بۇگىن كەشكە استانا اسپانىندا مەرەكەلىك شوۋ كورسەتىلەدى. بۇل تۋرالى پروديۋسەر ءداۋىت شايحيسلاموۆ الەۋمەتتىك جەلىدەگى پاراقشاسىندا حابارلادى, دەپ جازادى Egemen.kz.
«تۋعان كۇنىڭمەن, استانا!
ەلوردا اكىمدىگىنىڭ قولداۋىمەن, شىعارماشىلىق توپ, كاسىبي ۇشقىشتار جانە انيماتسيالىق سۋرەتشىلەرمەن بىرگە استانا تۇرعىندارى مەن قوناقتارى ءۇشىن مەرەكەلىك توسىن سىي ازىرلەدىك.
بۇل ناعىز اۋەدەگى سيقىر بولماق!
درون-شوۋ – اسەرلى قويىلىم, زاماناۋي ونەر مەن تەحنولوگيالاردىڭ بىرلەسۋى.
بارشاڭىزعا مەرەكە قۇتتى بولسىن! بەيبىتشىلىك پەن جاقسىلىق تىلەيمىز!
بۇگىن كەشكە تاۋەلسىزدىك داڭعىلىنداعى «قازاق ەلى» الاڭىندا كۇتەمىز», دەپ جازدى پروديۋسەر.
قالا اكىمدىگىنىڭ رەسمي سايتى شوۋ ساعات 22:30-دا باستالاتىنىن حابارلادى. 500 درون تۇنگى اسپاندا ەلوردانىڭ كورنەكتى نىساندارى مەن باسقا دا كەسكىندەردى سۋرەتتەيدى. باعدارلاما شامامەن 12 مينۋتقا سوزىلادى. ايتا كەتسەك, شوۋ دەمەۋشىلىك قاراجات ەسەبىنەن ۇيىمداستىرىلادى.