سينگاپۋر پرەزيدەنتى مارتەبەلى حاليما ياكوب نازارباەۆ ۋنيۆەرسيتەتىنىڭ قۇرمەتتى قوناعى رەتىندە «ارىستان قالاسىنان ۇلى دالاعا دەيىن» تاقىرىبىندا ءدارىس وقىدى, دەپ حابارلايدى Egemen.kz.
ءىس-شاراعا قازاقستان ۇكىمەتىنىڭ وكىلدەرى, سونداي-اق نازارباەۆ ۋنيۆەرسيتەتىنىڭ اكىمشىلىگى, وقىتۋشىلارى, قىزمەتكەرلەرى مەن ستۋدەنتتەرى قاتىستى. پرەزيدەنت حاليما ياكوب ءوز دارىسىندە قازاقستان مەن سينگاپۋر اراسىنداعى تىعىز ءوزارا ءتيىمدى 30-جىلدىق ىنتىماقتاستىق جەتىستىكتەرى تۋرالى ايتتى.
ءدارىس بارىسىندا سينگاپۋر پرەزيدەنتى «ارىستان قالا» مەن « ۇلى دالا» اراسىنداعى ىنتىماقتاستىقتىڭ ءۇش نەگىزىنە توقتالدى. پرەزيدەنت پىكىرىنشە, ولار: ءبىلىم سالاسى, گەندەرلىك تەڭدىك جانە بارلىق ازاماتتار ءۇشىن تەڭ مۇمكىندىكتەر, دىنارالىق ديالوگ.
«سينگاپۋر ءومىر بويى ءبىلىم الۋدىڭ ماڭىزدىلىعىن مويىندايدى جانە مەن ەرەسەكتەردىڭ وقۋىنا قولداۋ كورسەتۋدى ارتتىرۋ ءۇشىن كوپ ۇلەس قوسۋعا تىرىسامىن. ءبىلىم سالاسى «قازاقستان 2050» ستراتەگياسىنىڭ نەگىزگى تىرەكتەرىنىڭ ءبىرى بولىپ تابىلاتىنىن بىلەمىن. سونداي-اق قازاقستاننىڭ 2025 جىلعا دەيىنگى ۇلتتىق دامۋ جوسپارى ءبىلىم بەرۋ سالاسىنداعى ينفراقۇرىلىمعا ينۆەستيتسيا سالۋ جانە بۇكىل قازاقستان بويىنشا ينكليۋزيۆتى ءبىلىم بەرۋ ساياساتىن ىلگەرىلەتۋ ارقىلى جوعارى ساپالى بىلىمگە قولجەتىمدىلىكتى ارتتىرۋعا باعىتتالعانىن قۋانا اتاپ وتكىم كەلەدى», دەدى سينگاپۋر پرەزيدەنتى.
جۇمىس ساپارىنىڭ ماڭىزدى ءساتى پرەزيدەنت حاليمانىڭ ياكوبتىڭ نازارباەۆ ۋنيۆەرسيتەتىنىڭ قۇرمەتتى پروفەسسورى اتاعىن الۋى بولدى.