5 قىركۇيەك – قازاقستان حالقىنىڭ تىلدەرى كۇنى. وسى مەرەكەگە وراي پارلامەنت سەناتىنىڭ توراعاسى ماۋلەن اشىمباەۆ قازاق ەلىن مەرەكەمەن قۇتتىقتادى, دەپ حابارلايدى Egemen.kz.
«بۇگىن – ۇلت ۇستازى احمەت بايتۇرسىن ۇلىنىڭ تۋعان كۇنى. وسى داتاعا وراي ەلىمىزدە 5 قىركۇيەك قازاقستان حالقىنىڭ تىلدەرى كۇنى رەتىندە بەكىتىلگەنى بەلگىلى. بۇل ەلىنىڭ ەركىندىگى جولىندا باسىن بايگەگە تىككەن, تۋعان حالقىنىڭ زامان كوشىنەن قالماۋى ءۇشىن ءتول ءالىپبيىمىزدى جاساپ, وقۋلىقتار جازعان, سول ارقىلى قازاق ءتىلىنىڭ دامۋىنا ولشەۋسىز ۇلەس قوسقان تۇلعاعا دەگەن زور قۇرمەتتىڭ جارقىن كورىنىسى ەكەنى ءسوزسىز.
احمەت بايتۇرسىن ۇلى اقىن, ءتىل جانە ادەبيەت سالاسىنداعى عالىم, ساياساتكەر, پۋبليتسيست, پەداگوگ بولدى. ول وسى باعىتتاردىڭ بارىندە ۇلتتىڭ ءبىلىمىن مولايتۋعا بار كۇش-جىگەرىن جۇمسادى. حالقىنا «قىرىق مىسال» ارقىلى ءۇن قاتىپ, قازاعىن «ماسا» بولىپ وياتۋعا تالپىندى.
قايراتكەر تۇلعا قازاق ءتىل ءبىلىمى مەن ادەبيەتتانۋ عىلىمدارىنىڭ نەگىزىن قالاپ, ماڭىزدى وقۋ قۇرالدارىن جازدى. ونىڭ جەتەكشىلىگىمەن تۇڭعىش جالپىۇلتتىق «قازاق» گازەتى جارىق كورگەنى بارشاعا ايان.
ۇلت ۇستازىنىڭ ساياسي قايراتكەرلىك قىرى دا ءبىر بولەك. احاڭ ۇلت كوسەمى ءاليحان بوكەيحانمەن جانە مىرجاقىپ دۋلات ۇلىمەن بىرگە الاش قوزعالىسىنىڭ الدىڭعى لەگىندە تۇردى. وسىلايشا ۇلتىمىزدى قالامگەرلىگىمەن دە, قايراتكەرلىگىمەن دە ەگەمەندىككە جەتەلەدى.
وسىنداي ارداقتى ارىسىمىزدىڭ ەسىمىن ۇمىتپاۋ, ۇلت ساناسىندا جاڭعىرتىپ وتىرۋ – بارشامىزعا ورتاق مىندەت. سوعان وراي بىلتىر پرەزيدەنتىمىز قاسىم-جومارت كەمەل ۇلى توقاەۆتىڭ تاپسىرماسىمەن ەلىمىزدە احمەت بايتۇرسىن ۇلىنىڭ 150 جىلدىق مەرەيتويى كەڭ كولەمدە اتالىپ وتكەنى بەلگىلى. الداعى ۋاقىتتا دا ءبىرتۋار تۇلعانىڭ مول مۇراسى مەن ونەگەلى ءومىرىن دارىپتەيتىن تىڭ باستامالار ىسكە اسىرىلا بەرەدى. وعان بۇگىنگى اتاۋلى كۇن دە ءوز سەپتىگىن تيگىزەتىنى انىق. ەندەشە ۇلتتىق مۇددەنى كوزدەيتىن تىلدەر كۇنى قۇتتى بولسىن! انا ءتىلىمىزدىڭ اياسى كەڭەيە بەرسىن!» دەلىنگەن م.اشىمباەۆتىڭ قۇتتىقتاۋىندا.