وتكەن اپتانىڭ جۇما كۇنى ريم پاپاسى فرانتسيسك (Franciscus) ۆاتيكان مەن موڭعوليا رەسپۋبليكاسى اراسىندا ديپلوماتيالىق قاتىناس ورناعانىنا 30 جىل تولۋىنا وراي ەل پرەزيدەتى ۋ. حۇرەلسۇحتىڭ شاقىرۋىمەن ۇلانباتىر قالاسىنا كەلدى.
– پاپانىڭ موڭعولياعا رەسمي ساپارى, – دەيدى الەم ءباسپاسوزى: «اتالعان ەلدەگى جەمقورلىق پەن ادىلەتسىزدىكتى اۋىزدىقتاۋ, ەجەلگى كوشپەلى وركەنيەتتەن قالعان جالعىز جۇرناق – موڭعول جۇرتىنىڭ بايىرعى مادەنيەتىن كوزىمەن كورىپ, وي ءتۇيۋ» دەپ جازىپ جاتىر. سونداي-اق عالامدىق دىندەر اراسىندا كاتوليتسيزم سەنىمىنىڭ كوشباسشىسى موڭعولياعا كەلگەن سوڭ ءارتۇرلى ءدىن وكىلدەرىمەن كەزدەسۋ وتكىزىپ, ولاردىڭ دا وي-پىكىرلەرىن تىڭدادى.
وسى ورايدا, ەلدەگى يسلام ءدىنى اتىنان ءسوز العان موڭعوليا مۇسىلماندار ۇيىمىنىڭ توراعاسى, فيلوسوفيا عىلىمدارىنىڭ دوكتورى (PhD) باتىربەك حادىس «اسساليامۋ الەيكۋم ۋا راحماتۋللاحي ۋا باراكاتۋح!» (اللاحتىڭ سىزگە سالەمى ءھام راحمەتى مەن بەرەكەسى بولسىن) دەپ ءسوزىن اللانىڭ سالەمىمەن باستاپ, ءوزىن موڭعوليادا ءومىر ءسۇرىپ جاتقان ءدىنى مۇسىلمان قازاق دەگەن حالىقتىڭ وكىلى ەكەنىن تانىستىرا وتىرىپ: «الەم دەگەنىمىز – ءبىر وتباسى. عالامنىڭ تىنىشتىعى وتباسىنىڭ بەيبىت ومىرىنەن باستالادى. موڭعول حالقىنىڭ «وزىڭدە تۇزە – وتباسىڭدى وڭالت, وتانىڭدى جىرعات» دەگەن ماتەلى بار. بۇل ءسوز كوشپەلىلەردىڭ ومىرلىك ۇستانىمى» دەگەندى جەتكىزىپ, ءسوزىنىڭ سوڭىندا: «ولاردىڭ اللادان وزگە سيىنعاندارىن بوقتاماڭدار. ولار بىلمەي شەكتەن شىعىپ اللاعا ءتىل تيگىزەدى. وسىلايشا ءار توپقا ءوز ىستەرىن ادەمى كورسەتتىك. سونان سوڭ قايتار ورىندارى راببىلارىنا. سوندا ولارعا نە ىستەگەندەرىن بىلدىرەدى» دەپ «انعام» سۇرەسىنىڭ 108-اياتىن وقىپ بەردى.
باتىربەكتىڭ ءسوزىن مۇقيات تىڭداعان (اۋدارماشى ارقىلى) كاتوليك كوسەمى ورتا عاسىردىڭ وزىندە شىڭعىس قاعان استاناسى قاراقورىمدا ەكى مۇسىلمان مەشىتى بولعانىن, ول تۋرالى 1254 جىلى موڭكە حاننىڭ ورداسىنا كەلگەن ەۋروپالىق ساياحاتشى – موناح گيلوم دە رۋبرۋكتىڭ جازباسىندا ايتىلعانى تۋرالى اتاپ ءوتتى.