۋات پەن اسلان داراباەۆتى ابزال بەيسەبەكوۆ پەن رامازان ورازوۆقا الماس­تىردى. ال شابۋىلداعى ابات ايىمبەتوۆتىڭ ورنىن ماكسيم سامورودوۆ باستى.

تورەشىنىڭ ىسقىرىعى ەستىلە سالى­سىمەن «استانا ارەنا» ستاديونى ەكى يىنىمەن دەم الدى. اپىر-اي, جان­كۇيەر­لەردىڭ مۇنداي قولداۋى كەيىنگى 30 جىلدا العاش رەت بولىپ جاتسا كەرەك. ارەناداعى اتموسفەرانى سوزبەن جەتكىزۋ مۇمكىن ەمەس, تەك ونى ستاديوندا سەزىنىپ كورۋ كەرەك. فۋتبولشىلارىمىز ءبىرىنشى تايمدى ەرەكشە قارقىنمەن باستادى. العاشقى 20 مينۋتتىڭ ىشىندە يان ۆوروگوۆسكي مەن باقتيەر زاينۋتدينوۆ قاۋىپتى سوققى جاساپ, سولتۇستىك يرلانديا قاقپاشىسىنىڭ قىراعىلىعىن ءبىر تەك­سەرىپ كوردى. ال ارادا سەگىز مينۋت وتكەن ماكسيم سامورودوۆ ايىپ الاڭىنان تاماشا سوققى جاساپ, ويىننىڭ ەسەبىن اشتى – 1:0. ءبىرىنشى تايمنىڭ سوڭىنا دەيىن ءبىزدىڭ جىگىتتەردە ەسەپتى ەسەلەيتىن, ال قارسىلاستارىمىزدىڭ تارازى باسىن تەڭەستىرەتىن بىرنەشە مۇم­كىندىك بولعانىمەن, ەكى قۇرامانىڭ شابۋىلشىلارى دا ءوز جانكۇيەرلەرىن قۋانتا المادى.

ەكىنشى تايمدى قوناقتار وتە بەلسەندى باستادى. ءۇزىلىس كەزىندە سولتۇستىك ير­لانديا قۇراماسىنىڭ باس باپكەرى جارتىلاي قورعانىس پەن شابۋىلعا تىڭ فۋت­بولشىلارىن شىعارىپ, الاڭنىڭ ورتا­لىعى مەن شابۋىلدا بيلىك جۇرگىزۋگە تىرىستى. جانە بۇل تاكتيكالىق وزگەرىس قارسىلاستاردىڭ ويىنىنا وزگەرىس اكەلدى. العاشقى بەس مينۋتتا يرلانديالىق فۋتبولشىلار ءبىزدىڭ قاقپامىزدىڭ ما­ڭايىن تورۋىلدادى. شاتسكيدىڭ شە­بەرلىگى بولماعاندا, قارسىلاستار تارازى باسىن جىلدام تەڭەستىرىپ كەتۋى مۇمكىن ەدى. ابىروي بولعاندا, يگور تاماشا سەيۆ جاساپ, قاقپامىزدى گولدان ساقتاپ قالدى. ورايى كەلگەندە جەرلەستەرىمىز دە قاراپ قالماي, قارسى شابۋىلعا يەك ارتىپ وتىردى. ويىننىڭ سوڭىنا تامان اسحات تاعىبەرگەن دانيا قۇراماسىنا گول سوققانداي دوپتى الىستان تاعى ءبىر مارتە قاقپاعا باعىتتاپ كورگەن ەدى. وكىنىشكە قاراي, بۇل جولعى سوققىسى السىزدەۋ بولسا دا, قاقپاشىعا اجەپتاۋىر قيىن­دىق تۋدىردى. بىراق ەكىنشى تايمدا ەسەپ وز­گەرىسسىز قالدى.

وسىلايشا, ەۋروپا چەمپيوناتىنىڭ ىرىكتەۋ كەزەڭىندە ءتورتىنشى جەڭىسىنە قول جەتكىزگەن جەرلەستەرىمىز ن توبىنىڭ تۋر­نير كەستەسىندە 12 ۇپايمەن ۋاقىتشا ەكىنشى ورىنعا كوتەرىلدى. ماگومەد اديەۆ شاكىرتتەرى كەلەسى تۋر ويىندارىن قازان ايىندا سىرت الاڭدا توپتىڭ ۇزدىكتەرى دانيا (15 قازان) جانە فينليانديا (17 قازان) فۋتبولشىلارىمەن وتكىزەدى.