زاڭداستىرۋدىڭ اياقتالۋىنا 10 كۇننەن از ۋاقىت قالدى. وسىعان بايلانىستى مامانداندىرىلعان حقكو-لار جانە اكىمشىلىك پوليتسيا باسقارمالارىنىڭ پروتسەسسينگتىك ورتالىقتارى كۇشەيتىلگەن جۇمىس رەجيمىنە كوشتى, دەپ حابارلايدى Egemen.kz Polisia.kz-كە سىلتەمە جاساپ.
ەندى مامانداندىرىلعان حقكو-لار دۇيسەنبىدەن جۇماعا دەيىن ساعات 09.00-دەن 20.30-عا دەيىن, سەنبى كۇنى ساعات 09.00-دەن 19.30-عا دەيىن جۇمىس ىستەيدى.
1 شىلدەدەن باستاپ زاڭداستىرۋعا وتىنىمدەردى قابىلداۋ توقتاتىلادى. الايدا 1 شىلدەگە دەيىن ءوتىنىم بەرىپ ۇلگەرگەن ازاماتتاردىڭ اۆتوكولىكتەرى تالاپتارعا ساي كەلەتىن بولسا, كورسەتىلگەن مەرزىمنەن كەيىن زاڭداستىرۋ قۇقىعى بەرىلەدى.
بۇدان باسقا, ەۋرازيالىق ەكونوميكالىق وداق ەلدەرىنەن 2022 جىلعى 1 قىركۇيەككە دەيىن اكەلىنگەن جانە بۇرىن تىركەلگەن ەلىنەن ەسەپتەن شىعارىلماۋى سەبەبىنەن زاڭداستىرۋ مۇمكىن بولمايتىن اۆتوكولىكتەردى مەملەكەتتىك تىركەۋ تۋرالى شەشىم قابىلداندى. مۇنداي اۆتوكولىكتەر كورسەتىلگەن مەرزىم وتكەننەن كەيىن كەرى اكەتۋ تۋرالى مىندەتتەمەمەن 5 جىل مەرزىمگە ۋاقىتشا ەسەپكە الۋ نەمەسە بۇرىنعى تىركەۋ ورنى بويىنشا اۆتوكولىكتى ەسەپتەن شىعارعان جاعدايدا زاڭداستىرۋ شارتتارىمەن تىركەلەدى. ۋاقىتشا ەسەپكە قويۋ كەزىندە كولىك قۇرالىن تىركەۋ تۋرالى كۋالىك جانە قازاقستان رەسپۋبليكاسىنىڭ مەملەكەتتىك نومىرلىك بەلگىلەرى بەرىلەدى (مەملەكەتتىك نومىرلىك بەلگىلەر ءۇشىن مەملەكەتتىك باج – 9 660 تەڭگە, كقتك – 4 313 تەڭگە, ادەتتەگى تىركەۋ ءۇشىن الىم – 863 تەڭگە).
تىركەۋ تۋرالى كۋالىكتە يەلىكتەن شىعارۋ جانە قازاقستان رەسپۋبليكاسىنان تىس جەرلەرگە شىعۋ قۇقىعىنسىز ۋاقىتشا ەسەپكە الۋ كورسەتىلەدى. شەت مەملەكەتتىڭ تىركەۋ قۇجاتتارى مەن مەملەكەتتىك نومىرلىك بەلگىلەرى «ازاماتتارعا ارنالعان ۇكىمەت» مەملەكەتتىك كورپوراتسياسىنا ساقتاۋعا تاپسىرىلادى. ەگەر قازاقستان ازاماتتارى ولاردى ەلدەن تىس جەرلەرگە اكەتۋ تۋرالى شەشىم قابىلداعان جاعدايدا, ولار قازاقستان رەسپۋبليكاسىنىڭ كقتك جانە متنب تاپسىرۋى ءتيىس, سودان كەيىن ولارعا تىركەۋ قۇجاتتارى مەن شەت مەملەكەتتىڭ متنب قايتارىلادى.
«سونداي-اق مىندەتتى اۆتوساقتاندىرۋ جانە جول قوزعالىسى سالاسىنداعى زاڭنامانىڭ سوڭعى وزگەرىستەرىنە سايكەس قازاقستان ازاماتتارى 2022 جىلعى 1 قىركۇيەكتەن كەيىن اكەلىنگەن شەتەلدىك اۆتوكولىكتەرگە مىندەتتى اۆتوساقتاندىرۋ ءپوليسىن رەسىمدەي المايتىنىن, سونداي-اق 2022 جىلعى 1 قىركۇيەككە دەيىن اكەلىنگەن جانە زاڭداستىرۋدان وتپەگەن شەتەلدىك ەسەپكە الىنعان كولىك قۇرالدارىنا قولدانىستاعى اۆتوساقتاندىرۋ ءپوليسىن ۇزارتا المايتىنىن حابارلايمىز. اكىمشىلىك قۇقىق بۇزۋشىلىق تۋرالى كودەكسكە سايكەس مىندەتتى اۆتوساقتاندىرۋ ءپوليسىنسىز اۆتوكولىكتى باسقارعانى ءۇشىن 10 اەك مولشەرىندە ايىپپۇل قاراستىرىلعانىن ەسكە سالامىز. اتالعان جاعدايلاردا پوليتسيا قىزمەتكەرلەرى اۆتوكولىكتەردى ۇستاپ, ولاردى ارنايى تۇراقتارعا جەتكىزۋگە قۇقىلى», دەلىنگەن حابارلامادا.