استانادا ەكىنشى دۇنيەجۇزىلىك سوعىس جىلدارىندا قايتىس بولعان جاۋىنگەرلەردىڭ قابىرىنە «داڭق گيرلياندالارى» مەن گۇل سەبەتتەرىن قويۋ ءراسىمى ءوتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ءراسىم كەزىندە ۇرمەلى وركەستردىڭ ورىنداۋىندا سالتاناتتى مارش ورىندالدى. ەسكەرتكىشكە گۇل قويۋ ءراسىمى ءبىر مينۋت ۇنسىزدىكپەن باستالدى.
«9 مامىردىڭ ءتول تاريحىمىزداعى ورنى ەرەكشە. بۇل – جانقيارلىقپەن ەل قورعاعان اتالارىمىز بەن اكەلەرىمىزدىڭ, اجەلەرىمىز بەن انالارىمىزدىڭ رۋحىنا تاعزىم ەتەتىن كۇن. وسىدان 78 جىل بۇرىن قاندى مايدان اياقتالىپ, جەڭىس تۋرالى جاڭالىق كەلگەن كۇن. ەلدىڭ ازاتتىعى مەن ۇرپاقتىڭ جارقىن بولاشاعى ءۇشىن جانىن پيدا ەتكەن بوزداقتارىمىزدى ماڭگى ەسىمىزدە ساقتاۋ – قاسيەتتى بورىشىمىز», دەدى سارىارقا اۋدانى اكىمىنىڭ ورىنباسارى مەدەت جالپىباەۆ.
ءىس-شارادا تىل ەڭبەككەرلەرى مەن اۋعانستان سوعىسىنىڭ ارداگەرلەرى گۇل شوقتارىن قويىپ, قازا بولعانداردى ەسكە الدى.
ء«بىز سول قايسار, باتىر ۇرپاقتىڭ جالعاسى رەتىندە سوعىستا قازا تاپقان ءاربىر مايدانگەردىڭ رۋحى الدىندا تاعزىم ەتەمىز», دەدى اۋعانستان سوعىسىنىڭ ارداگەرى عالىم قوجابەكوۆ.
«شەيح كۋنتا قاجى» مەشىتىنىڭ يمامى دانيار بايدۋللاەۆ قۇران وقىپ, ورىس پراۆوسلاۆ شىركەۋىنىڭ ءدىني قىزمەتكەرى ارحيماندريت يواساف العىس سوزدەرىن, قۇتتىقتاۋلارىن ايتىپ, دەنساۋلىق, بەيبىتشىلىك پەن جاقسىلىق تىلەدى.