تەننيستەن ايەلدەر اراسىنداعى ەلىمىزدىڭ ءبىرىنشى راكەتكاسى, 2022 جىلعى ۋيمبلدون جارىسىنىڭ جەڭىمپازى ەلەنا رىباكينا الەمدىك رەيتينگتەگى ءوز رەكوردىن جاراتىپ, رەسمي تۇردە جاھاننىڭ التىنشى راكەتكاسى اتاندى.
يسپانيانىڭ باس شاھارى – مادريدتە مارەسىنە جەتكەن «ماستەرس» تۋرنيرىنەن كەيىن حالىقارالىق ايەلدەر تەننيسى قاۋىمداستىعى (WTA) تەننيسشىلەردىڭ جاڭارتىلعان رەيتينگىن جاريا ەتتى. جاڭا رەيتينگكە سايكەس مادريد دوداسىندا ەكىنشى اينالىمعا دەيىن جەتكەن ەلەنا رىباكينا جەتىنشى ورىننان التىنشى ساتىعا كوتەرىلىپ, قازاقستان تەننيسى تاريحىنداعى جاڭا رەكوردتى ورناتتى. ياعني بۇگىنگە دەيىن ەل تەننيسشىلەرىنىڭ بىردە-ءبىرى جەكەلەي سىندا مۇنداي ناتيجەگە قول جەتكىزىپ كورگەن ەمەس.
ال ۇلتتىق قۇرامانىڭ وزگە وكىلدەرىنە كەلەر بولساق, يۋليا پۋتينتسەۆا رەيتينگتەگى ورنىن ساقتاپ قالدى. قازىرگى تاڭدا ول الەمدىك رەيتينگتە 51-ورىنعا جايعاسقان. ەلەنا رىباكينا بۇگىن يتاليانىڭ ريم قالاسىندا جالاۋى جەلبىرەيتىن «ماستەرس» تۋرنيرىنە قاتىسادى. وتانداسىمىز جارىستى ەكىنشى اينالىمنان باستايدى.