وسىدان 2 جىل بۇرىن عانا سىر بويىندا ەكىنشى دۇنيەجۇزىلىك سوعىس سوقپاعىن باسقان 11 ارداگەر بار ەدى. كەۋدەسىندەگى وردەن-مەدالدارى جارقىراپ, قاتار باسىپ بارا جاتاتىن سول قاھارمانداردىڭ قاتارى بۇگىندە سيرەپ قالدى. كەشەگى مەرەكەدە وبلىس ورتالىعىندا, قازالى, سىرداريا جانە شيەلى اۋداندارىندا تۇراتىن 6 مايدانگەرگە 1 ملن 500 مىڭ تەڭگەدەن بىرجولعى الەۋمەتتىك كومەك بەرىلدى. وسى التى مايدانگەردىڭ اراسىندا ەكى قارت بيىل ءجۇز جاستىڭ ءجۇزىن كورىپ وتىر.
وسىعان وراي وبلىس اكىمى نۇرلىبەك نالىباەۆ شيەلى اۋدانىندا تۇراتىن ارداگەر سارسەنبەك بايجانوۆتىڭ شاڭىراعىنا بارىپ, اقساقالدى عاسىرلىق مەرەيتويىمەن قۇتتىقتاپ, سىر جۇرتشىلىعى اتىنان اۆتوكولىك كىلتىن تابىستادى. عاسىر جاساعان مايدانگەر سارسەنبەك بايجان ۇلى وزىنە كورسەتىلگەن سىي-قۇرمەتكە العىسىن ايتىپ, باتاسىن بەردى.
شيەلى اۋدانىندا 1923 جىلى دۇنيەگە كەلگەن سارسەنبەك بايجانوۆ – 1942 جىلى ستالينگراد شايقاسىنا قاتىسقان جاۋىنگەر. ەلگە ورالعاننان كەيىن تۇركىستان پەداگوگيكالىق ۋچيليششەسىندە وقىپ, 38 جاسىندا مۇعالىم ماماندىعىن الىپ شىعادى. زەينەتكەرلىككە شىققانعا دەيىن شيەلى اۋدانىنداعى №156 قازاق ورتا مەكتەبىندە جارتى عاسىر عۇمىرىن جاس ۇرپاقتىڭ ءبىلىمى مەن تاربيەسىنە ارنادى.
ال قازالى اۋدانىنان مايدانعا اتتانعان قاباق سماعۇل 1942 جىلى 19 جاسىندا تۋلا قالاسىن ازات ەتۋگە قاتىسقان. شايقاستا كورسەتكەن ەرلىگى ءۇشىن «قىزىل جۇلدىز», ءىى دارەجەلى «وتان سوعىسى» وردەندەرىمەن ماراپاتتالعان ول ەلگە ورالعاننان كەيىن ەسەپ سالاسىندا 40 جىل ەڭبەك ەتتى. قارت ساربازدىڭ 100 جاسقا تولۋىنا بايلانىستى ۇيىمداستىرىلعان ءىس-شارادا مايدانگەر اۋىلداستارىن باستاپ, قاندى قىرعىننان ورالماعان قارۋلاستارىنىڭ رۋحىنا تاعزىم ەتتى. «عاسىر جاساعان مايدانگەر» اتتى جيىندا جاۋىنگەرلەر ەسكەرتكىشىنە گۇل شوقتارىن قويعان مايدانگەر ەلدەن سوعىسقا اتتانعان 300-دەي ازاماتتىڭ جارتىسى ۇرىس دالاسىن ماڭگى مەكەن ەتىپ قالىپ قويعانىن ايتتى.
اۋدان اكىمى مۇحتار ورازباەۆ مايدانگەرگە «قازالى اۋدانىنىڭ قۇرمەتتى ازاماتى» اتاعىن تابىستاپ, يىعىنا شاپان جاپتى. ءىس-شارادا «تامىرى تەرەڭ بايتەرەك» اتتى كىتاپتىڭ تۇساۋى كەسىلىپ, جينالعان قاۋىم اقىندار ايتىسىن تاماشالادى. مايدانگەرگە كورسەتىلگەن قۇرمەت اياسىندا بايگە ۇيىمداستىرىلىپ, بىلەكتى جىگىتتەر اۋدارىسپاققا شىقتى. ارداگەر باتاسىمەن باستالعان بايگە جۇلدەسى 3 600 000 مىڭ تەڭگە بولىپ, جامبىل, تۇركىستان وبلىستارى, جاڭاقورعان, شيەلى, جالاعاش جانە ارال اۋداندارىنان 50-دەن اسا جۇيرىك قوسىلدى.
قىزىلوردا وبلىسى