ءبىر جىلدارى ۇلتتىق قۇراما ساپىندا جاسىنداي جارقىراعان جامبىلدىق فۋتبولشى ۇلان قونىسباەۆ 2016 جىلى قىتاي قۇراماسىنا قارسى وتكەن جولداستىق كەزدەسۋدە اۋىر جاراقات الىپ, ءبىراز ۋاقىت سۇيىكتى ىسىنەن قول ءۇزىپ قالعان بولاتىن.
كاسىبي مانسابىندا «تاراز», «استانا», «شاحتەر» سەكىلدى وزگە دە بىرنەشە كلۋبتىڭ جەيدەسىن كيگەن ساڭلاق فۋتبولشى بۇگىندە مەديا ليگا كوماندالارىنىڭ بىرىندە باق سىناپ ءجۇر. جاسىل الاڭدا جانكۇيەرلەردى شەبەرلىگىمەن ءتانتى ەتكەن ۇلان تاراز قالاسىنىڭ بالالارىنا تاماشا تارتۋ جاسادى.
«قاراتاۋ» شاعىن اۋدانىنىڭ بالالارى ەندى «ۇلان ارەنا» الاڭىندا دوپ تەبەدى. شاعىن اۋدانعا قاراستى №29, №30 ءۇيدىڭ اۋلاسىنان اشىلعان الاڭ جەرگىلىكتى بالالارعا زور قۋانىش سىيلادى. جاڭا فۋتبول الاڭىنىڭ اشىلۋ سالتاناتىنا قاتىسقان جاسوسپىرىمدەر ۇلان قونىسباەۆ سەكىلدى بەلگىلى فۋتبولشى اتانۋ ءۇشىن تەر توگەمىز دەپ وتىر.
جەرلەسىمىز تارتۋ ەتكەن «ۇلان ارەنا» فۋتبول الاڭىنىڭ اشىلۋ سالتاناتىنا تاراز قالاسى اكىمىنىڭ ورىنباسارى ءداۋىر داۋلەتوۆ قاتىسىپ, فۋتبولشىعا, ونىڭ اكەسى ابيىربەك قونىسباەۆقا شاھار تۇرعىندارىنىڭ ريزاشىلىعىن جەتكىزدى.
ءىس-شارا بارىسىندا اۋلا تۇرعىندارى دا ايگىلى فۋتبولشىعا اقجارما تىلەكتەرىن جەتكىزىپ, بۇرىش-بۇرىشتا دوپ تەۋىپ جۇرگەن بالالارىنا قامقورلىق جاساعانى ءۇشىن العىس ايتتى. جاڭا الاڭنىڭ اشىلۋ سالتاناتىندا ۇلان قونىسباەۆتىڭ ءومىر جولىنان, كاسىبي مانسابىنان سىر شەرتەتىن «فۋتبول جانە مەن» كىتابىنىڭ تانىستىرىلىمى ۇيىمداستىرىلدى.
تاراز