شىعىس قازاقستان وبلىسى التاي اۋدانىنداعى بۇقتىرما سۋ قويماسىندا سۋعا باتىپ كەتە جازداعان 13 جاسار بالا قۇتقارىلدى, دەپ حابارلايدى Egemen.kz.
التاي اۋدانى وكتيابر كەنتىندەگى №20 ءورت ءسوندىرۋ ءبولىمى باستىعىنىڭ ورىنباسارى ەلامان نۋكۋشەۆ قىزمەتتەن بوس ۋاقىتىندا بۇقتىرما سۋ قويماسىنا دەمالۋعا بارعان. ءبىر كەزدە سول ماڭايدان ايقايلاعان داۋىستاردى ەستىگەن.
«سەمەي قالاسىنان دەمالۋعا كەلگەن 13 جاسار جەتكىنشەك باسقا بالالارمەن سۋدا ويناپ جۇرگەندە كەنەتتەن كوتەرىلگەن تولقىننىڭ استىندا قالىپ قويعان. تۋىستارى جۇزە المايتىندىقتان كومەك سۇراپ, قاتتى ايقايلاي باستادى. ە. نۋكۋشەۆ ەش ويلانباستان سۋعا سەكىرىپ, باتىپ بارا جاتقان بالاعا جەتىپ, امان الىپ قالدى», دەلىنگەن شقو تج دەپارتامەنتىنىڭ اقپاراتىندا.
ازاماتتىق قورعاۋ ورگاندارىندا 2014 جىلدان بەرى جۇمىس ىستەيتىن ەلامان نۋكۋشەۆتىڭ ادامدى اجالدان اراشالاۋى العاش رەت ەمەس. ول 2022 جىلى وكتيابرسكي اۋىلىندا بولعان ءورت كەزىندە ەگدە جاستاعى ايەل ادامدى قۇتقارىپ قالعان ەكەن.