الاكول جاعالاۋىندا تۋريستىك ماۋسىم 15 ماۋسىمدا باستالادى, دەپ حابارلايدى Egemen.kz اباي وبلىسى اكىمدىگىنە سىلتەمە جاساپ.
بيىل جايلى دەمالىستى ۇيىمداستىرۋ ءۇشىن اباي وبلىسىنىڭ اكىمدىگى جول كارتاسىن ازىرلەدى. وعان 40-قا جۋىق شارا ەندى. كەلۋشىلەردى كوپتەگەن جاڭالىقتار كۇتىپ تۇر. بۇل تۋرالى وبلىس اكىمىنىڭ ءبىرىنشى ورىنباسارى ايدىن كارىموۆ ايتىپ بەردى.
ايتا كەتەيىك, استانادان ۇرجارعا ءبىرىنشى بولىپ QazaqAir اۋەكومپانياسىنىڭ ۇشاعى ۇشقان بولاتىن.
سونداي-اق اباي وبلىسىندا جازعى كەزەڭدە الاكول كولىنە جولاۋشىلار تاسىمالى قاراستىرىلىپ جاتىر.
قازىر ءۇرجار اۋدانىنىڭ الاكول كولىنىڭ جاعالاۋىندا سۋ بۇرۋ كانالىن سالۋ ءۇشىن جەر قۇرعاتۋ جۇمىستارى قارقىندى تۇردە جۇرگىزىلۋدە.
كول جاعالاۋىن ەلەكترمەن جابدىقتاۋ ماسەلەسى دە شەشىلىپ جاتىر. ساراپتاما قورىتىندىسى الىندى. جوبالار جاقىن ارادا ىسكە اسىرىلادى.
جازعى كەزەڭدە الاكول كولىنە 4 جولاۋشىلار اۆتوبۋسى قاتىنايدى. سونداي-اق «سەمەي-جالاڭاشكول» ستانتسياسى تەمىرجول مارشرۋتىنا قىزمەت كورسەتۋگە تەندەر وتكىزىلدى. ونىڭ جەڭىمپازى - «جولاۋشىلار تاسىمالى» اق. بيىل قۇرامىنا 5 ۆاگون ەنگەن پويىز اپتاسىنا 3 رەت قاتىنايدى.