بۇل كۇندەرى ازەربايجاننىڭ باس شاھارى – باكۋدە نىسانا كوزدەۋدەن 53-الەم چەمپيوناتى ءوتىپ جاتقانى بەلگىلى. بايراقتى دودانىڭ كەزەكتى جارىس كۇنىندە جەرلەستەرىمىز ۇزدىك ناتيجە كورسەتىپ, الەم چەمپيوناتىنداعى تاريحي جۇلدەگە قول جەتكىزدى.
سپورتتى دامىتۋ ديرەكتسياسى ءباسپاسوز قىزمەتىنىڭ مالىمەتى بويىنشا, ايەلدەر اراسىندا 10 مەتردەن جىلجىمالى نىسانا كوزدەۋدىڭ فينالىنا ەكى جەرلەسىمىز – زۋحرا يرنازاروۆا مەن الەكساندرا سادۋاقاسوۆا شىعىپ, باس جۇلدەنى ساراپقا سالدى. اسا تارتىستى وتكەن فينالدىق سايىستا زۋحرا وتانداسى الەكساندرادان 6:3 ەسەبىمەن باسىم ءتۇسىپ, الەم چەمپيونى اتاندى. ال قولا جۇلدە ۋكراينالىق گالينا اۆرامەنكوعا بۇيىردى.
بۇعان دەيىنگى ەرەسەكتەر اراسىنداعى الەمدىك دودادا ەل سپورتشىلارى بىردە-ءبىر جۇلدە الماعان ەدى. بارلىق جەتىستىك تەك جاسوسپىرىمدەر مەن جاستار دەڭگەيىندە تىركەلگەن. ال كەشە ەل قورجىنىنا بىردەن قوس مەدال ءتۇستى. باكۋدە كۇمىس جۇلدەگە يە بولعان الەكساندرا سادۋاقاسوۆا بىلتىر فرانتسيادا وتكەن جاستار اراسىنداعى الەم چەمپيوناتىندا توپ جارعان بولاتىن.
قازىرگى تاڭدا قازاقستان قۇراماسىنىڭ ەنشىسىندە 3 جۇلدە بار.