اۋليەاتادا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, بەلگىلى كومپوزيتور التىنبەك قورازباەۆتىڭ 75 جىلدىق مەرەيتويىنا وراي ء«ان-جىرىم ساعان, تۋعان ەل!» اتتى شىعارماشىلىق كەش ۇيىمداستىرىلدى.
ءان الەمىنىڭ كوريفەيىنە ارنالعان ءىس-شارادا بەلگىلى انشىلەر كومپوزيتوردىڭ شىعارمالارىن ورىنداپ, ونەر يەسىنە قۇرمەت كورسەتتى.
التىنبەك قورازباەۆتىڭ شىعارماشىلىعىنا ارنالعان كەش اياسىندا ء«ان-جىرىم ساعان, تۋعان ەل!» اتتى ءىىى حالىقارالىق ەسترادالىق انشىلەر بايقاۋى ءوتتى. وبلىس اكىمدىگىنىڭ قولداۋىمەن ۇيىمداستىرىلعان بايقاۋعا جيىرماعا جۋىق جاس ونەرپاز قاتىستى.
بايقاۋ قورىتىندىسىندا اۋليەاتالىق جاس تالانت دۋلات جاسۇزاق باس جۇلدە يەگەرى اتانسا, شۋلىق ەربوسىن قاسىمبەك ءبىرىنشى ورىنعا لايىق دەپ تانىلدى. جەر جانناتى جەتىسۋ جەرىنەن كەلگەن «براۆو» دۋەتىنە ەكىنشى ورىن بۇيىرسا, ماڭعىستاۋلىق ازامات امانگەلدى ۇلى ۇزدىك ۇشتىكتى تۇيىندەدى.
ءوڭىر باسشىسى نۇرجان نۇرجىگىتوۆ حالىقتىڭ قۇرمەتىنە بولەنگەن كومپوزيتوردى مەرەيتويىمەن قۇتتىقتاپ, ىزگى تىلەگىن ارنادى.
«قاسىرەتتەن قان جۇتقان قارا شالدىڭ شەرىن تارقاتىپ, قارا كەمپىردىڭ زارىن جەتكىزگەن ءسىزدىڭ ونەرىڭىزگە حالىق الدەقاشان جوعارى باعاسىن بەرىپ قويعان. تۋعان جەرىڭىزدە دە ەسەلى ەڭبەك ەتىپ, جەرلەستەرىڭىزدىڭ ىقىلاسىنا بولەندىڭىز. ءسىزدىڭ اندەرىڭىز قاي كەزدە دە جۇرتتىڭ جادىندا ساقتالاتىنى داۋسىز. ونەر بيىگىنە شىققان وزىڭىزدەي تۇلعامەن قاشاندا ماقتانامىز. جاس ۇرپاققا بەرەرىڭىز ءالى دە كوپ ەكەنى اقيقات. ەلدىڭ ىقىلاسىنا بولەنىپ, امان ءجۇرىڭىز», دەدى ن.نۇرجىگىتوۆ.
تاراز