ۇلتتىق مۋزەيدە بۇقارالىق اقپارات قۇرالدارى قىزمەتكەرلەرىنىڭ كۇنىنە وراي «قازاق جۋرناليستيكاسى: وتكەنى مەن بۇگىنى» اتتى كورمە اشىلدى. سالتاناتتى جيىنعا اقپارات جانە قوعامدىق دامۋ ءمينيسترى دارحان قىدىرالى, مادەنيەت جانە سپورت ۆيتسە-ءمينيسترى نۇرعيسا داۋەشوۆ, زيالى قاۋىم مەن جۋرناليستەر قاتىستى.
اتالعان كورمە اقپارات قۇرالدارىنىڭ ۇلتتىق سانا-سەزىمدى قالىپتاستىرۋداعى ءرولىن كورسەتىپ, قالىپتاسۋى مەن دامۋ تاريحىن تانىستىرادى.
ۇسىنىلعان ءار كەزەڭدەگى اقپارات جابدىقتارى, گازەت-جۋرنالدار تاريحتان سىر شەرتەدى.
القالى جيىندى اشقان اقپارات جانە قوعامدىق دامۋ ءمينيسترى دارحان قىدىرالى جينالعان قاۋىمدى كاسىبي مەرەكەمەن قۇتتىقتادى.
«مەرەكە قارساڭىندا جۋرناليستەردىڭ كوڭىل كۇيى ەرەكشە دەپ ويلايمىن. ويتكەنى بىرەر كۇن بۇرىن مەملەكەت باسشىسىنىڭ تاپسىرماسىمەن ءبىر توپ باق قىزمەتكەرلەرىنە پاتەر كىلتى تابىستالدى. ونىڭ ىشىندە ۇزاق جىلدار بويى جەمىستى ەڭبەك ەتىپ جۇرگەن جۋرناليستەر, وپەراتورلار, قاراپايىم قىزمەتكەرلەر بولدى. مەملەكەتتىڭ بۇل قامقورلىعى ءارى قاراي جالعاسا بەرەدى. كەشە دە پرەزيدەنت سىيلىقتارى تابىستالدى. ءبىز وسى سالاعا جاۋاپتى مينيسترلىك رەتىندە جۋرناليستەرگە تارتۋ جاساۋدى ويلاپ وتىرمىز. بىرنەشە جوسپارىمىز بار. بۇگىن سونىڭ العاشقىسى – مادەنيەت جانە سپورت مينيسترلىگىنىڭ جانە ۇلتتىق مۋزەيدىڭ قولداۋىمەن ءباسپاسوز مۋزەيىن اشۋدى ءجون كوردىك. شىن مانىندە, وتكەنسىز بولاشاق جوق», دەدى سالا باسشىسى.
سونداي-اق ول 2 اقپان – قازاق ءباسپاسوزى كۇنى دەپ جاريالاناتىنىن اتاپ ءوتتى.
«2 اقپان – «قازاق» گازەتى دۇنيەگە كەلگەن كۇن. جىل باسىندا بۇل كۇندى قازاق ءباسپاسوزى كۇنى دەپ بەكىتۋدى ۇسىنعان ەدىك. مىنە, باستامامىز قولداۋ تاۋىپ وتىر», دەدى مينيستر.
جيىنعا قاتىسقان مەملەكەتتىك سىيلىقتىڭ لاۋرەاتتارى ساۋىتبەك ابدراحمانوۆ پەن الىبەك اسقار جۋرناليستىك جولدىڭ قىر-سىرىمەن ءبولىسىپ, جۇرەكجاردى تىلەكتەرىن ارنادى.
ايتا كەتەيىك, اتالعان ءىس-شارانى اقپارات جانە قوعامدىق دامۋ مينيسترلىگى مەن مادەنيەت جانە سپورت مينيسترلىگى بىرلەسىپ ۇيىمداستىرىپ وتىر.