«Zhambyl Economic and Investment Forum – 2023» حالىقارالىق ينۆەستيتسيالىق فورۋمى جامبىل وبلىسىندا كوپتەگەن جاڭا باستامانى جۇزەگە اسىرۋعا مۇمكىندىك تۋعىزىپ وتىر. اتالعان فورۋم اياسىندا اشىلعان گوفرلەنگەن كارتون جانە تاستان جاسالاتىن دايىن قاعاز قاپتاما ءوندىرۋ زاۋىتى ءوڭىر ەكونوميكاسىنا تىڭ سەرپىن بەرەتىنى انىق.
بايزاق اۋدانىنا قاراستى قوستوبە اۋىلىندا اشىلعان جاڭا كاسىپورىننىڭ جوبالىق قۇنى 1,7 ميلليارد تەڭگەنى قۇرايدى. دەرەكتەرگە سەنسەك, زاۋىت جىلىنا 12 مىڭ توننا ءونىم وندىرۋگە قاۋقارلى ەكەن. «KazStoneBox» جشس-نىڭ گوفرلەنگەن كارتون ءوندىرۋ زاۋىتى سوڭعى نۇسقاداعى اۆتوماتتاندىرىلعان قوندىرعىلارمەن جابدىقتالعانىن دا ايتا كەتكەن ءلازىم. قىسقاسى, ىرگەسى جاڭادان قالانعان ءوندىرىس وشاعىندا قىزمەتكەرلەردىڭ ەرىنبەي ەڭبەكتەنۋىنە بارلىق مۇمكىندىك قاراستىرىلعان.
جاڭادان اشىلعان ءوندىرىس ورنىنىڭ باسشىسى بەرىك ۇمىتقاليەۆتىڭ ايتۋىنشا, مينەرالدى شيكىزاتتان جاسالعان قاپتاما شىعاراتىن كاسىپورىن پوستكەڭەستىك ەلدەردە بالاماسى جوق شيكىزات رەتىندە مينەرالدى كالتسي كاربوناتىن پايدالاناتىن بىرەگەي ءوندىرىس ورنى بولىپ وتىر.
«قاعاز باعاسى جىل وتكەن سايىن شارىقتاپ بارا جاتقانىن كورىپ وتىرمىز. قاعاز وندىرىسىنە بىلەك تۇرە كىرىسكەن زاۋىتتار الەم ەلدەرىندە دە سيرەك كەزدەسەدى. ءبىزدىڭ سەرىكتەستىك وندىرەتىن ءونىمنىڭ 75 پايىزى تاستان جاسالاتىنىن ايتا كەتكەن ءلازىم.
ىرگەدەگى قاراتاۋ قالاسىنان تاسىمالداناتىن تاستى الدىمەن ارنايى اپپاراتپەن ۋاق قىلىپ الامىز. ودان كەيىن پوليەتيلەن, پوليپروفيلەن قوسپاسىن ارالاستىرىپ, ءتيىستى قۇرىلعىلارعا سالىپ قاعاز دايىنداۋعا كوشەمىز. كاسىپورىن وندىرگەن ءونىم سۋعا, ىلعالعا ءتوزىمدى بولۋىمەن ايرىقشالاناتىنىن ايتا كەتكەن ءلازىم. سەرىكتەستىكتە بۇگىنگى تاڭدا قىرىقتان استام ازامات تۇراقتى جۇمىسپەن قامتىلىپ وتىر. ولاردىڭ تىنباي ەڭبەكتەنۋى ءۇشىن باسشىلىق تاراپىنان بارلىق جاعداي جاسالعان. قىزمەتكەرلەر تەگىن تۇسكى اسپەن قامتىلعان. ولارعا ارنالعان ارنايى اسحانا دا بار», دەيدى كاسىپورىن باسشىسى بەرىك ۇمىتقاليەۆ.
سەرىكتەستىك باسشىسىنىڭ ايتۋىنشا, قىتايدان اكەلىنگەن جاڭا قۇرىلعىلاردى قالاي پايدالانۋ كەرەكتىگىن بىلىكتى ماماندار جەرگىلىكتى جۇمىسشىلارعا بارىنشا ۇيرەتىپ جاتىر. ەندى ولار جۇمىسقا بەلسەنە كىرىسىپ, زاۋىت ءىسىن ىلگەرىلەتۋگە كۇش سالماق.
كاسىپورىن وندىرگەن ءونىم تۇركىستان, الماتى وبلىستارىنا جونەلتىلەدى. سونداي-اق كورشىلەس وزبەكستان ەلىنە ەكسپورتقا شىعارىلاتىن بولادى. قىسقاسى, جاڭادان اشىلعان زاۋىت ونىمىنە دەگەن سۇرانىس قازىردىڭ وزىندە از ەمەس.
«قاندايدا ءبىر ءىستى قولعا الماس بۇرىن بىلىكتى مامانداردىڭ كەڭەسىنە قۇلاق تۇرگەننىڭ ەش ارتىقتىعى جوق. ءبىرشاما ۋاقىت بۇرىن قىتايلىق ارىپتەسىم يان نا دەگەن ازاماتتان جۇمىستى جۇرگىزۋدىڭ جولدارىن سۇراپ, جاڭا باستامانىڭ قىر-سىرىنا تەرەڭىنەن قانىقتىم.
وسى ءبىر كاسىپتى قولعا الىپ وتىرعان وزگە ەلدەردەگى كاسىپورىنداردىڭ جۇمىسىن دا حال-قادەرىمشە زەردەلەدىم. ناتيجەسىندە, 2021 جىلى نەسيە راسىمدەپ, جاڭا ءبىر ءىستى قولعا العان جايىم بار», دەيدى كاسىپكەر وتكەن شاققا كوز جۇگىرتىپ.
سەرىكتەستىك باسشىسى قولعا العان ءىستى ءارى قاراي وركەندەتۋدى ماقسات تۇتىپ وتىر. ول زاۋىتتان وندىرىلگەن ءونىمدى قازاقستان مەن وزبەكستان اۋماعىنان تىس وزگە دە مەملەكەتتەرگە ەكسپورتتاعىسى كەلەدى. الداعى ۋاقىتتا وسى باعىتتاعى جۇمىستى شيراتا تۇسپەك.
زاۋىت باسشىسى اۋەلدە 10 مىڭ توننا كولەمىندە ءونىم وندىرسە, كەيىنگى جىلدارى كورسەتكىشتى بىرنەشە ەسەگە ارتتىرۋعا بەكىنىپ وتىرعانى قۋانتادى. ونىڭ ايتۋىنشا, كاسىپورىن قىزمەتكەرلەرىنىڭ تاباندى ەڭبەگىنىڭ ارقاسىندا زاۋىت وندىرەتىن ءونىم الداعى بىرنەشە جىلدىڭ بەدەرىندە 20-30 مىڭ تونناعا دەيىن جەتكىزىلمەكشى. ويتكەنى ونىمگە دەگەن سۇرانىس جىل وتكەن سايىن ارتىپ كەلەدى.
جامبىل وبلىسى,
بايزاق اۋدانى