قىمباتشىلىق شارىقتاپ تۇرعان تۇستا ات شاپتىرىم اۋىل اراسىنا جەتۋ قاراپايىم حالىقتىڭ قالتاسىنا كادىمگىدەي سالماق سالارى ايتپاسا دا تۇسىنىكتى. اسىرەسە, الاتاۋدى باۋىرلاي جاتقان ەسىك پەن تالعار قالالارىنىڭ اراسىنا قاتىناسۋدىڭ قيىندىعىن جەرگىلىكتى تۇرعىندار سوڭعى جىلدارى ايقىن سەزىندى. سەبەبى ەكى اراعا جۇرەتىن قوعامدىق كولىك قاتىناسى پاندەميا كەزىندە ءۇزىلىپ, جولاۋشىلار تەك تاكسيمەن جۇرۋگە ءماجبۇر بولعان. ونىڭ دا قۇنى كوتەرىلىپ, كەمىندە ءبىر باعىتقا جەتۋ باعاسى 300-400 تەڭگەگە دەيىن شارىقتاپ كەتكەن ەدى.
وسىنداي قيىندىقتىڭ كۇرمەۋىن تارقاتۋدا تالعار اۋدانىنداعى «تۇلپار ەكسپرەسس-ا» جاۋاپكەرشىلىگى شەكتەۋلى سەرىكتەستىگى مەن ەڭبەكشىقازاق اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى, اۆتوموبيل جولدارى جانە تۇرعىن ءۇي ينسپەكتسياسى ءبولىمى ورتاق كەلىسىم نەگىزىندە ىرگەلەس ەكى اۋداننىڭ ورتالىعىنا قاتىنايتىن قوعامدىق كولىكتى جولعا شىعاردى.
بۇل ماسەلە اۋدان تۇرعىندارى تاراپىنان سان مارتە كوتەرىلىپ كەلدى. سول سەبەپتى, قوعامدىق كولىكتىڭ تاپشىلىعىن جويىپ, تيىمدىلىگىن ارتتىرۋ ماقساتىندا اپتا باسىنان بەرى قاراي 18 ورىندى 6 اۆتوبۋس ەسىك – تالعار – ەسىك باعىتتارى بويىنشا جولعا شىقتى. قوعامدىق كولىكتەر تاڭعى 6:10-نان باستاپ, كەشكى ساعات 20:10-عا دەيىن ءار 20 مينۋت ارالىعىندا كەستەگە ساي قىزمەت كورسەتەتىن بولادى. جولاقىسى – 80 تەڭگە. وسى كۇنى اۆتوبۋس ايالدامالارى ناقتىلانىپ, ارنايى بەلگىلەر قويىلىپ جاتىر. حالىق سانى ارتىپ, سوعان ساي قاتىناس كولەمى ۇلعايىپ تۇرعان تالعار مەن ەڭبەكشىقازاق اۋداندارىنىڭ تۇرعىندارىن قوعامدىق كولىكپەن قامتاماسىز ەتۋ ماسەلەسى وسىلايشا وڭتايلانىپ كەلەدى.
«جولاۋشىلارعا زامان تالابىنا ساي قىزمەت كورسەتۋ, جولاقىسىن تولەۋگە ىڭعايلى ەلەكتروندىق تولەم تۇرلەرىن ەنگىزۋدە بىرقاتار جۇمىس اتقارىلدى. ساپا مەن ۇنەمگە باعىتتالعان «AlemPay» ەلەكتروندىق جۇيەسى ىسكە قوسىلدى. بۇل – الماتى وبلىسى بويىنشا تۇڭعىش جۇزەگە اسقان جوبا. تاسىمالداۋ قىزمەتىنىڭ اشىقتىعىن قامتاماسىز ەتۋ, سالىق تۇسىمدەرىن ۇلعايتۋ, قوعامدىق كولىك سەرۆيسىنىڭ ساپاسىن جاقسارتىپ, اۆتوبۋس باعىتتارىنىڭ تابىستىلىعىن تالداۋ, مارشرۋتتىق جەلىنى جوسپارلاۋدى ماقسات ەتكەن جوبانىڭ تيىمدىلىگى ارتىپ كەلەدى. تالعار قالاسى بويىنشا كۇنىگە جەتى مىڭعا جۋىق جولاۋشىعا قىزمەت كورسەتىلەدى. وبلىستا العاشقىلاردىڭ ءبىرى بولىپ, سۋبسيدياعا قول جەتكىزدىك. سونىڭ ارقاسىندا جولاۋشى تاسىمالى جاندانىپ جاتىر. وتكەن جىلى 4 ايعا وبلىستىق بيۋدجەتتەن 100 ملن تەڭگە سۋبسيديا ءبولىنىپ, يگەرىلدى. بيىلعى جىلعا بۇل باعىتقا 564 ملن تەڭگە ءبولىنىپ وتىر. قوعامدىق كولىكتەر قالامەن قاتار, شالعايداعى تۋعانباي, نۇرا, ورمان اۋىلدارىن دا قامتىدى», دەدى «تۇلپار-ەكسپرەسس-ا» كومپانياسىنىڭ يەسى, تالعار اۋداندىق ءماسليحاتىنىڭ دەپۋتاتى باۋىرجان اۋكەنوۆ. ەندى مىنە, ەسىك پەن تالعار اراسىنا ءوز قارجىسىنا قوعامدىق كولىكتەردى جۇرگىزە باستادى.
ەسىك قالاسى تۇرعىندارىنىڭ ەندىگى تىلەگى – قالاىشىلىك مارشرۋتتاردىڭ قايتا قالپىنا كەلىپ, ىسكە قوسىلۋى. اتالعان كومپانيا باسشىلىعى بۇل تالاپ-تىلەكتەردى دە اياقسىز قالدىرماۋعا ۋادە بەرىپ وتىر.
الماتى وبلىسى