قىزىلوردا قالاسىندا «قازاقستاندا جدو-نىڭ جەلىلەرىن دامىتۋ» تاقىرىبىندا دەنساۋلىق ساقتاۋ باسقارمالارى مەن جاستار دەنساۋلىعى ورتالىقتارى وكىلدەرىنىڭ باسىن قوسقان رەسپۋبليكالىق سەمينار-كەڭەس ءوتتى. قوعامدىق دەنساۋلىق ساقتاۋ ۇلتتىق ورتالىعى مەن وبلىستىق دەنساۋلىق ساقتاۋ باسقارماسى بىرلەسە ۇيىمداستىرعان ءىس-شارادا جاستار دەنساۋلىق ورتالىقتارىنا ۇيىمداستىرۋشىلىق-ادىستەمەلىك كومەك كورسەتۋ, الدا تۇرعان ماسەلەلەر تالقىلانىپ, جۇمىس بارىسىنداعى تاجىريبەلەر تانىستىرىلدى.
سەميناردىڭ العاشقى كۇنى قاتىسۋشىلار وبلىستىق جاستار دەنساۋلىعى ورتالىعى جۇمىسىمەن تانىسىپ, مەديتسينالىق ورتالىق عيماراتىندا پلەنارلىق وتىرىسقا قاتىستى. جاستار دەنساۋلىعىن ساقتاۋ جەلىلەرىن دامىتۋدى تالقىلاعان وتىرىستا وبلىستىق دەنساۋلىق ساقتاۋ باسقارماسىنىڭ باسشىسى ولجاس ىسقاقوۆ ماسەلەنى اشىق تالقىلاپ, ۇسىنىستار ايتۋعا شاقىردى.
دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتى ديرەكتورىنىڭ ورىنباسارى گۇلنار سارسەنباەۆا ەلىمىزدە جاستار دەنساۋلىعى ورتالىقتارى 5-6 جىلدان بەرى جۇمىس ىستەپ كەلە جاتقانىن اتاپ ءوتتى. بىراق وسى ورتالىقتار ماسەلەسىن تالقىلايتىن سەمينار العاش رەت وتكىزىلىپ وتىر. وسى جىلى جاستارعا مەديتسينالىق كومەك كورسەتۋ ستاندارتتارى بەلگىلەنىپ, قىزمەت اياسى كەڭەيە ءتۇستى. اشىلعالى بەرى اتقارىلعان جۇمىستار ورتالىقتىڭ تيىمدىلىگى مەن ماڭىزىن دالەلدەدى. دەگەنمەن دە جاستار ساۋلىعىن ساقتاۋداعى قاداۋ-قاداۋ ماسەلەلەرمەن اينالىساتىن وسى ورتالىقتاردى قارجىلاندىرۋ, ولاردى تسيفرلاندىرۋ ءالى تولىق شەشىمىن تاپقان جوق.
«بۇگىنگى سەمينار تاجىريبە الماسىپ, سالماقتى ماسەلەلەر توڭىرەگىندە پىكىر الماسۋدىڭ ۇلكەن مۇمكىندىگى دەپ بىلەمىز. الدا جۇمىسى جولعا قويىلعان ورتالىقتار جۇمىسىن وسىلايشا تانىستىرامىز», دەدى ول.
سەميناردا رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ باس ديرەكتورى قۋانىش التىنبەكوۆ بالالار مەن جاستار ساۋلىعىن نىعايتۋدىڭ ماڭىزدىلىعىنا توقتالدى.
وتكەن جىلى ەلىمىز بويىنشا 14-34 جاستاعىلار اراسىنان 1943 ادام العاش رەت پسيحيكالىق بۇزۋشىلىقپەن تىركەلگەن. ال پسيحواكتيۆتى زاتتاردى پايدالانۋ اسەرىنەن وسىنداي دياگنوز قويىلعاندار سانى 3630 ادام. جاستار جانە مەنتالدى دەنساۋلىق تاقىرىبىندا بايانداما جاساعان ماماننىڭ ايتۋىنشا قوعامداعى ناشاقورلىق پەن ويىنقۇمارلىق وسكەلەڭ ۇرپاقتىڭ پسيحيكالىق ساۋلىعىنا قاتتى اسەر ەتىپ وتىر. سوندىقتان ولارعا كومەك كورسەتۋدىڭ قازىرگى ءادىسىن وزگەرتكەنىمىز ءجون.
سەمينارعا بۇۇ حالىقتىڭ قونىستانۋى سالاسىنداعى قورىنىڭ سەكسۋالدىق جانە رەپرودۋكتيۆتىك دەنساۋلىق جونىندەگى ۇلتتىق ۇيلەستىرۋشىسى سەرىك تاڭىربەرگەنوۆ ونلاين قاتىسىپ, جاستارعا قولايلى قىزمەت كورسەتۋدەگى حالىقارالىق تاسىلدەر, وسى باعىتتاعى ەلىمىزدەگى تاجىريبە جايلى باياندادى.
ەكى كۇنگە سوزىلعان سەميناردا ماماندار سۋيتسيدتىك مىنەز-ق ۇلىقتىڭ الدىن الۋ, قىزداردىڭ رەپرودۋكتيۆتى دەنساۋلىعى, جاستار دەنساۋلىعى ورتالىقتارىنىڭ ءبىلىم بەرۋ ۇيىمدارىمەن بايلانىسىنداعى ەرەكشەلىكتەر بويىنشا پىكىر الماسىپ, ۇسىنىستار ايتىلدى.
قىزىلوردا