پارلامەنت سەناتىنىڭ توراعاسى ماۋلەن اشىمباەۆ «بەلگيا-قازاقستان» دوستىق توبىنىڭ توراعاسى تيم ۆاندەنپۋت باستاعان بەلگيا پارلامەنتى دەپۋتاتتارى دەلەگاتسياسىمەن كەزدەستى. تاراپتار ەكىجاقتى ىنتىماقتاستىق پەن پارلامەنتارالىق ءوزارا ءىس-قيمىلدى ودان ءارى نىعايتۋ پەرسپەكتيۆالارىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
ماۋلەن اشىمباەۆ بەلگيا قازاقستاننىڭ ەۋروپالىق وداقتاعى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى. سەنات توراعاسى پارلامەنتارالىق دەڭگەيدە, ونىڭ ىشىندە حالىقارالىق ۇيىمدار اياسىندا ىنتىماقتاستىقتى نىعايتۋ قاجەتتىگىن ايتتى.
ء«بىز پارلامەنتارالىق بايلانىستاردىڭ قارقىندى دامۋىنا مۇددەلىمىز. ەكى ەلدىڭ پارلامەنتتەرىندە دوستىق توپتارى تابىستى جۇمىس ىستەپ جاتىر. ولار ءبىزدىڭ ىنتىماقتاستىعىمىزدى دامىتۋدىڭ ماڭىزدى تەتىگى بولىپ تابىلادى. قازاقستاندىق دەپۋتاتتار ەقىۇ پارلامەنتتىك اسسامبلەياسى مەن پارلامەنتارالىق وداق الاڭدارىندا بەلگيالىق ارىپتەستەرىمەن ءوزارا ارەكەتتەسۋگە دە مۇددەلى», دەدى ماۋلەن اشىمباەۆ.
سونداي-اق سەنات توراعاسى بەلگيالىق ارىپتەستەرىنە مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان رەفورمالار تۋرالى ەگجەي-تەگجەيلى ايتىپ بەردى. سونىمەن قاتار تاراپتار حالىقارالىق جانە وڭىرلىك كۇن تارتىبىندەگى ماسەلەلەردى تالقىلادى.
ءوز كەزەگىندە تيم ۆاندەنپۋت قازاقستاندا جۇرگىزىلىپ جاتقان ساياسي ترانسفورماتسيانىڭ, سونداي-اق ەلىمىزدىڭ حالىقارالىق ۇيىمدارمەن ىنتىماقتاستىعىنىڭ تيىمدىلىگىن اتاپ ءوتتى. پارلامەنتاري ءوز تاراپىنىڭ ينۆەستيتسيالىق جانە كولىك-لوگيستيكالىق جوبالاردى دامىتۋعا جانە پارلامەنتارالىق ىنتىماقتاستىقتى نىعايتۋعا مۇددەلى ەكەنىن ءبىلدىردى.