«بالاساعۇن» اتىنداعى ورتالىق كونتسەرت زالىندا «اۋزىنان ايدىڭ تۇسكەن قىز», «سەزىمدى قايتەم تۋلاعان», «سوعادى سەن دەپ جۇرەگىم» سەكىلدى وزگە دە بىرنەشە تانىمال ءاننىڭ اۆتورى, بەلگىلى ءانشى-كومپوزيتور سارسەنبەك باكىردىڭ شىعارمالارىنا ارنالعان «اۋزىنان ايدىڭ تۇسكەن قىز» اتتى كونتسەرت قويىلدى.
مادەني شاراعا ءوڭىر باسشىسىنىڭ ءبىرىنشى ورىنباسارى نۇرجان كالەندەروۆ قاتىسىپ, ەردىڭ جاسى ەلۋگە تولعان كومپوزيتورعا وبلىس اكىمى نۇرجان نۇرجىگىتوۆتىڭ قۇتتىقتاۋ حاتىن تابىستاپ, ونەر يەسىنىڭ يىعىنا زەرلى شاپان جاپتى. سونداي-اق كومپوزيتورعا «وبلىسقا سىڭىرگەن ەڭبەگى ءۇشىن» توسبەلگىسىن تاپسىردى.
كومپوزيتوردىڭ شىعارماشىلىق كەشىنە ارنايى كەلگەن ونەر الەمىندەگى ءىنى-قارىنداستارى سارسەنبەك باكىردىڭ جۇرت جادىندا قالعان تاماشا تۋىندىلارىن شىرقاپ, ىزگى تىلەكتەرىن ايتىپ, ەستەلىكتەرىمەن ءبولىستى. كونتسەرتتە ونەر كورسەتۋ ءۇشىن اۋليەاتاعا ارنايى ات باسىن بۇرعانداردىڭ قاتارىندا ايگىلى «مۋزارت» ءانسامبلى, مۇقاسان شاحزاداەۆ, دوسىمجان تاڭاتاروۆ, قۇرماش ماحان باستاعان وزگە دە بەلگىلى انشىلەر بار. كومپوزيتور كەشىنىڭ جوعارى دەڭگەيدە وتۋىنە جەرگىلىكتى ونەرپازدار دا سۇبەلى ۇلەس قوستى.
شىعارماشىلىق كەش بارىسىندا سارسەنبەكتىڭ تولقۇجاتىنا اينالعان «اۋزىنان ايدىڭ تۇسكەن قىز» انىنەن باستاپ, ونەرسۇيەر قاۋىم اراسىندا كەڭ تاراعان «نە پايدا؟», «سەزىمدى قايتەم تۋلاعان», «سوعادى سەن دەپ جۇرەگىم» سەكىلدى تۋىندىلارى دا شىرقالدى. سونداي-اق دىنمۇحامەد قوناەۆقا ارنالعان «تاۋ تۇلعا» اتتى ءانى العاش رەت قالىڭ كوپشىلىك الدىندا ورىندالدى.
بەلگىلى كومپوزيتوردىڭ مەرەيجاسىنا وراي ۇيىمداستىرىلعان كونتسەرت بارىسىندا «قوناەۆ قورى» قوعامدىق قورىنىڭ وكىلى جاپار كۇزدەۋبەكوۆ, ارداگەر دوسمۇرات شاحزاداەۆ, تالاس اۋداندىق ءماسليحاتىنىڭ توراعاسى قادىربەك سادۋباەۆ ونەر يەسىنە قۇرمەت كورسەتتى. بۇل كۇنى كومپوزيتورعا قوناەۆ اتىنداعى مەدال تابىستالىپ, قازاقستان كومپوزيتورلار وداعىنىڭ مۇشەلىك كۋالىگى تاپسىرىلدى.
كونتسەرت وتەردەن ءبىر كۇن بۇرىن سارسەنبەك باكىردىڭ 50 ءانى توپتاستىرىلعان «سەزىمدى قايتەم تۋلاعان» اتتى جاڭا جيناق ونەرسۇيەر قاۋىمعا تانىستىرىلدى. وسىلايشا ەردىڭ جاسى ەلۋدى بەلگىلى كومپوزيتور قوس قۋانىشپەن قارسى الدى.
تاراز