قازاقستاندا تامىزدىڭ العاشقى جەكسەنبى كۇنى وتاندىق كولىك سالاسىنىڭ قىزمەتكەرلەرى وزدەرىنىڭ كاسىبي مەرەكەلەرىن اتاپ وتەدى. وسىعان بايلانىستى قر يندۋستريا جانە ينفراقۇرىلىمدىق دامۋ مينيسترلىگىندە سالتاناتتى ءىس-شارا ۇيىمداستىرىلىپ, ەرەن ەڭبەگىمەن كوزگە تۇسكەن سالا ماماندارىنا قۇرمەت كورسەتىلدى, دەپ حابارلايدى Egemen.kz.
كاسىبي مەرەكەنىڭ قارساڭىندا قازاقستاننىڭ كولىك سالاسىنىڭ وكىلدەرىن ۆەدومستۆو باسشىسى قۇتتىقتاپ, قالتقىسىز قىزمەت ەتكەن جاندارعا مەملەكەتتىك ناگرادالاردى, سونداي-اق مينيسترلىكتىڭ اتىنان قۇرمەت گراموتالار مەن العىس حاتتاردى تابىستادى.
مينيستر ايتقانداي, جول ەكونوميكانىڭ كۇرەتامىرى سانالادى. ال ونىڭ بويىنا قان تاراتىپ, سالانىڭ دامىل تاپپاي دامۋىنا اتسالىساتىن بىردەن-ءبىر تۇلعالار - كولىك سەكتورىنىڭ ماماندارى. سوندىقتان دا ستراتەگيالىق تۇرعىدا ماڭىزدى باعىتتىڭ ۇزدىكسىز جۇمىسىن قامتاماسىز ەتىپ وتىرعان ازاماتتاردىڭ ەڭبەگى قاشان دا قۇرمەتكە لايىق.
«بيىل كولىك باقىلاۋ ينسپەكتسياسىنىڭ قۇرىلعانىنا 30 جىل تولدى. ەگەمەندىك كەزەڭىنەن باستاپ, ەلىمىزدىڭ كولىك سالاسىندا قىرۋار جۇمىس اتقارىلدى. ايتالىق, قازاقستان وڭىرلىك لوگيستيكالىق حاب پەن ترانزيتتىك الەۋەتى دامىعان ەلگە اينالدى.
قازىر اتالعان سالادا 400 مىڭنان استام ادام جۇمىسپەن قامتىلىپ, كولىك سەكتورى ەكونوميكانىڭ قوزعاۋشى كۇشىنە اينالىپ وتىر. بۇگىن كولىك باقىلاۋ سالاسى جاڭا 18 جىلجىمالى باقىلاۋ بەكەتىمەن تولىقتىرىلدى. بۇل ءوز كەزەگىندە اۆتوجولداردى قالىپتى دەڭگەيدە ساقتاپ, بەلگىلەنگەن تالاپتاردىڭ ورىندالۋىن باقىلاۋعا مۇمكىندىك بەرەدى», دەدى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ.
سالتاناتتى جيىندا يدم باسشىسى بىرقاتار ازاماتتى ارنايى ناگرادامەن ماراپاتتادى. اتاپ ايتقاندا, «ەڭبەك ارداگەرى» مەدالى جۇماباي سابيەۆ پەن باۋرجان اشىموۆكە تابىستالدى. سونىمەن قاتار «قۇرمەتتى تەمىرجولشى» بەلگىسى ارنۇر دىناحمەت جانە دانيار نۋرەكەشوۆكە بەرىلدى. «قۇرمەتتى اۆتوكولىكشى» توسبەلگىسىمەن حازماحامەت تۋمگۋەۆ پەن جۇمابەك يساتاەۆ ناگرادتالدى. ال «ۇزدىك اۆتوكولىكشى» توسبەلگىسىنە بورانباي تولەگەنوۆ جانە نۇرلان سارسەنبەكوۆ يە بولدى. بۇدان بولەك ەكى قىزمەتكەر ءمينيستردىڭ قۇرمەت گراموتاسى مەن ءۇش ادام العىس حاتپەن ماراپاتتالعانىن ايتا كەتۋ كەرەك.