4 ماۋسىم – مەملەكەتتىك رامىزدەر كۇنىنە وراي شىمكەنتتە مەرەكەلىك ءىس-شارالار ۇيىمداستىرىلدى. وسىناۋ ايتۋلى كۇنى قالانىڭ تاۋەلسىزدىك ساياباعىندا سالتاناتتى جيىن ءوتىپ, وعان شاھاردىڭ بارشا زيالى قاۋىم وكىلدەرى, اسكەريلەر, كۇشتىك قۇرىلىم باسشىلىعى, دەپۋتاتتار, ەڭبەك ارداگەرلەرى, جاستار مەن ءتۇرلى قوعامدىق ۇيىم مۇشەلەرى قاتىستى.
وسى كۇنى مەملەكەتىمىزدىڭ ەلدىگىن ايعاقتايتىن رامىزدەرى ۇلىقتالىپ, ول تۋ كوتەرۋ راسىمىمەن جالعاستى. ۇلىق مەرەكەگە وراي ساياباقتاعى رامىزدەر الاڭىندا ارنايى كونتسەرتتىك كەش ءوتىپ, جينالعان ءدۇيىم جۇرتتىڭ كوڭىل كۇيىن ءبىر سەرپىلتتى. جەرگىلىكتى ونەر ورداسىنان قۇرالعان انشىلەر قۇيقىلجىتا ءان سالىپ, مەرەكەنىڭ قىزىقتى وتۋىنە ۇلەس قوستى. اسىرەسە شىرقالعان پاتريوتتىق اندەر حالىقتىڭ رۋحىن وياتىپ, تۇلا بويىن شىمىرلاتتى. ونەرپازدارمەن بىرگە ارداگەرلەر دە قوسىلا پاتريوتتىق اندەردى ورىنداپ, اينالا تەگىس ءان-جىرعا بولەندى. اسكەري وركەستر مۋزىكانتتارىنىڭ دا ونەرى كوپشىلىكتىڭ كوڭىلىنەن شىقتى. مەرەكەلىك ءىس-شارانىڭ سوڭى اۆتوشەرۋ مەن ۆەلوشەرۋگە ۇلاستى. 50 اۆتوكولىك پەن 80 ۆەلوسيپەدشى كوك تۋمەن بىرگە ورداباسى الاڭىنان بايدىبەك بي ەسكەرتكىشىنە دەيىن قالا كوشەلەرىمەن ءجۇرىپ ءوتىپ, كوپشىلىك قاۋىمعا مەملەكەتىمىزدىڭ رامىزدەرىنە دەگەن قۇرمەتتىڭ اسقاق ۇلگىسىن پاش ەتتى. ءبىر ايتا كەتەرلىگى, سالتاناتتى كەشكە قاتىسقان ءاربىر قالا تۇرعىنىنىڭ قولىندا ءبىر-ءبىر كوك تۋدان بولدى. وسىنىڭ ءوزى حالقىمىزدىڭ مەملەكەتتىك نىشاندارعا سىي-قۇرمەتىنىڭ بولەك ەكەنىن ايعاقتاپ تۇرسا كەرەك.
مەرەكەلىك شارانى تاماشالاۋعا كەلگەن بەلگىلى ازاماتتار مەملەكەتتىك رامىزدەردىڭ ماڭىزىنا, ۇرپاق تاربيەسىندەگى رولىنە قاتىستى ءوز پىكىرلەرىن بىلدىرگەن بولاتىن. سونىڭ ىشىندە ەسىمىن تەگىس ەل بىلەتىن ايگىلى سپورتشى ماحمۇد سابىرحان دا ءوز ويىن ورتاعا سالدى.
«قازاق حالقىنىڭ ءوز ەلىنىڭ ناعىز پاتريوتى ەكەنىن, مەملەكەتتىك نىشانداردى ەرەكشە قاستەرلەپ, قادىر تۇتاتىنىن كەشەگى وتكەن تاشكەنتتەگى بوكستان الەم چەمپيوناتىندا انىق بايقادىم. سول كەزدە تريبۋنا تولعان حالىق ءانۇراندى جالعاي كەتىپ, جاندى داۋىسپەن ءبىر كىسىدەي قوسىلا شىرقاعاندا بويىمدى الاپات كۇش كەرنەپ, كوزىمە ىستىق جاس كەلدى. ءوزىمدى وسى ءسات دۇنيەدەگى ەڭ باقىتتى ادامداي سەزىندىم. قازاق ەلىنىڭ ازاماتى بولىپ تۋعانىم ءۇشىن تاعدىرعا ىشتەي ريزاشىلىعىمدى ءبىلدىردىم. ەڭ باقىتتى شاعىم وسى شىعار دەپ قۋانىشتان جۇرەگىم جارىلا جازدادى. ماعان قولداۋ ءبىلدىرىپ, ۇلتتىق سانا-سەزىمنىڭ جوعارى ەكەنىن دالەلدەپ, بۇكىل الەمگە تاماشالاتقانى ءۇشىن قازاق حالقىنا مىڭ العىس ايتامىن. ەلىمنىڭ ىنتىماعى مەن بىرلىگى, ۇيىمشىلدىعى سول جەردە انىق كورىندى. ەندىگى رەتتە جاستارعا اسىرەسە سپورتشىلارعا ايتارىم, ءانۇرانىمىزدى دۇنيەجۇزىلىك دودالاردا كوپشىلىكتىڭ الدىندا شىرقاتىپ, كوك تۋىمىزدى جەلبىرەتە بەرەيىك», دەدى بىلعارى قولعاپتان الەمنىڭ تالاي دودالارىنان توپ جارىپ كەلگەن باتىر ۇل.
«شىمكەنت قالاسى كاسىپوداقتار ورتالىعى» اۋماقتىق كاسىپوداقتار بىرلەستىگىنىڭ جانە قالالىق قوعامدىق كەڭەستىڭ توراعاسى باۋىرجان التەەۆ تە جينالعان جۇرشىلىقتى ايتۋلى مەرەكەمەن قۇتتىقتاپ, بۇل مەيرامنىڭ راسىمەن دە ءجونى بولەك ەكەنى جونىندە پىكىرىن بىلدىرە كەتتى.
«نەگىزى, بۇگىن – ءبىز ءۇشىن تاريحي كۇن. سەبەبى ەل بولامىن دەسەڭ ءبىرىنشى كەزەكتە شەكارانى بەكىتۋ كەرەك. سونىمەن بىرگە قازاقستاننىڭ تاۋەلسىز, دەربەس ەل ەكەنىن دالەلدەيتىن قۇدايعا شۇكىر تۋىمىز, ەلتاڭبامىز, باسقا دا رامىزدەرىمىز بار. وسى نىشانداردىڭ بارلىعى ۇلتتىڭ بويىندا پاتريوتتىق سەزىمدى وياتاتىن دۇنيەلەر. ەندىگى مىندەت وسىلاردى وسكەلەڭ ۇرپاققا دارىپتەي بەرۋ كەرەك. ال بۇل جاۋاپكەرشىلىكتى الىپ ءجۇرۋ اعا بۋىن ۇرپاقتىڭ موينىنداعى پارىز دەپ بىلەمىز. اسىرەسە جەلبىرەپ تۇرعان كوك تۋىمىزعا قۇرمەت ەرەكشە بولۋعا ءتيىس. قاي جەردە بولسىن بايراعىمىزدىڭ تومەن تۇسۋىنە, قۇرمەتسىز قالۋىنا جول بەرمەۋىمىز كەرەك. وسىنى مەكتەپتەردە, جوعارى وقۋ ورىندارىندا شاكىرتتەرگە بارىنشا تۇسىندىرگەن ءجون. ياعني تۋ مەن ەلتاڭبا جاي عانا مەكەمەنىڭ ماڭدايشاسىندا, قابىرعادا ءىلىنىپ تۇرعان زات ەمەس. ول ءبىزدىڭ رۋحىمىز, ەلدىگىمىزدىڭ نىشانى ەكەنىن جاس ۇرپاق ساناسىنا سىڭدىرە ءبىلۋىمىز قاجەت. ءتىپتى بالاباقشالاردا كۇندەلىكتى تاڭەرتەڭ انۇرانمەن باستالىپ, بالالار تاربيەلەيتىن جايدا كوك تۋىمىز بەن ەلتاڭبامىزدىڭ بولۋى ءىزىمىزدى باسىپ كەلە جاتقان جاس ۇرپاقتىڭ پاتريوتتىق رۋحتا تاربيەلەنۋىنە مۇرىندىق بولارى ءسوزسىز.
سودان سوڭ ءاربىر رامىزگە بولەك باس ءيۋىمىز كەرەك. ارقايسىسىنىڭ ءوزىنىڭ بولەك قۇرمەتى بار. سونى ۇمىتپايىق. مەنىڭ ءوز باسىم شەتەلگە شىقسام قازاقستاننىڭ مەملەكەتتىك نىشاندارى بەينەلەنگەن سپورتتىق كيىمدەرىن كيىپ الامىن. ءتىپتى جولعا شىعاردا الىپ شىعاتىن سومكەمدە دە كوك تۋىمىزدىڭ سۋرەتى تۇرادى. سوندا مەنى كورگەن شەتەلدىكتەر ەلىمىزدى تانىپ, «قازاقستان» دەپ ك ۇلىمسىرەي قارايدى, مەن ء«يا» دەپ مارقايا جاۋاپ بەرەمىن. وسىنىڭ ءوزى مەنىڭ پاتريوتتىق سەزىمىمدى وياتىپ, رۋحىمدى كوتەرەدى. سوندىقتان ءاربىر ازاماتىمىز قايدا جۇرسە دە ءوزىنىڭ قازاقتىعىن تانىتىپ جۇرسە, مەنىڭشە دۇنيە ءجۇزىنىڭ الدىندا ەلىمىزدىڭ ازاماتتارى قانداي ۇلتجاندى, پاتريوت ەكەنىن تانىتار ەدى. وسى رەتتە ءبىزدىڭ سپورتشىلارىمىزعا ۇلكەن راحمەت. ارالاس جەكپە-جەك, وليمپيادالىق سپورت تۇرلەرى بولا ما, جەڭىس تۇعىرىنان كورىنىپ, الەمگە قازاقستانداي ەل بار ەكەنىن تانىتىپ ءجۇر. وزگە حالىققا قازاقتىڭ كىم ەكەنىن ءبىلدىرۋ ءۇشىن دە جەڭىسكە ۇمتىلۋ پاتريوتتىق رۋحتىڭ ءبىر ولشەمى دەپ ۇعىنامىن. ءوز باسىم ءاربىر حالىقارالىق جارىستا ءانۇرانىمىز شىرقالىپ, كوك تۋىمىز بيىككە ورلەگەنىن كورگەندە ىشتەي كوڭىلىم تولقىپ, بويىمدى كەرەمەت شاتتىق سەزىمى كەرنەي تۇسەدى. بۇدان اسقان باقىتتى ءسات بار ما؟! حالقىمىز امان بولسىن, رامىزدەر كۇنى قۇتتى بولسىن!» دەدى ول.
«بۇگىن بارلىق وتانداس ءۇشىن ەرەكشە كۇن. ويتكەنى ەلىمىزدىڭ بارشا جۇرتى قازاقستان رەسپۋبليكاسىنىڭ رامىزدەرى كۇنىن اتاپ ءوتىپ جاتىر. مەنىڭ ويىمشا ەلىم, جەرىم دەيتىن ءاربىر مەملەكەتتىڭ پاتريوت ازاماتى وسى كۇنى كوك تۋىمىزدى كوككە جەلبىرەتىپ, ەلتاڭبامىزدى جوعارى ۇستاپ, ءانۇرانىمىزدى ءبىر شىرقاپ قويۋى قاجەت», دەدى جىلى لەبىزىن ارناعان تانىمال وپەرا ءانشىسى ءۇرالحان سەيىلبەكوۆا. – سەبەبى ءوزىمىزدىڭ مەملەكەتتىك نىشاندارىمىزدى ءوزىمىز ۇلىقتاپ, قادىر تۇتپاساق, باسقا ەشكىم ولاردى ۇلىقتامايدى. ءبىر قۋانارلىعى بۇگىندە كىشكەنتاي بالادان, ەڭكەيگەن قارياعا دەيىن ماڭىزدى جيىنداردا ءانۇرانىمىزدى جاتقا ايتىپ تۇرعانىن كورەمىز. مەن ءوزىم ءانشى بولعاندىقتان كوپ جيىنداردا ونەر كورسەتەمىن. سوندا كوپتەگەن ءاندى ورىندايمىن. الايدا جاي اندەردى شىرقاۋدا بولەك سەزىم دە مەملەكەتتىك ءانۇرانىمىزدى قولىمدى جۇرەگىمە قويىپ ورىنداعاندا باسقاشا كوڭىل كۇيدە بولامىن. جان دۇنيەم ەلجىرەپ, ماقتانىش سەزىمى بويىمدى كەرنەپ, ءوزىمدى قۇستاي سامعاپ بارا جاتقانداي سەزىنەمىن. اسىرەسە سەنىمەن بىرگە حالىق تا قوسىلا كەتكەندە ءوزىمدى قازاقستاننىڭ ەڭ قاسيەتتى ءرامىزىنىڭ ءبىرى ءانۇراندى ۇلكەن ساحنا تورىنەن شىرقاۋ باقىتى بۇيىرعانىنا قۇدايعا مىڭ دا ءبىر تاۋبە دەيمىن. بۇل جەردە كورەرمەندى دە, مەنى دە انگە باس ءيدىرىپ تۇرعان ونەردىڭ جەكە-دارا ءوزى ەمەس, ەلىمىزدىڭ رۋحىن اسقاقتاتار ءانۇرانى مەن سوعان دەگەن قۇرمەت.
سونىمەن بىرگە وسىنداي ايتۋلى مەرەكەدە ءاربىر ەل ازاماتىنىڭ قولىنان كىشكەنتاي تۋدى الىپ جۇرگەنىن كورگەندە ەرىكسىز راحات سەزىمگە بولەنەسىڭ. پاتريوتتىق رۋح باردا مەملەكەت ەشقاشان قاۋىپ-قاتەرگە باسىن تىكپەيتىنىنە, قانداي قيىن جاعداي بولسا دا حالىقتىڭ ىنتىماعى مەن بىرلىگى ودان امان الىپ شىعاتىنىنا كامىل سەنىمدە جۇرەسىڭ. مەن ءۇشىن بۇل مەرەكەنىڭ ماڭىزى مەن سىرى وسىندا جاتىر دەپ ويلايمىن. ياعني حالىققا ەلىمىزدىڭ رامىزدەرىن قۇرمەتتەۋدى دارىپتەۋ ارقىلى بويلارىنا پاتريوتتىق سۇيىسپەنشىلىك ۇرىعىن سەبۋ, وسىلايشا وتانسۇيگىشتىك سەزىمدى كۇشەيتىپ, ەلدىڭ بىرلىگىن بەكەمدەۋ ىنتىماعىن ارتتىرۋ ماقساتى جاتقانىن اڭعارامىن. سونىمەن بىرگە كوپتەگەن مەكەمەنىڭ قاق ماڭدايىندا كوك تۋىمىز جەلبىرەپ تۇرادى. كۇننىڭ ىستىعى مەن سۋىعى, جەلدىڭ ءوتى بار دەگەندەي, ۋاقىت وتە كەلە سىرتقا ىلىنگەن تۋ دا ەسكىرىپ توزادى. سونىڭ ءۇشىن ءاربىر مەملەكەتتىك مەكەمە بايراعىمىزدى ءسانىن كەتىپ قالماۋىنا ەرەكشە ىجداعاتتىلىقپەن نازار اۋدارىپ وتىرسا دەگەن ىزگى تىلەگىمدى جەتكىزگىم كەلەدى».
مەملەكەتتىك رامىزدەر كۇنىن تويلاۋ مەگاپوليستە ءبىر كۇنىن بۇرىن باستالدى دەسەك قاتەلەسپەيمىز. ويتكەنى سول كۇنى كەشكە قاجىمۇقان اتىنداعى ورتالىق ستاديونىندا فۋتبولدان قازاقستان چەمپيوناتىنىڭ اياسىندا «ورداباسى» مەن «اتىراۋ» كوماندالارى اراسىندا كەزەكتى ويىن وتكەن. سول جارىستا كوك تۋىمىز جەلبىرەپ, ستاديونعا جينالعان 23 مىڭ فۋتبول جانكۇيەرى قولدارىن كوكىرەگىنە قويىپ تانىمال وپەرا ءانشىسى مايرا مۇحامەدقىزىمەن بىرگە ءانۇراندى شىرقادى. شىمكەنت قالاسىنىڭ اكىمى مۇرات ايتەنوۆ تە ءوز كومانداسىنا جانكۇيەر بولىپ, قولداۋ كورسەتتى. وسىلايشا, جەرلەستەرىنەن ۇلكەن دەمەۋ مەن قۋات العان «ورداباسىلىقتار» ويىندا شاپشاڭدىق پەن بەلسەندىلىك تانىتىپ, قازاقستان پرەمەر-ليگاسىنداعى جارىستا كەزەكتى جەڭىستەرىنە قول جەتكىزدى.
شىمكەنت