ەلىمىزدە ايگىلى مارال يشاننىڭ كەنەسارى حانعا سىيلاعان قۇرانى تابىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت مۇنى ەلىمىزدىڭ رۋحاني ومىرىندەگى ەلەۋلى وقيعا ەكەنىن ايتتى.
«جيىننىڭ سوڭىندا ەلدىڭ رۋحىن كوتەرەتىن تاعى ءبىر جاقسى جاڭالىقتى سىزدەرمەن بولىسكىم كەلەدى. ايگىلى مارال يشاننىڭ كەنەسارى حانعا سىيلاعان قۇرانى تابىلدى. بۇل – ەلىمىزدىڭ رۋحاني ومىرىندەگى ەلەۋلى وقيعا. مارال يشان بارشا قازاققا تانىمال ادام بولعان. ول – ءتول تاريحىمىزدا ەرەكشە ورنى بار كەنەسارى حاننىڭ ۇزەڭگىلەس سەرىگى», دەپ اتاپ ءوتتى مەملەكەت باسشىسى.
پرەزيدەنتتىڭ ايتۋىنشا, بۇل قۇران ەكى عاسىر بويى قولدان قولعا ءوتىپ, اقىرى شەتەلگە شىعارىلعان ەكەن. ونى جاناشىر ازاماتتاردىڭ, مەتسەناتتاردىڭ كومەگىمەن قازاقستانعا قايتارىپ الدىق. قۇراندا مارال يشاننىڭ جانە كەنەسارى حاننىڭ ءمورى بار. جادىگەرگە جان-جاقتى ساراپتاما جاسالدى. وتاندىق جانە شەتەلدىك عالىمدار قۇراندى مۇقيات زەرتتەدى.
«قۇراننىڭ, راسىندا, مارال يشانعا تيەسىلى بولعانى جانە كەنەسارى حانعا بەرىلگەنى انىقتالدى. كەز كەلگەن وركەنيەتتى ەل ءوزىنىڭ تاريحي مۇرالارىنا زور قۇرمەتپەن قارايدى. ونى قاستەرلەپ, مۇراجايعا نەمەسە باسقا دا ارنايى ورىندارعا قويادى.
ءبىز دە بابالاردان ميراس بولعان ءاربىر جادىگەردى قادىرلەپ, ساقتاي ءبىلۋىمىز كەرەك. وسى قۇراندى جاقىندا قازاقستان مۇسىلماندارىنىڭ ءدىني باسقارماسىنا تابىس ەتەمىز. ويتكەنى, بۇل – بۇكىل ەلگە ورتاق قازىنا», دەدى پرەزيدەنت.
سونىمەن قاتار مەملەكەت باسشىسى قۇندى مۇرانىڭ بارشا حالقىمىز ءۇشىن قاستەرلى ورىندا تۇرعانى ابزال ەكەندىگىن اتاپ ءوتتى.
«قۇراندى قالپىنا كەلتىرىپ, قوجا احمەت ياساۋي كەسەنەسىنە قويعان ءجون دەپ سانايمىن. كەزىندە تايقازاننىڭ ەلگە ورالۋىن جۇرت جاقسى ىرىمعا بالاعان ەدى. كوپ ۇزاماي قازاقستان تاۋەلسىز مەملەكەت بولدى.
ۇلت ازاتتىعى ءۇشىن كۇرەسكەن كەنەسارىنىڭ قولىندا بولعان قۇران كىتابىنىڭ ەلگە كەلۋى دە جاقسى ىرىم دەپ ويلايمىن. بۇل وقيعا قازاقستاننىڭ جاڭا ءداۋىرىنىڭ بەرەكەلى باستاۋى بولسىن دەپ تىلەيىك», دەپ ءسوزىن قورىتىندىلادى ەل پرەزيدەنتى.