بيىلعى وقۋ جىلىندا ءتۇرلى ماماندىقتار بويىنشا م.ح.دۋلاتي اتىنداعى تاراز وڭىرلىك ۋنيۆەرسيتەتىن 4 255 ستۋدەنت ءتامامدادى. ولاردىڭ 4 037-ءسى باكالاۆرياتتى, 202-ءسى ماگيستراتۋرانى, 16-سى PhD ءبىلىم باعدارلاماسىن اياقتاپ وتىر.
وسىناۋ ىرگەلى وقۋ ورداسىن بىتىرگەن ءبىرشاما ۇزدىك تۇلەكتەر ءوڭىر باسشىسى نۇرجان نۇرجىگىتوۆتىڭ قولىنان ديپلوم الدى. ولاردىڭ قاتارىندا ونەر مەن ءبىلىم سالاسىندا, سپورتتا اۋىز تولتىرىپ ايتارلىقتاي تابىسقا قول جەتكىزگەن مىقتىلار دا بار.
ۋنيۆەرسيتەتتى ۇزدىك اياقتاعانداردى عىلىم جانە جوعارى ءبىلىم ءمينيسترى ساياسات نۇربەك ونلاين رەجىمدە قۇتتىقتاپ, اق جول تىلەدى. بۇل كۇنى وقۋ ورداسىن ۇزدىك بىتىرگەن ەكى جۇزدەن استام تۇلەك سالتاناتتى جاعدايدا ديپلوم الدى.
ءىس-شارا بارىسىندا ءسوز العان م. ح. دۋلاتي اتىنداعى تاراز وڭىرلىك ۋنيۆەرسيتەتىنىڭ رەكتورى مۇحتار بايجۇمانوۆ وقۋ ورداسى سان سالانى مەڭگەرگەن ءتورت مىڭنان استام ماماندى ەڭبەك نارىعىنا قوسقالى وتىرعانىن جەتكىزدى.
سونداي-اق ول ءوز سوزىندە وقۋ ورنى كادر دايارلاۋدا حالىقارالىق بايلانىستاردى نىعايتىپ وتىرعانىن, «قوس ديپلومدى» ءبىلىم بەرۋ باعدارلاماسىنىڭ شەڭبەرىندە د.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتى جانە «قازفوسفات» جشس-مەن بىرلەسكەن تمد ەلدەرى بويىنشا العاشقى جەلىلىك كامپۋس جاقىن كۇندەرى ىسكە قوسىلاتىنىن اتاپ ءوتتى.