ءسان الەمىندە ويىپ الار ورنى بار «اسىل ديزاين» ءسان ءۇيىنىڭ وتىز جىلدىعىنا وراي تارازدا ءداستۇرلى «Aspara Fashion Week» اپتالىعىنىڭ ون ءبىرىنشى ماۋسىمى ۇيىمداستىرىلدى. حالىقارالىق ءىس-شاراعا جوبا جەتەكشىسى ايدارحان قاليەۆ, «يرينا نابوكو» ءسان ءۇيىنىڭ باس ديزاينەرى يرينا نابوكو, باسقا دا مارتەبەلى مەيماندار قاتىستى.
ءسان اپتالىعىنا استانا, اتىراۋ, اقتاۋ, اقتوبە, ورال قالالارىنان, قىتاي, تاتارستان, قىرعىزستان, وزبەكستان سەكىلدى كورشىلەس ەلدەردەن كەلگەن ديزاينەرلەر جينالعانداردىڭ نازارىنا ءوز توپتامالارىن ۇسىندى. ولاردىڭ ىشىندە بالالارعا ارنالعان كيىم توپتامالارى دا بولدى.
ءىس-شارانىڭ سوڭعى كۇنى «اسىل-ديزاين» ءسان ءۇيىنىڭ «نەو-فولكلور» ەتنوستىق ستيلىندەگى زاماناۋي «aspara» ۇلتتىق برەند توپتامالارىنا ارنالدى. وتىز جىل بويىنا زاماناۋي ۇردىستەرمەن ۇيلەسەتىن قازاقتىڭ ۇلتتىق كيىمىن ناسيحاتتاپ كەلگەن «اسىل-ديزاين» ءسان ءۇيىنىڭ اۆتورلىق توپتامالارى جۇرتشىلىق تاراپىنان ۇلكەن قىزىعۋشىلىق تۋدىردى. بۇعان دەيىن «Aspara» برەندىنىڭ ماۋسىمدىق توپتامالارى ەۋروپا مەن ازياداعى ءىرى پوديۋمداردا كورسەتىلىپ, سانقويلاردى ءتانتى ەتكەن ەدى.
«ناقتىراق ايتار بولساق, Aspara Fashion Week» جوباسىنىڭ وزىنە ءتان باعىتى بار. نەو-فولكلورلىق ستيلدەگى كيىمدەردى ديزاينەر رەتىندە 10-15 جىل بۇرىن جاسادىم. بۇگىندە بۇل ءستيلدى قازاقستان عانا ەمەس, بۇكىل الەم ەلدەرى بىلەدى.
«نەو-فولكلور» – ۇلتتىق كيىم مەن ءسان ۇلگىسىنىڭ زاماناۋي ۇلگىمەن ۇشتاسقان, ءساتتى تولىقتىرىلعان جاڭا باعىت. حالىقارالىق جوبامىزدىڭ 10 ماۋسىمىنا 600-دەن استام ديزاينەر قاتىسقان. وسى ۋاقىت ارالىعىندا ۇلتتىق كيىمىمىزدى ناسيحاتتاپ قانا قويماي, جامبىل وبلىسىن دا الەمگە تانىتۋدى ماقسات ەتتىك. بۇل جۇمىس ون ءبىرىنشى ماۋسىمدا دا ساتىمەن جالعاستى», دەيدى جوبا جەتەكشىسى ا.قاليەۆ.
ءسان اپتالىعىنىڭ سوڭعى كۇنىندە بىرنەشە باعىت بويىنشا بايقاۋ ۇيىمداستىرىلىپ, جەڭىمپازدار انىقتالدى.
جامبىل وبلىسى