ەلوردانىڭ «بارىس» حوككەي كلۋبى رەسەيدىڭ ومبى قالاسىندا ۇيىمداستىرىلعان «بلينوۆ كۋبوگىندە» جەڭىسكە جەتتى.
قۇرلىقتىق حوككەي ليگاسىنىڭ جاڭا ماۋسىمى الدىنداعى ماڭىزدى تۋرنيردە اندرەي سكابەلكا شاكىرتتەرى سوڭعى ويىندا نيجنەكامسكىنىڭ «نەفتەحيميك» كلۋبىمەن شەبەرلىك بايقاسىپ, قارسىلاسىن 3:1 ەسەبىمەن تىزە بۇكتىردى. ەلوردالىق كلۋب ساپىنان ويىنداعى ءۇش شايبانى دا بيىلعى ماۋسىمدا «بارىسقا» قايتا ورالعان شابۋىلشى رومان ستارچەنكو سوعىپ, حەت-تريك اۆتورى اتاندى.
وسىلايشا, جەرلەستەرىمىز ومبىداعى ءتۋرنيردىڭ بارلىق ماتچىندا قارسىلاستارىنان باسىم ءتۇسىپ, «بلينوۆ كۋبوگىنىڭ» باس جۇلدەسىن يەلەندى. ايتا كەتەيىك, «بارىس» قحل-ءدىڭ 2023/2024 جىلعى ماۋسىمىنداعى العاشقى ويىنىن 2 قىركۇيەك كۇنى ءوز ايدىنىندا وفەنىڭ «سالاۆات يۋلاەۆ» كومانداسىمەن وتكىزەدى.