اۋىلداردا ءموبيلدى قوعامدىق كەڭىستىكتەر ۇيىمداستىرىلادى. ولار تۇركىستان, اتىراۋ وبلىستارىنىڭ اۋىلدارىندا, سونداي-اق الماتى قالاسىنىڭ ماڭىنداعى اۋدانداردا جۇمىس ىستەمەك. ىلكىمدى ءىس اقپارات جانە قوعامدىق دامۋ مينيسترلىگىنىڭ قولداۋىمەن «جاستار كەڭىستىگى» جوباسى ىسكە اسىرىلىپ جاتىر.
ءىس-شارا شەڭبەرىندە «الەۋمەتتىك جوبالار قورى» كق ءموبيلدى قوعامدىق كەڭىستىكتەردى قۇرادى ءارى وتباسىلىق تانىمدىق دەمالىستى ۇيىمداستىرىپ, دارىپتەيدى.
– جوبا اياسىندا ءبىز اۋىل جاستارىنا ەرەكشە كوڭىل بولەمىز. جاستاردىڭ وبلىس ورتالىقتارىنا جەتۋىنە قيىندىق كەلتىرمەۋ ءۇشىن ءبىزدىڭ جاتتىقتىرۋشىلار وڭىرلەردى وزدەرى ارالايتىن بولادى. اۋىلداردا ءبىز جاستاردى موبيلوگرافيا, سمم, اكتەرلىك شەبەرلىك سياقتى سۇرانىسقا يە ماماندىقتارعا, سونداي-اق العاشقى مەديتسينالىق كومەك كورسەتۋ داعدىلارىنا وقىتامىز. جالپىلاي العاندا, تۇركىستان جانە اتىراۋ وبلىستارىنا قاراستى 10 اۋىلدىڭ 200-دەن استام جاس تۇرعىنىن وقىتۋ كۋرستارىمەن قامتۋدى جوسپارلاپ وتىرمىز, – دەدى جوبا جەتەكشىسى ەربول كەڭگەرباەۆ.
قىسقامەرزىمدى وقىتۋ كۋرستارىنان العاشقى بولىپ اتىراۋ وبلىسى قىزىلقوعا اۋدانىنا قاراستى ميالى اۋىلىنىڭ جاستارى ءوتىپتى. ال وتباسىلىق مادەني دەمالىستى ناسيحاتتاۋ ماقساتىندا قوعام بەلسەندىلەرى بالالار مەن جاسوسپىرىمدەرگە ارنالعان ءتۇرلى ۇيىرمە ۇيىمداستىرىپ جاتىر.
– ءبىز ەسكى وتباسىلىق داستۇرلەردى جانداندىرعىمىز كەلەدى. بارلىق وتباسى مۇشەسىن اۋلالاردى اباتتاندىرۋ, ۇيا سالۋ سىندى قاراپايىم دۇنيەلەردەن باستاپ, اۋقىمدى ءىس-شارالارعا قاتىستىرماقپىز. ۋاقىتتى وسىلايشا بىرلەسە وتكىزۋ وتباسى ينستيتۋتىن دامىتۋعا وڭتايلى اسەر ەتەدى. ءبىر جاعىنان جانۇياداعى ءار ادامنىڭ ەكولوگيالىق ساۋاتتارىن اشۋعا ۇلەس قوسامىز. بۇل وتباسىلىق مادەني دەمالىستىڭ دامۋىنا ىقپال ەتەدى دەپ سەنەمىز. سونداي-اق ءبىز «مۋزەي ءتۇنى», كينو كەشتەرى سياقتى ءىس-شارالاردى وتكىزەمىز. قاتىسۋشىلاردا سىني ويلاۋدى جەتىلدىرۋ ماقساتىندا پىكىرسايىس ۇيىرمەلەرىن, قارجىلىق ساۋاتتىلىقتى ارتتىرۋ جانە «جاستارعا بيزنەس» الەۋمەتتىك بەيىمدەلۋ جونىندەگى ءىس-شارالاردى وتكىزەمىز. جالپى ايتا كەتسەم, «جاستار كەڭىستىگى» جوباسى 2024 جىلدىڭ سوڭىندا اياقتالادى, – دەدى جوبا جەتەكشىسى.