ءدىنتانۋشى توعجان عالىموۆا قازىرگى تاڭدا قولعا قارۋ الىپ سوعىسۋ ەسكىرگەن ادىستەردىڭ قاتارىندا ەكەنىن ايتتى. ادام ساناسىنا وزگە يدەولوگيانى ءسىڭىرۋ ءۇشىن قوعام اراسىنا شىعىپ ۇگىت-ناسيحات جاساۋدىڭ دا قاجەتى جوق. قاشىقتان وتىرىپ وزگە كۇشتەردى پايدالانا وتىرىپ ارام پيعىلدى ىسكە اسىرىپ, قىلمىسقا يتەرمەلەۋگە بولادى. بۇنداي تەرىس ارەكەتتەردىڭ بارلىعى عالامتوردىڭ كومەگىمەن جۇزەگە اسىرىلادى.
الەۋمەتتىك جەلى - قارماققا ءىلۋدىڭ ەڭ قولايلى ءارى ءتيىمدى قۇرالى. قازىر ەڭبەكتەگەن بالادان, ەڭكەيگەن قارياعا دەيىن وسى عالامتور كوزىن پايدالانادى. قازىرگى تاڭدا الەمدە ينتەرنەتتى پايدالانۋشىلىر سانى 4 جارىم ميلليارد ادامدى قۇراسا, قازاقستاندا 18 ميلليونعا جۋىق ادام عالامتوردا وتىرادى. بۇل دەسترۋكتيۆتى ءدىني اعىم وكىلدەرى ءۇشىن مۇمكىندىك جوعارى ەكەنىن اڭعارامىز.
دەسترۋكتيۆتى ۇيىمداردىڭ وكىلدەرى الەۋمەتتىك جەلىلەردە ءتۇرلى جولدارمەن ءوز كۋلتتەرىن ناسيحاتتايدى. دەسترۋكتيۆتى سيپاتتاعى تىيىم سالىنعان ماتەريالدارى بار ءوز ادەبيەتتەرىن, اۋديوجازبا, جازبالارىن, ماقالالارىن جاريالاپ, قالاۋلارى بويىنشا توپ اشىپ, ادامدارمەن تىكەلەي بايلانىسقا شىعا الادى. ارينە مەملەكەت تاراپىنان تىيىم سالىنعان توپتاردى جويىپ, دەر كەزىندە وشىرۋگە بارىنشا تىرىسادى. بىراق ينتەرنەتتىڭ قارقىندى جۇمىس جاساۋىنا بايلانىستى, سونىمەن قاتار مىڭداعان ادامدارعا قولجەتىمدى دۇنيە بولعاندىقتان بارلىق دەسترۋكتيۆتى باعىتتاعى اككاۋنتتاردى جويىپ جىبەرۋ مۇمكىن ەمەس. سوندىقتان ينتەرنەتتەن ءدىني اقپارات العاندا تەك سەنىمدى كوزدەردەن الۋ كەرەك.
قازىر تەكسەرىلمەگەن ءدىني اقپاراتتاردى ءاربىر ادامنىڭ الەۋمەتتىك جەلىدەگى جەكە پاراقشاسىنا سىلتەمە تۇرىندە نەمەسە پوچتاعا سپام تۇرىندە جىبەرۋگە مۇمكىندىك بار. يسلام, پايعامبارلار تاريحي, توزاق وتىنان ساقتان, اقىرەتتىڭ ازابى, يسلامداعى ماحاببات سىندى قىزىقتى تاقىرىپتاردىڭ استارىندا قانداي پوستتار جازىلعانىن, ونى قانداي ادام جازىپ وتىرعانىن ەشكىم بىلمەيدى.
ستاتيستيكالىق مالىمەتتەرگە سۇيەنەر بولساق, دەسترۋكتيۆتى ءدىني اعىم وكىلدەرىنىڭ ىقپالىنا كەتەتىندەردىڭ 88%-نا وسى الەۋمەتتىك جەلىلەر تىكەلەي ىقپال ەتىپ وتىر. ال 70% ادام ءوزىنىڭ ءدىني ساۋاتىن ينتەرنەت اشادى ەكەن. بۇدان شىعاتىن قورىتىندى, كريتيكالىق ويلاۋ جۇيەسى قالىپتاسپاعان, پسيحولوگيالىق ءالسىز نەمەسە ومىرىندە كەز-كەلگەن پروبلەماسى بار ادام جاھاندىق اقپاراتتىق-كوممۋنيكاتسيانىڭ كەسىرىنەن ءتۇزۋ جولدان اداسىپ كەتەرى ءسوزسىز. اسىرەسە بۇل قاتاردا جاستاردىڭ ۇلەسى باسىم. راديكالدى اعىمدار كوبىنەسە «Facebook», «ۆكونتاكتە», «Tapatalk», «ودنوكلاسسنيكي», «Instagram», «Telegram», «Tik-tok» الەۋمەتتىك جەلىلەرىن قولدانادى. سەبەبى بۇل جەلىلەر جاستار اراسىندا قولدانىسقا يە.
ءدىني راديكالدى توپ وكىلدەرى ادام ساناسىنا اسەر ەتەتىن بارلىق دەرلىك پسيحولوگيالىق ادىستەر مەن زاماناۋي مۇمكىندىكتەردى جەتىك مەڭگەرگەن: ءارتۇرلى ونلاين فورۋمدار, ويىندار, جاستاردى قىزىقتىراتىن پودكاستار جانە جابىق چاتتار. كۇننەن كۇنگە وزدەرى جاسايتىن كونتەنتتىڭ ساپاسى مەن سانىنا دا نازار اۋداراتىندىعىنا زەرتتەۋ كەزىندە كوزىمىز جەتۋدە.
ءتۇزۋ جولدان جاڭىلاتىنداردىڭ كوپشىلىگى - جۇمىسسىز جاستار. سول سەبەپتى الەۋمەتتىك جەلىدە اقشا تابۋعا ۇمتىلاتىن جاستار سانى ارتىپ جاتىر. ۆيرتۋالدى الەمنىڭ مۇمكىندىگىن پايدالانار الدىندا كىمگە جانە قانداي ماقساتتا جۇمىس جاساپ جاتقانىن ادامدار ۇمىتپاعان ءجون. مىسالى, ينتەرنەتتە ۆيرتۋالدى قاجىلىق جاساۋ, ونلاين تۇردە جاماعاتپەن قۇلشىلىق ءراسىمىن ورىنداۋ, ءبىلىمىن ونلاين ارتتىرۋ سياقتى ءتۇرلى قىزمەت تۇرلەرى بار. كەيدە ويلاۋ جۇيەسى دامىعان ادام ءۇشىن ميعا قونىمسىز زاتتار, ەكىنشى ادام ءۇشىن دۇرىس سياقتى كورىنۋى مۇمكىن.
ءسوز سوڭىندا, عالامتوردان اقپارات العاندا بارىنشا ساق بولۋعا شاقىرامىن. قانداي دا ءبىر كۇدىكتى دۇنيە بايقاساڭىز سۇراق قويىپ, ناقتىلاپ, بارىنشا اباي بولعان ءجون.