قىزىلوردالىق جاستار 5 جىلدا 11 وتباسىعا باسپانا سىيلادى. وعان قاجەتتى جەر تەلىمىن جەرگىلىكتى اكىمدىك ۇلەستىرىپ بەرگەن. وسىلايشا, ماقسات پەن مۇددەسى ءبىر 150-گە جۋىق ازامات ەلدىڭ ءوسىپ-وركەندەۋىنە وزىنشە ۇلەس قوسىپ جاتىر.
«جاڭارعان جاڭاقورعان جاستارى» ەرىكتىلەر توبى 2019 جىلى «جاستار جىلى» اياسىندا قىزىلوردا وبلىسىنىڭ ادىلەت دەپارتامەنتىنەن رەسمي تىركەۋدەن وتكەن. الايدا جۇرەگى جومارت جاندار جۇمىسىن 2016 جىلى كومەككە ءزارۋ جاندارعا ازىق-ت ۇلىك, كيىم-كەشەك تاراتۋدان باستاعان. ۆولونتەرلەر قۇرامىندا اعا بۋىن وكىلدەرى دە, كاسىپكەرلەر مەن سان سالانى يگەرگەن ماماندار دا بار. ولاردى بىرىكتىرگەن ءبىر عانا يدەيا. ول – «مەملەكەت ماعان نە بەرەدى؟» دەگەن ماسىلدىق پسيحولوگيادان ارىلىپ, «مەن ەلىم ءۇشىن نە جاساي الامىن؟» دەگەن ومىرلىك ۇستانىم.
– 2018 جىلى اقزيلا دەگەن كىسىگە ءۇي سالىپ بەردىك. كۇيەۋى ومىردەن وتكەن, قىزى مەن ونىڭ مۇمكىندىگى شەكتەۋلى بالاسى ۇشەۋى بىرگە پالاتكادا تۇرىپ جاتقان. باسپاناعا ءزارۋ ەكەنىن الەۋمەتتىك جەلىدەن بىلدىك. بۇل كىسىلەردىڭ ءوز باسپاناسىنا كىرگەندەگى قۋانىشىن كورسەڭىز! قۇرىلىستى ءبىتىرىپ, ۇيگە كىرگەنگە دەيىن بارلىق وتباسى ءۇشىن جاڭالىقتى قۇپيا ۇستايمىز. قايىرىمدىلىق قورجىنى جەرگىلىكتى كاسىپكەرلەردىڭ قولداۋىمەن تولىعادى. ال ءۇيدى ەرىكتىلەر اسار ادىسىمەن سالادى. ءار باسپانا تەلەديدار, جيھاز, كىلەم, كورپە-توسەكپەن بىرگە بەرىلەدى. تىگىنشى قىز-كەلىنشەكتەر پەردەسىنە دەيىن تىگىپ كومەكتەسەدى, – دەدى قوعامدىق بىرلەستىك جەتەكشىسى ەركىنبەك ايناقوجاەۆ.
بۇگىندە اۋدان اكىمدىگىنىڭ قولداۋىمەن جاستار رەسۋرستىق ورتالىعىنان ارنايى بولمە دە بەرىلىپتى. ولاردىڭ نەگىزگى اتقاراتىن 4 باعىتى بار: ءبىلىم, قايىرىمدىلىق, رۋحانيات, سپورت جانە ونەر. بىراق باسىمدىقتى تۇرمىسى تومەن وتباسى مۇشەلەرىن جۇمىسپەن قامتۋ, باسپانا تۇرعىزۋ, كاسىپكە باۋلۋ, تەگىن كيىم-كەشەك ۇلەستىرۋ, ازىق-ت ۇلىكپەن قامتاماسىز ەتۋگە ارنايدى. سونداي-اق ەرىكتىلەر بالالاردىڭ بوس ۋاقىتىن ءتيىمدى وتكىزۋ ءۇشىن 2 بالالار ويىن الاڭقايىن سالعان.
قايىرىمدىلىق باعىتىندا «قارماق» جوباسىن دا ىسكە اسىرىلىپ جاتىر. بۇل جوبا شىعىستىڭ «قارنى اشقان ادامعا بالىق بەر مە, قارماق بەر» دەگەن ناقىلىنان تۋىنداعان. ياعني الەۋمەتتىك جاعىنان از قامتىلعان وتباسى مۇشەلەرىن كاسىپكە باۋلۋ ماقساتىندا ماستەر-كلاسستار وتكىزىلىپ, كەرەكتى قۇرال-جابدىقتارىن الىپ بەرەدى. ال ءبىلىم باعىتى بويىنشا جاستارعا ارنالعان ءتۇرلى سەمينارلار, ينتەللەكتۋالدى ويىندار تۇراقتى وتكىزىلەتىن كورىنەدى. ماسەلەن, بىلتىر جەلتوقسان ايىندا مەكتەپ وقۋشىلارى اراسىندا «ينتەللەكتۋالدى ۇلت» سايىسى جانە «كايدزەن ۇزدىكسىز دامۋدىڭ قۇپياسى» كىتابىنىڭ اۆتورى عاني بايعالي ۇلىنىڭ جاس كاسىپكەرلەرگە ارنالعان تەگىن سەمينار-ترەنينگىن ۇيىمداستىرعان.
جومارت جاندار وڭىرلەردە بولعان توتەنشە جاعدايلار كەزىندە دە قاراپ قالماي, كومەك قولىن سوزىپ, ازىق-ت ۇلىك, كيىم-كەشەك, گيگيەنالىق زاتتار مەن قارجىلاي قولداۋ كورسەتىپ, يگىلىكتى ىستەرمەن دە ۇزدىكسىز اينالىسىپ كەلەدى.