جۋىردا ۇقك شەكارا اكادەمياسىنىڭ جەكە قۇرامى وقۋعا تۇسكەن كۋرسانتتاردىڭ اسكەري انت قابىلداۋ ءراسىمىن كونستيتۋتسيا كۇنىمەن ورايلاستىرىپ, ايرىقشا اتاپ ءوتتى.
شەكاراشى بولۋدى ارمانداپ, اكادەمياعا وقۋعا تۇسكەن 300-گە جۋىق كۋرسانت شەكارا اكادەمياسىنا قاراستى دالالىق وقۋدى قامتاماسىز ەتۋ باسقارماسىنىڭ ساپتىق الاڭىندا ساپ تۇزەپ, اسكەري انت قابىلدادى. سالتاناتتى ءىس-شاراعا ۇقك توراعاسىنىڭ ورىنباسارى, گەنەرال-مايور مارات قالقاباەۆ پەن اكادەميا باستىعى, پولكوۆنيك پاۆەل پوليۆانوۆ, جەرگىلىكتى باسقارۋ ورگاندارىنىڭ وكىلدەرىمەن قاتار, ەلىمىزدىڭ ءار ايماعىنان كەلگەن كۋرسانتتاردىڭ اتا-انالارى قاتىستى.
شەكارا شەبىندە قالتقىسىز قىزمەت ەتۋدى ماقسات ەتكەن كۋرسانتتاردىڭ كوڭىل تولقىتار ءىس-شاراسى اكادەميانىڭ تاربيەلىك, الەۋمەتتىك-قۇقىقتىق جانە يدەولوگيالىق باسقارماسىنىڭ باستىعى, پولكوۆنيك ا.اليەۆتىڭ اكادەميا باستىعىنا بايانداۋىمەن باستالدى. اسكەري تارتىپكە ساي كوماندير كۋرسانتتارمەن سالەمدەسىپ, ەلىمىزدىڭ مەملەكەتتىك تۋىنىڭ كوتەرىلۋىنە جانە تۋ ۇستاۋشى توپتىڭ ساپ ورتاسىنا ادىم باسۋىنا پارمەن بەردى. بۇدان سوڭ بەلگىلەنگەن ءتارتىپ بويىنشا ەكى قاتارعا ساپ تۇزەگەن كۋرسانتتار وتان الدىندا ادال قىزمەت ەتۋگە انت قابىلداۋ ءراسىمىن باستاپ كەتتى.
وسى كۇنى اسكەري انت قابىلداعان شەكاراشى كۋرسانتتارمەن بىرگە ۇلتتىق قاۋىپسىزدىك كوميتەتى اكادەمياسىنا وقۋعا تۇسكەن 50 كۋرسانت تا قولدارىنا قارۋ الىپ, وتانعا قالتقىسىز قىزمەت ەتۋگە انت قابىلدادى.
وسىدان ەكى اي بۇرىن شەكارا قىزمەتى اكادەمياسىنا قابىلدانعان جاس ساربازدار اكادەميانىڭ مەديتسينالىق جانە پسيحولوگيالىق تەكسەرۋىنەن, دەنە شىنىقتىرۋ دايىندىعىنان نورماتيۆتەر تاپسىرىپ, كەشەندى تەستىلەۋدەن تۇراتىن كونكۋرستىق ىرىكتەۋدەن وتكەن. سونىمەن قاتار, وسى ۋاقىت ارالىعىندا شەكارا قىزمەتىندە قولدانىلاتىن قارۋ-جاراق جانە تەحنيكا تۇرلەرىمەن تانىسقان. قىسقا مەرزىم ىشىندە شەكارا قىزمەتىنىڭ قىر-سىرىنان حاباردار بولعان جاس ساربازدار الداعى وقۋ جىلىنا ءتاستۇيىن دايىن ەكەندىكتەرىن ايقىن اڭعارتتى.
كۋرسانتتار ومىرىندەگى ماڭىزدى ءىس-شارادا العاش بوپ ءسوز العان ۇقك توراعاسىنىڭ ورىنباسارى, گەنەرال-مايور مارات قالقاباەۆ انت قابىلداۋدىڭ ۇلكەن جاۋاپكەرشىلىك ەكەنىنە توقتالا كەلىپ, اسكەري شەن تاققان ءاربىر ازامات ادامي قاسيەتى, جالىنداعان نامىس-جىگەرى, كاسىبيلىگى, بىلىمدىلىگىمەن ەرەكشەلەنىپ تۇراتىنىن اتاپ ايتتى.
اكادەمياعا وقۋعا تۇسكەن بولاشاق وفيتسەرلەردىڭ اتا-انالارى مەن جاقىندارى دا تاريحي ءساتتىڭ كۋاسى بولىپ, وزدەرىنىڭ جۇرەكجاردى لەبىزدەرىن ءبىلدىردى. زاپاستاعى گەنەرال-مايور سەيتجان مەلدەبەك ۇلى ساربازدارعا ساتتىلىك تىلەپ, اق باتاسىن بەردى.
«شەكاراشى بولۋ – مەنىڭ ەڭ ۇلكەن ارمانىم ەدى. ارمانىم ورىندالدى. ەندى وقۋدى جاقسى وقىپ, وتانىما ادال قىزمەت ەتۋگە, ەل ىرگەسىن بەرىك كۇزەتۋگە سەرت بەرەمىن», دەپ كۋرسانتتار اتىنان ءسوز العان ەلامان نارىكباي قارۋلاستارىن انتىنا ادال بولۋعا شاقىردى.
الماتى وبلىسى