تاۋەلسىزدىك سارايىنىڭ “قولدانبالى ونەر, ەتنوگرافيا, ارحەولوگيا جانە انتروپولوگيا” گالەرەياسىندا “بابا مۇراسى – بۇگىنگى ۇرپاققا” اتتى كورمە اشىلدى.
اتالمىش كورمەگە قازاقتىڭ عۇلاما عالىمى الكەي مارعۇلاننىڭ كيگەن كيىمدەرى مەن ۇستاعان زاتتارى, عىلىمي ەڭبەكتەرى مەن قولجازبالارى, ءوزى زەرتتەگەن قۇلپىتاس پەن تاس مۇسىندەرىنىڭ كوشىرمەلەرى جانە ارحەولوگيالىق زەرتتەۋلەرى بارىسىندا تابىلعان ەجەلگى قۇمىرالاردىڭ تۇرلەرى قويىلعان. مۇنداي قۇندى جادىگەرلەر مەن ءمانى تەرەڭ دۇنيەلەردىڭ كورمەگە قويىلۋىنا استانا قالاسىنداعى ءا.مارعۇلان اتىنداعى №40 ورتا مەكتەبىنىڭ مۇراجايى كوپ ەڭبەك سىڭىرگەن ەكەن.
“بۇل كورمەنى ۇيىمداستىرۋداعى باستى ماقساتىمىزدىڭ ءبىرى – ءبۇگىنگى وسكەلەڭ ۇرپاقتى ءوتانسۇيگىشتىككە تاربيەلەۋ, ولاردىڭ بويىنداعى ۇلتتىق قۇندىلىقتاردى قالىپتاستىرۋ. وقۋشىلاردىڭ ۇلت تاريحىنداعى اسا كورنەكتى تۇلعاعا دەگەن وي-ورىستەرىن كەڭەيتۋ, كورنەكتى عالىمنىڭ ەڭبەك جولىمەن تانىستىرۋ ارقىلى بالالاردى جىگەرلەندىرۋ” – دەيدى “قولدانبالى ونەر, ەتنوگرافيا, ارحەولوگيا جانە انتروپولوگيا” گالەرەياسىنىڭ مەڭگەرۋشىسى تىلەۋكەش جاۋباسوۆا.
“اكادەميك ءا.ح.مارعۇلان – جان-جاقتى تەرەڭ ءبىلىم جيناقتاعان, قازاق حالقىنىڭ رۋحاني مادەني مۇراسىن زەرتتەۋشى” – دەپ يمانعالي تاسماعامبەتوۆ ايتقانداي, قازاق حالقىنىڭ كەمەلدەنۋىنە الكەي مارعۇلاننىڭ قوسقان ۇلەسى مول. عىلىم الەمىنە ءوزىنىڭ سىڭىرگەن ادال ەڭبەگىنىڭ ارقاسىندا ءا.مارعۇلان قازاقتى وزگە حالىققا تانىتتى.
ءبىر ايتا كەتەتىن نارسە, بۇل كورمەنىڭ ەكىنشى بولىگى مەكتەپ وقۋشىلارىنىڭ شىعارماشىلىعىنا ارنالعان. ءجۇز جىلدىق تاريحى بار جامبىل جاباەۆ اتىنداعى №4 مەكتەپ گيمنازياسىنداعى “حالىقتىق پەداگوگيكا” اتتى مەكتەپ مۇراجايى تاريحي-ەتنوگرافيالىق ءجادىگەرلەردى, عالي ورمانوۆ اتىنداعى №7 مەكتەپ گيمنازياسىنداعى “بالاۋسا” كلۋبىنىڭ قولونەر شەبەرلەرى ءوز جۇمىستارىن كورەرمەندەر نازارىنا ۇسىندى. سونىمەن قاتار, قازاق ۇلتتىق ونەر ۋنيۆەرسيتەتىنىڭ جاس جەتكىنشەكتەرى قازاقتىڭ ۇلتتىق مۋزىكا اسپاپتارىندا ونەر كورسەتىپ, كورمەنىڭ ءىشىن ەرەكشە ءبىر مەرەكەلىك كوڭىل-كۇيگە بولەدى.
اراي ۇيرەنىشبەكقىزى.