«قازاق گازەتتەرى» جشس مەن Maqsut Narikbayev University ءبىلىم باعىتىندا جانە اقپاراتتىق سالادا بىرلەسكەن جوبالاردى ىسكە اسىرماق. ەكى قۇرىلىمنىڭ باسشىلارى ءتيىستى ىنتىماقتاستىق جانە ءوزارا ءىس-قيمىل تۋرالى مەموراندۋمعا قول قويدى.
ىنتىماقتاستىق جانە ءوزارا ءىس-قيمىل تۋرالى مەموراندۋمعا «قازاق گازەتتەرى» جشس باس ديرەكتورى ديحان قامزابەك ۇلى جانە Maqsut Narikbayev University باسقارما توراعاسى تالعات نارىكباەۆ قول قويدى.
اتاپ ايتقاندا, جۋرناليستيكا ءۇشىن جاڭا كادرلار دايارلاۋ, بىرلەسكەن تاعىلىمدامالار مەن پراكتيكا جۇرگىزۋ, تاجىريبە الماسۋ, تىعىز اقپاراتتىق ءوزارا ءىس-قيمىل جاساۋ قۇجاتتا كوزدەلگەن باسىم باعىتتاردىڭ ءبىر پاراسى عانا. جوعارى وقۋ ورنى مەن قۇرامىنا «Egemen Qazaqstan», «كازاحستانسكايا پراۆدا» سەكىلدى بىرنەشە گازەت پەن جۋرنال كىرەتىن سەرىكتەستىك ارىپتەستىكتىڭ ءوز جەمىسىن بەرەرىنە سەنىمدى.
تارقاتا ايتساق, «Egemen Qazaqstan» جانە «كازاحستانسكايا پراۆدا» باسىلىمدارىندا «زاڭگەر كەڭەسى» بىرلەسكەن ايدارىن جانە باسقا دا اقپاراتتىق ونىمدەردى ىسكە قوسۋ جوسپارلانىپ وتىر. ولاردىڭ باستى ماقساتى – ۋنيۆەرسيتەت پروفەسسورلارى مەن ساراپشىلارىن تارتا وتىرىپ, حالىق ءۇشىن ەڭ ماڭىزدى قۇقىقتىق سيپاتتاعى ماسەلەلەر بويىنشا ءتۇسىندىرۋ جۇمىستارىن جۇرگىزۋ.
ءوزارا ءىس-قيمىلدى ينتەرنەت-رەداكتسيالار دەڭگەيىندە دە ورىستەتۋ جوسپارلانىپ وتىر. بۇگىنگى تاڭدا باسپا باق اقپاراتتىق كەڭىستىكتى بەلسەندى يگەرىپ جاتقانىن ەسكەرسەك, ۋنيۆەرسيتەت ستۋدەنتتەرى – بولاشاق جۋرناليستەر ءداستۇرلى جۋرناليستيكادا عانا ەمەس, سونىمەن قاتار وزدەرىن SMM مامانى نەمەسە ۆيدەوبلوگەر رەتىندە دە سىناپ كورە الاتىنى انىق.