بەينەلەۋ ونەرى – ۇلتتىق مادەنيەتتىڭ وركەندەۋ ۇدەرىسىندە وزىندىك ورنى بار, حالىقتىڭ رۋحىن كوتەرەتىن شىعارماشىلىق سالانىڭ ءبىرى. ونىڭ كەسكىندەمە, كەراميكا, ءمۇسىن, قولونەر, توقىما, ساۋلەت, زەرگەرلىك جانە ت.ب. ءوزارا جانرلارى بىرىگە وتىرىپ, سينتەزدىك ونەردى قۇرايتىندىعى بەلگىلى. مىنە, وسى سالادا قايىرتاي امىرعازين كوپتەن بەرى تەر توگىپ كەلەدى. ونى كوپشىلىك ءبىلىم بەرۋ ءىسىن دامىتۋعا, بىلىكتى ماماندار دايارلاۋعا ۇلكەن ۇلەس قوسىپ جۇرگەن ۇلاعاتتى ۇستاز, زيالى ازامات رەتىندە تانيدى. ۇلتتىق كەسكىندەمە ونەرىنىڭ مايتالمانى قايىرتاي جاقىپ ۇلى 1949 جىلعى مامىر ايىندا سەمەي وبلىسىنداعى اياگوز اۋدانىنىڭ اقشاتاۋ اۋىلىندا دۇنيەگە كەلدى. اياگوز قالاسىنداعى №244 جالپى ءبىلىم بەرەتىن ورتا مەكتەپتى اياقتاپ, سەمەي مەملەكەتتىك پەداگوگيكالىق ينستيتۋتىنا وقۋعا ءتۇستى. ستۋدەنتتىك ءومىرىنىڭ ءۇشىنشى جىلىندا ماسكەۋ مەملەكەتتىك پەداگوگيكالىق ينستيتۋتىنداعى كوركەمونەر فاكۋلتەتىنىڭ ءۇشىنشى كۋرسىنا اۋىستى. 1972 جىلى ازاماتتىق بورىشىن اتقارۋعا اسكەرگە شاقىرىلدى. قارۋلى كۇشتەر قاتارىنان بوساعان سوڭ ماسكەۋدەگى ينستيتۋتتى ءبىتىردى. ەڭبەك جولىن سەمەي مەملەكەتتىك پەداگوگيكالىق ينستيتۋتى جالپىتەحنيكالىق پاندەر مەن قولدانبالى ونەر كافەدراسىنىڭ مەڭگەرۋشىسى قىزمەتىن اتقارۋدان باستادى. ال قايىرتاي جاقىپ ۇلى 1980-1984 جىلدارى ءبىر كەزدە ءبىلىم العان ماسكەۋ مەملەكەتتىك پەداگوگيكالىق ينستيتۋتىنداعى قولدانبالى ساندىك ونەر كافەدراسى جانىنداعى اسپيرانتۋرادا وقىپ, كانديداتتىق ديسسەرتاتسياسىن قورعادى. بۇدان كەيىن سەمەيگە ورالىپ پەداگوگيكالىق ينسيتۋتتىڭ كوركەمسۋرەت فاكۋلتەتىنە جەتەكشىلىك ەتتى. ول شاكىرتتەرىنە تەرەڭ ءبىلىم, ءتالىمدى تاربيە بەرىپ سىي-قۇرمەتىنە بولەندى. ءوزى تاربيەلەگەن تالانتتى شاكىرتتەرىمەن شىن مانىسىندە ماقتانا الادى. بۇگىنگى تاڭدا ونىڭ شاكىرتتەرى ەلىمىزدىڭ ۇلتتىق ونەرىن دامىتۋ جولىندا ايانباي ەڭبەك ەتىپ ءجۇر. سونىمەن بىرگە, ينستيتۋت كاسىپوداق ۇيىمىنىڭ توراعاسى رەتىندە ۇجىم مۇشەلەرى مەن ستۋدەنتتەرىنە كوپ قامقورلىق كورسەتتى. قىزمەتى ءوسىپ 1993-1996 جىلدار ارالىعىندا قازاق ۇلتتىق مەملەكەتتىك كوركەم اكادەمياسىنىڭ وقۋ-تاربيە جۇمىستارى جونىندەگى پرورەكتورى قىزمەتىن اتقارىپ ءجۇرىپ, ماسكەۋدە دوكتورلىق ديسسەرتاتسياسىن ويداعىداي قورعاپ شىقتى. بەينەلەۋ ونەرىنە سۇبەلى ۇلەس قوسىپ, 15-تەن استام عىلىم كانديداتىن دايارلادى.
قايىرتاي امىرعازيننىڭ ەلى مەن تۋعان جەرىنە دەگەن ماحابباتىن ءار تۋىندىسىنان كورۋگە بولادى. ونىڭ وزىندىك ەرەكشەلىگى مەن تۋما تالانت يەسى ەكەندىگىن ع.ەسىم, ا.ەسپەنبەتوۆ, م.كورەشكوۆ, د.شوقپار ۇلى, س.ءبورباسوۆ ءتارىزدى تۇلعالار كەزىندە ەرەكشە باعالادى.
قازىرگى كەزدە ول رەسەيدىڭ ومبى قالاسىنداعى كوركەمتەحنيكالىق كوللەدجدى بىلگىرلىكپەن باسقارۋدا. ەلىمىزگە سىڭىرگەن ەرەن ەڭبەگى ەلەنىپ, قازاقستان رەسپۋبليكاسى عىلىم سالاسىنىڭ قۇرمەتتى قىزمەتكەرى جانە رەسەي فەدەراتسياسىنىڭ باستاپقى كاسىبي ءبىلىم بەرۋ سالاسىنىڭ قۇرمەتتى قىزمەتكەرى توسبەلگىلەرىمەن ماراپاتتالدى.
قايىرتاي جاقىپ ۇلى بىرنەشە عىلىمي تۋىندىلاردى جارىققا شىعاردى. «تەورەتيچەسكيە وسنوۆى ي مەتوديكا وبۋچەنيا شكولنيكوۆ كازاحسكومۋ دەكوراتيۆنو-پريكلادنومۋ يسكۋسستۆۋ», «رازۆيتيە ي مودەرنيزاتسيا حۋدوجەستۆەننوگو وبرازوۆانيا ومسكوي وبلاستي» اتتى مونوگرافيالارى جوعارى باعاعا يە بولدى. ول – ومبى قالاسىندا قازاقتىڭ قولدانبالى ساندىك ونەرىن بارىنشا ايگىلەپ جۇرگەن پەداگوگ-عالىم.
مەنىڭ سۋرەت ونەرىنە دەگەن قۇمارلىعىمدى بايقاعان ول ءتۇرلى كىتاپتار مەن كورنەكتى سۋرەتشىلەردىڭ تۋىندىلارىنان تۇراتىن توپتامالاردى اكەلىپ بەرۋشى ەدى. ۇستازىمنان ومىرلىك تاعىلىم الىپ, كوپ ءنارسەنى ۇيرەندىم. بىردە ول مەنى ءوزىنىڭ عىلىمي جەتەكشىسى, قولدانبالى ءساندى ونەر جانە ديزاين سالاسىنىڭ بىلگىرى, پەداگوگيكا عىلىمدارىنىڭ دوكتورى, پروفەسسور بوريس نيشۋموۆپەن تانىستىردى. كانديداتتىق ديسسەرتاتسيامدى دايارلاۋ بارىسىندا بوريس ميحايلوۆيچتەن تەرەڭ ءبىلىم-ءتالىم الىپ, عىلىم كانديداتى اتاندىم.
قايىرتاي جاقىپ ۇلى ادال جار, ابزال اكە, مەيىرىمدى اتا. جان جارى باقىتگۇل اپكەمىزبەن تاتۋ-ءتاتتى وتباسىندا ارمان, ەرلان اتتى ۇلدارىن ءوسىرىپ, شاڭىراعىن ماۋەلى باققا اينالدىرىپ وتىر. ۇلدارىن عىلىم سالاسىنا باۋلىسا, نەمەرەسى اسقار اتاسىنىڭ جولىن جالعاستىرۋدا.
«ۇستاز ەڭبەگىن ديقان تىرلىگىمەن سالىستىرۋعا بولادى», دەيدى حالقىمىز. ويتكەنى, ديقان كوكتەمدە جەر توسىنە سەپكەن ءدانىن الا جازداي باپتاپ, كۇزدە جەمىسىن جينايدى. ۇستازىم دا سول سەكىلدى. لايىم, سولاي بولعاي. شىعارماشىلىعىڭىز ورلەي بەرسىن, تالىمگەر.
مادۋاقاس سەكسەنباي ۇلى,
سەمەي قالاسىنداعى شاكارىم اتىنداعى مەملەكەتتىك ۋنيۆەرسيتەتتىڭ دوتسەنتى,
قازاقستان سۋرەتشىلەر وداعىنىڭ مۇشەسى