قازاقستان پرەزيدەنتى قاسىم-جومارت توقاەۆ ساۋد ارابياسىندا ءوتىپ جاتقان «ورتالىق ازيا + شىعاناقتاعى اراب مەملەكەتتەرىنىڭ ىنتىماقتاستىق كەڭەسى» ءبىرىنشى سامميتىنە قاتىسىپ, ءسوز سويلەدى, دەپ حابارلايدى Egemen.kz اقورداعا سىلتەمە جاساپ.
سامميت بارىسىندا مەملەكەت باسشىسى ينۆەستيتسيالىق ىنتىماقتاستىقتى جانداندىرۋ قاجەت ەكەنىن نازارعا سالدى. پرەزيدەنتتىڭ ايتۋىنشا, قازاقستان ينۆەستيتسيالىق بايلانىستاردى ودان ءارى ارتتىرۋعا مۇددەلى.
«UNCTAD بايانداماسىنا سايكەس, وتكەن جىلى عانا ورتالىق ازياعا تازا ينۆەستيتسيالار اعىنى 40%-عا ارتىپ, 10 ملرد دوللاردى قۇرادى, ونىڭ 60%-ى قازاقستانعا تيەسىلى. تاۋەلسىزدىك جىلدارى شىعاناق ەلدەرى قازاقستان ەكونوميكاسىنا شامامەن 3,6 ملرد دوللار سالدى. سوندىقتان ءبىز ينۆەستيتسيالىق بايلانىستاردى ارتتىرۋعا مۇددەلىمىز», دەدى قاسىم-جومارت كەمەل ۇلى.
وسى تۇستا مەملەكەت باسشىسى قازاقستاندا ەكونوميكانى ارتاراپتاندىرۋعا, ونىڭ ىشىندە شەتەلدىك كاپيتال سالىمدارى ءۇشىن نەعۇرلىم قولايلى جاعداي جاساۋعا باعىتتالعان اۋقىمدى ەكونوميكالىق رەفورمالار جۇرگىزىلىپ جاتقانىن تىلگە تيەك ەتتى.
«ايتا كەتسەم, جاقىندا قازاقستان مەن ساۋد ارابياسى قۇرعان ىسكەرلىك كەڭەس ەكى ەلدىڭ ساۋدا جانە ينۆەستيتسيالىق الەۋەتىن ىسكە اسىرۋ ءۇشىن ماڭىزدى الاڭ بولۋعا ارنالعان. ءبىز ىنتىماقتاستىق كەڭەسىنىڭ بارلىق مۇشە مەملەكەتتەرىمەن ىنتىماقتاستىقتىڭ ۇقساس تەتىكتەرىن ىسكە قوسۋعا دايىنبىز», دەدى مەملەكەت باسشىسى.
وسىعان وراي پرەزيدەنت قازاقستان ارىپتەستەرىن «استانا» حالىقارالىق قارجى ورتالىعىنىڭ وزىق قۇرالدارىن بەلسەندى پايدالانۋعا شاقىردى.