مەملەكەتتىك باسقارۋ جۇيەسى ءۇشىن تالانتتى جاستاردى انىقتاۋ جانە تارتۋ ماقساتىندا پرەزيدەنتتىك جاستار كادر رەزەرۆىنە كەزەكتى ءۇشىنشى ىرىكتەۋ وتكىزىلەدى, دەپ حابارلايدى Egemen.kz ىشكى ىستەر مينيسترلىگىنە سىلتەمە جاساپ.
ىرىكتەۋگە وتىنىمدەردى قابىلداۋ 1 قىركۇيەكتەن باستاپ pkrezerv.gov.kz سايتىندا قولجەتىمدى بولادى. وتىنىمدەر 30 قىركۇيەككە دەيىن قابىلدانادى.
ىرىكتەۋگە جاسى 35-تەن اسپاعان, جوعارى ءبىلىمى جانە 5 جىل جالپى جۇمىس تاجىريبەسى بار, قازاق ءتىلىن مەڭگەرگەن (ۆ1 دەڭگەيىنەن تومەن ەمەس) قازاقستان رەسپۋبليكاسىنىڭ ازاماتى قاتىسا الادى.
بيىل ىرىكتەۋ كەلەسى باعىتتار بويىنشا جۇرگىزىلەدى:
ينفراقۇرىلىمدى, ونەركاسىپتى دامىتۋ جانە ساۋدا ساياساتى; اگروونەركاسىپتىك كەشەن جانە قورشاعان ورتانى قورعاۋ; سىرتقى ساياسات جانە ينۆەستيتسيالار; ەكونوميكالىق جانە قارجىلىق ساياسات; تسيفرلاندىرۋ; الەۋمەتتىك ساياسات جانە ازاماتتىق قوعام;.ىرىكتەۋ 6 كەزەڭ بويىنشا وتكىزىلەدى:
قۇجاتتاردى قابىلداۋ; ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ; سيتۋاتسيالىق تاپسىرمالاردى شەشۋ; قۇزىرەتتەردى باعالاۋ (Assessment center جانە HR-سۇحبات); ساراپشىلىق كوميسسيادا اڭگىمەلەسۋ; ۇلتتىق كوميسسيا وتىرىسى.ىرىكتەۋ قورىتىندىسى بويىنشا 50 كانديدات رەزەرۆكە الىنادى. جەڭىمپازدار 2023 جىلدىڭ جەلتوقسانىندا جاريالانادى.