ەسىرتكىمەن كۇرەس مەملەكەت ۇستانعان باعىتتىڭ ءبىر تارماعىنا تەلىنسە دە, ەستى ادامدى ەسىنەن ايىراتىن, ەسىرتىپ-ەلىرتەتىن وسىمدىككە دەگەن جاستىڭ دا, جاسامىستىڭ دا قۇمارلىعى ايرىقشا بولىپ تۇرعانى بەلگىلى. ساۋ ادامدى ساندىراقتاتاتىن ەسىرتكى الدەكىمدەر ءۇشىن ىلكى ساتتىك ءلاززاتتىڭ كوزى بولسا, ەندى بىرەۋلەر ءۇشىن كولەڭكەلى بيزنەسكە اينالىپ كەتكەنى راس.
اقيقاتىندا ەسىرتكى تۋرالى ءسوز قوزعالا قالسا, تالاي تەكتىنىڭ تابانىنىڭ تابى قالعان شۋ ءوڭىرى جاماناتتى بولىپ شىعا كەلەدى. ءتىپتى, ازىلگە اڭسارى اۋعان جايدارمانشىلار دا, باسقالار دا شۋ ءوڭىرىن مازاققا اينالدىرۋدان تانعان ەمەس. ونى قويشى, شۋلىق ازاماتپەن تانىسا كەتكەن كولدەنەڭ كوك اتتى دا ەش ويلانباستان ء«شوپتىڭ وتانىنان ەكەنسىڭ عوي. وزىڭمەن بىرگە الىپ ءجۇرسىڭ بە؟» دەپ رەتسىز جەردە ءساتسىز قاعىتپاسىن ايتىپ قالۋعا تىرىسادى. ءدال وسى تاقىرىپتاعى اقپاراتتاردىڭ دەنى شۋ اۋدانىمەن بايلانىستى بولىپ جاتادى. دايىن اقپاراتتاردىڭ باسىم بولىگىندە اتالعان اۋداننىڭ اتاۋى ءورىپ جۇرەدى. «ەسىرتكى قىلمىسىنا قارسى ءىس قيمىل باسقارماسىنىڭ قىزمەتكەرلەرى اسا ءىرى مولشەردە ەسىرتكى ساقتادى دەگەن كۇدىكپەن شۋ اۋدانىنىڭ 60 جاستاعى تۇرعىنىن ۇستادى» دەپ باستالاتىن وبلىستىق پوليتسيا دەپارتامەنتى جولداعان اقپاراتتاردان كوز سۇرىنەدى. جالپى, ەسىرتكىگە ەسى كەتكەندەر بارلىق اۋداندا دا بار عوي.
ال جامبىل وبلىستىق پوليتسيا دەپارتامەنتىنىڭ باستىعى, پوليتسيا گەنەرال-مايورى ارمانبەك ءبايمۋرزيننىڭ ايتۋىنشا, وڭىردە ەسىرتكى قىلمىسىنا قارسى كۇرەس سوڭعى جىلدارى قارقىندى تۇردە جۇرگىزىلىپ كەلەدى. اتقارىلعان ناقتى جۇمىستىڭ ناتيجەسىندە اسا اۋىر ەسىرتكى قىلمىسىنا قاتىسى بار توپ قۇرىقتالعان.
«جامبىل وبلىسىنىڭ پوليتسيا دەپارتامەنتى تاراپىنان تۇراقتى نەگىزدە جەدەل-پروفيلاكتيكالىق ءىس-شارالار جۇرگىزىلىپ جاتىر. ىشكى ىستەر مينيسترلىگى باسشىلىعى قويعان مىندەتتەردى ورىنداۋ ماقساتىندا ەسىرتكى قىلمىسىن انىقتاۋ جانە جولىن كەسۋ ستراتەگياسى ۇدايى جەتىلدىرىلىپ كەلەدى. ناقتىراق ايتار بولساق, 2023-2025 جىلدارعا ارنالعان ەسىرتكى بيزنەسىنە قارسى كۇرەستىڭ ۆەدومستۆوارالىق اۋقىمدى كەشەندى جوسپارى ازىرلەنىپ, بەكىتىلدى. قابىلدانعان شارالاردىڭ ناتيجەسىندە جىل باسىنان بەرى 120 كيلودان استام ەسىرتكى زاتتارى تاركىلەندى. ەسىرتكى قىلمىسىنىڭ 42 دەرەگى انىقتالدى», دەيدى دەپارتامەنت باسشىسى اتقارىلعان جۇمىستارعا كوز جۇگىرتىپ.
ا.ءبايمۋرزيننىڭ سوزىنە سەنسەك, ءوڭىر جاستارىنا سينتەتيكالىق ەسىرتكى ورامدارىن ساتۋمەن اينالىساتىن جات پيعىلدى ادامدار از ەمەس سەكىلدى. ولاردىڭ ءبىرشاماسى قىراعى پوليتسەيلەردىڭ نازارىنا ىلىگىپ, دەر كەزىندە قۇرىقتالعان.
«جامبىل وبلىسى بويىنشا شۋ القابى جابايى قاراسورانىڭ ەڭ كوپ وسەتىن ۇلكەن اۋماعى ەكەنى بارشاعا ءمالىم. ەلدى ەسىنەن ايىراتىن ەسىرتكى قاۋىپتەرىنىڭ باسىم بولىگى دە اتالمىش اۋماقپەن بايلانىسىپ جاتىر. سول سەبەپتى دەر كەزىندە ەسىرتكى جەتكىزۋ ارنالارىن انىقتاپ, جويۋ, ولاردى ءبىزدىڭ وبلىستان دايىنداپ اكەتۋگە قارسى ءىس-قيمىلدى كۇشەيتۋ ءاردايىم نازاردان تىس قالماق ەمەس. تاياۋدا تاجىكستان رەسپۋبليكاسىنان ەسىرتكى ترانزيتىمەن كەلەتىن گەرويندى وبلىس اۋماعىنا جەتكىزۋ ارناسى انىقتالىپ, جويىلدى. ارنايى وپەراتسيا بارىسىندا وبلىس اۋماعىندا ەسىرتكىنىڭ اسا اۋىر ءتۇرىن وتكىزۋمەن اينالىسىپ كەلگەن ۇيىمداسقان قىلمىستىق توپ قولعا ءتۇستى. اتالعان توپتىڭ بارلىق مۇشەلەرى قۇرىقتالىپ, ونىڭ ىشىندە 25 اسا اۋىر ەسىرتكى قىلمىسىن ۇيىمداستىرعان 5 ادام ۇستالدى. جاستاردىڭ ساناسىن ەسىرتكىمەن ۋلاۋعا ۇمتىلعانداردىڭ اپتىعىن باسۋ نازارىمىزدان تىس قالماق ەمەس. سوڭعى كەزدەرى جاستار اراسىندا بەلەڭ العان سينتەتيكالىق ەسىرتكى قۇرالىن وتكىزۋمەن اينالىسقان تاراز قالاسىنىڭ ءۇش بىردەي تۇرعىنى قۇرىقتالدى. سينتەتيكالىق ەسىرتكىنىڭ جالپى سالماعى 32 گرامم ەكەنى تەكسەرۋ بارىسىندا انىقتالدى. سونىمەن قاتار ساتۋ ءۇشىن دايىنداپ قويعان 85 دانا سينتەتيكالىق ەسىرتكى ورامى تابىلىپ, تاركىلەندى», دەيدى دەپارتامەنت باسشىسى وڭىردەگى ەسىرتكى قىلمىسىنا قاتىستى دەرەكتەرمەن ءبولىسىپ.
ەسىرتكى ساتۋمەن اينالىساتىن توپتار جارناما قۇرالى رەتىندە الەۋمەتتىك جەلىنى ءجيى پايدالاناتىنى ءمالىم. كەز كەلگەن الەۋمەتتىك جەلىدە جاستار مەن جاسوسپىرىمدەر بەلسەندى ەكەنىن ەسكەرسەك, مۇنداي جارناما اتاۋلىنىڭ ەل بولاشاعىنا ايتارلىقتاي قاۋىپ توندىرەتىنىن ايقىن سەزىنەمىز. ال وڭىردە اشىق جارناماعا كوشكەن قىلمىستىق توپتارعا قارسى قانداي ناقتى شارالار قولعا الىنعان؟
«ەسىرتكىمەن بايلانىستى قىلمىس اتاۋلىنىڭ جولىن كەسۋمەن قاتار, ونىڭ الدىن الۋ ماسەلەسى قاي كەزدە دە نازارىمىزدان تىس قالعان ەمەس. وسى ورايدا تاراز قالاسى اكىمدىگىنىڭ تۇرعىن ءۇي-كوممۋنالدىق شارۋاشىلىعى مەكەمەسىمەن بىرلەسىپ 100-دەن استام «گراففيتي» جازباسىن وشىرتتىك. ەسىرتكى بيزنەسىنە توسقاۋىل قويۋ ءۇشىن الەۋمەتتىك جەلىلەرگە دە تالداۋ جۇرگىزىلىپ تۇرادى. ناقتىراق ايتار بولساق, ينتەرنەتتەگى الەۋمەتتىك جەلى بىتكەندى شولۋ ناتيجەسىندە ەسىرتكىنى ناسيحاتتاۋمەن اينالىساتىن 28 اككاۋنت انىقتالىپ, دەر كەزىندە بۇعاتتالدى. بۇل جۇمىستار الداعى ۋاقىتتا دا جالعاسادى. قالاي الىپ قاراساق تا – ەسىرتكى بيزنەسىنە ەسى كەتكەندەر ءبىرىنشى كەزەكتە جاستاردىڭ ساناسىن ۋلاۋعا تىرىساتىنى بەلگىلى. سوندىقتان دا پوليتسيا قىزمەتكەرلەرى جاستارمەن جۇمىستى ءبىر ساتكە دە توقتاتپاق ەمەس. بۇگىنگى تاڭدا پوليتسيا قىزمەتكەرلەرى مەن وڭىردەگى ءبىلىم بەرۋ ۇيىمدارى اراسىندا تىعىز بايلانىس ورناتىلعان. ستۋدەنتتەر اراسىندا سپورتتىق ءىس-شارالار, سەمينارلار, دوڭگەلەك ۇستەل وتىرىستارى, كەزدەسۋلەر تۇراقتى تۇردە وتكىزىلەدى. ماسەلەن, سوڭعى ەكى ايدىڭ بەدەرىندە 70-كە جۋىق پروفيلاكتيكالىق ءىس-شارا ۇيىمداستىرىلدى. ەسىرتكىدەن تونەتىن قاۋىپتىڭ الدىن العاننان ەشكىم ۇتىلمايدى. سول ءۇشىن دە مۇنداي ءىس-شارالاردىڭ جۇمىستى جۇيەلەۋدە ماڭىزى زور ەكەنى انىق», دەيدى ا.بايمۋرزين.
جامبىل وبلىسى