كۇرە جولداعى قاۋىرت تىرلىك

جالپى, وبلىس بويىنشا 3420 شاقىرىم جول بار. ونىڭ ىشىندە رەسپۋبليكالىق ماڭىزى بار جولدىڭ ۇزىندىعى 1016 شاقىرىم. بىلتىرعى جىل سوڭىندا وسى ساناتتاعى 204 شاقىرىمدىق «قىزىلوردا –جەزقازعان» تاس جولىن جوندەۋگە دايىندىق باستالىپ, وسى جىلى مەردىگەر كومپانيالار جۇمىسقا كىرىستى.

سوناۋ سەكسەنىنشى جىلدارى ماڭعىستاۋدان اكەلىپ توسەلگەن بيتۋمنىڭ جۇقاناسى عانا قالعان كۇرە جول تۋرالى وسىعان دەيىن دە تالاي مارتە جازىلعان ەدى. وڭىرلىك كوممۋنيكاتسيالار قىزمەتىنىڭ ۇيىمداستىرۋىمەن وتكەن كوشپەلى بريفينگتە شۋ باعىتىنا قاراعاندا, قىزىلوردا مەن استانا اراسىن 700 شاقى­رىمعا جاقىنداتا تۇسەتىن كۇرە جولداعى قاۋىرت تىرلىكتى كورۋدىڭ ءساتى ءتۇستى.

التى لوت بويىنشا جاريا­لان­عان كونكۋرستىڭ تورتەۋىندە جەڭىم­پاز انىقتالىپ, جۇمىستى باس­تاپ كەتكەن. شەتەلدىك كومپانيا­لار ءبىزدىڭ ەلدە جۇمىس ىستەۋگە رۇق­سات بەرەتىن رەسىمدەردەن ءوتىپ, جول­دىڭ نەگىزگى قاباتى مەن اينالما جول سالىپ جاتىر. ال ولاردان بۇ­رىن قيمىلداعان جەرگىلىكتى «قىران» جاۋاپكەرشىلىگى شەكتەۋلى سەرىك­تەس­تىگى اسفالت توسەۋدى قولعا الىپتى.

كۇرە جولدىڭ بويىندا قال­قايىپ تۇرعان كۇن باتارەيا­لارى كوزگە ءجيى تۇسە بەردى. بۇ­رىن قى­زىلوردادان ءسال ۇزا­عان­نان جەز­قازعانعا جەتكەنشە بايلانىستىڭ جوقتىعىنان قۇلاققا ۇرعان تاناداي بولاتىن ەدىك. مەردىگەر كومپانيالار بۇل ماسەلەنى ۋا­قىتشا وسىلاي شەشىپ وتىر ەكەن. ما­مانداردىڭ ايتۋىن­شا, جول قۇ­رىلىسى بىتكەن سوڭ بۇل ماڭ­دا دا جولاۋشىعا قىزمەت كور­سەتەتىن سەرۆيستىك كەشەندەر بوي كوتەرمەك.

«بىلتىر مەملەكەت باسشى­سىنىڭ تاپسىرماسىمەن باس­تالعان جول قۇرىلىسى اياسىندا 2022-2025 جىلدار ارا­لى­عىندا «قىزىلوردا-جەز­قاز­عان» باعىتىنداعى اۆتو­جول­دىڭ وبلىسقا قاراستى 204 شا­قىرىمى قايتا جاڭعىرتۋدان وتەدى. قازىر وسى ماڭىزدى نىسان وبلىس باسشىلىعىنىڭ تى­كەلەي نازارىندا تۇر. سىر مەن ارقانى بايلانىستىراتىن كۇرە جول قۇ­رىلىسى ايماقتىڭ الەۋمەتتىك-ەكونوميكالىق دامۋىنا وڭ اسەر بەرەتىنى ءسوزسىز», دەيدى وبلىستىق جولاۋشىلار كولىگى جانە اۆتوموبيل جولدارى باسقارماسى باس­شىسىنىڭ ورىنباسارى جا­نىبەك سىزدىقوۆ.

 بوز جۋساندى يەن دالادا ءوندىرىس ورىندارى قونىس تەبە باس­تاپتى. قالادان 100 شاقىرىم اسقاندا 160 توننالىق اسفالت زاۋىتى, تاعى ءبىر 70 شاقىرىمنان كەيىن وسىنداي 240 توننالىق قون­دىرعى تۇر. مامانداردىڭ اي­تۋىنشا الدا تاعى ءبىر زاۋىت تۇرعىزىلادى.

«قۇرىلىستى تەحنيكالىق قاداعالاۋ «DONWA Engineering Co. LTD» مەن «M50 Consalting Group» كومپانيالارىنا جۇك­تەل­گەن. «قازاۆتوجول» ۇك» اق جالپى ۇيلەستىرۋ, مونيتورينگ جۇمىستارىنا جاۋاپتى», دەيدى «قازاۆتوجول» ۇك» اق قى­زىلوردا فيليالى ديرەكتورىنىڭ ورىنباسارى ەرسايىن مۇزافار. – جول­دىڭ ەنى – 9 مەتر, ءۇش قاباتتىق قالىڭدىعى 27 سانتيمەتر بولادى. جوندەۋ جۇمىستارى بارىسىندا قولدانىلىپ جاتقان قۇرىلىس ماتە­ريالدارى جاڭاقورعان اۋدا­نىنداعى شالقيادان تاسىمالدانىپ جاتىر.

 جولدىڭ جاڭعىرۋى ايماق دامۋىنا ەرەكشە ءبىر سەرپىلىس بە­رەتىنى انىق. اۆتوماگيسترال ەلدىڭ وڭتۇستىگى مەن ورتالىعىن تىكەلەي بايلانىستىرىپ, سىر وڭىرىنە ينۆەستيتسيا تارتۋ اياسىن كەڭەيتەدى, تۋريستىك الەۋەتىن ارت­تىرا تۇسەدى. جۇك تاسىمالى كولەمىنىڭ ارتۋى وڭىردە كاسىپ­كەر­لىكتىڭ ورىستەۋىنە ۇلكەن سەپ بولماق.

قىزىلوردا