ەۋروپا ليگاسىنىڭ ەكىنشى راۋندىنا ءوتتى
شىلدەنىڭ 10-ى كۇنى تۇندە قازاقستاننىڭ ءۇش كومانداسى ەۋروپا ليگاسى ىرىكتەۋ ءتۋرنيرى ءبىرىنشى راۋندىنىڭ ەكىنشى كەزدەسۋىن وتكىزدى. ولاردىڭ قورىتىندىسىندا ايتىلىپ وتىرعان قاراعاندىنىڭ «شاحتەرى», استانانىڭ «استاناسى» جانە الماتىنىڭ «قايراتى» كەلەسى كەزەڭگە ءوتتى.
قاراعاندىدا جەرگىلىكتى «شاحتەر» ارمەنيانىڭ گيۋمري قالاسىنىڭ «شيراك» كومانداسىن قابىلدادى. قارسىلاستاردىڭ بۇدان ءبىر اپتا بۇرىن ارميان جەرىندە وينالعان ءبىرىنشى كەزدەسۋىندە قازاقستاندىقتار 2:1 ەسەبىمەن ۇتىپ قايتقان ەدى. ال بۇل جولى ولار ارمەنيالىقتاردى 4:0 ەسەبىمەن ويسىراتا ۇتتى.
ەسەپ ماتچتىڭ 12-مينۋتىندا اشىلدى. الاڭ يەلەرىنىڭ كوماندا كاپيتانى اندرەي فينونچەنكو سول قاپتالدان ۇلان قونىسباەۆ بەرگەن دوپتى قاقپاعا قاراي ۇردى. ول قوناقتاردىڭ قاقپاشىسىنان كەرى قايتىپ, ءبىر قورعاۋشىسىنا ءتيىپ, قايتادان قاقپاعا قاراي ۇشتى دا, جىبەك تورعا بارىپ توپ ەتتى. ال 26-مينۋتتا ۇلاننىڭ ءوزى قاپتالدان بەرىلگەن دوپتى باسىمەن ۇرىپ, قاقپاعا ءتۇسىردى.
كەنشىلەر مۇنىمەن دە توقتالعان جوق. ولار ۇزىلىسكە دەيىن تاعى ءبىر گول سالىپ, ەسەپتى 3:0-گە جەتكىزدى. ونى كوماندانىڭ دەبيۋتانتى نيكولا پوكريۆاچ ءوز ەسەبىنە جازدى. ەكىنشى تايم باستالعاننان كەيىن قاراعاندىلىقتار ويىننىڭ اقىرعى نۇكتەسىن قويدى. ونى 49-مينۋتتا اندرەي فينونچەنكو قاقپاعا جونەلتتى.
ەندى ەكىنشى كۆاليفيكاتسيالىق راۋندتا «شاحتەر» ليۋكسەمبۋرگتىڭ «ديففەردانج» جانە كلايپەدانىڭ «اتلانتاس» (ليتۆا) كوماندالارىنىڭ جەڭگەنىمەن وينايدى.
وسىنىڭ سوڭىن الا «استانا-ارەنادا» جەرگىلىكتى «استانا» مەن ەرەۆاننىڭ «پيۋنيك» كوماندالارى اراسىنداعى ويىن اياقتالدى. ول 2:0 ەسەبىمەن الاڭ يەلەرىنىڭ پايداسىنا شەشىلدى. بۇل قارسىلاستاردىڭ 3 شىلدە كۇنى ارمەنيا استاناسىندا وتكەن ءبىرىنشى كەزدەسۋىندە قازاقستان فۋتبولشىلارى 4:1 ەتىپ ۇتىپ قايتقان ەدى. استانالىقتار ەسەپتى 13-مينۋتتا اشتى. ونى باۋىرجان جولشيەۆ سوقتى. ال ەكىنشى گول 80-مينۋتتا ءتۇستى. ول دميتري شومكونىڭ كۇشىمەن سالىندى.
بۇلاردىڭ ءبارىنىڭ سوڭىنان الماتىنىڭ «قايراتى» البانيانىڭ استاناسى – تيرانا قالاسىندا جەرگىلىكتى «كۋكەسي» كومانداسىمەن كەزدەستى. الاڭ يەلەرى ءبىرىنشى مينۋتتان الماتىداعى ويىننىڭ ەڭ سوڭعى مينۋتىندا ءجىبەرىپ العان گولدارىنىڭ ەسەسىن قايتارۋعا ۇمتىلدى. بۇل ۋاقىتتاردا «قايرات» تا الاڭسىز قورعانىستا قالعان جوق. ونىڭ سول تۇستاعى ەكى قارسى شابۋىلى گول اكەلە جازدادى. ايتالىق, باۋىرجان يسلامحاننىڭ سوققىسى قاقپا باعانىنان قايتسا, «اقتوبەمەن» ويىندا حەت-تريك جاساعان كوماندا دەبيۋتانتى جەرار گوۋدىڭ ۇرعان دوبىن گولكيپەر قاعىپ الدى. تۇتاستاي العاندا, ءبىرىنشى تايمداعى ويىن الما-كەزەك شابۋىلمەن ورنەكتەلدى. سونىڭ بارىسىندا قاقپاشى دميتري حوميچ بىرنەشە رەت الماتىلىقتار قاقپاسىن امان ساقتاپ قالدى.
ەكىنشى تايم تاعى دا «كۋكەسيدىڭ» شابۋىلىمەن باستالدى. ءوز كەزەگىندە «قايرات» ولاردى مۇقيات قايتارۋمەن بولدى. سوسىن يسلامحان تاعى دا وتكىر شابۋىلدىڭ وتىنەن كورىندى. ونىڭ بۇل جولعى سوققىسى باعاننىڭ جانىنان ءوتتى. بۇدان كەيىن كۇشەيىپ كەتكەن جاۋىن ەكى جاقتى ابايلاپ ويناۋعا ءماجبۇر ەتتى. كوماندالار سوندا دا بولسا, تارازى باسىن ءوزدەرىنە اۋدارۋعا تىرىسىپ باقتى. الايدا, ماتچتىڭ سوڭىنا دەيىن تابلوداعى 0:0 دەگەن ەسەپ وزگەرمەدى.
مۇنىڭ الدىندا «شاحتەر» مەن «استانا» كوماندالارى كەلەسى كەزەڭگە وتكەن بولاتىن. ارمەنيا جاساقتارىمەن كۇش سىناسقان ولاردىڭ ەكەۋى دە ەكى ويىننىڭ قورىتىندىسى بويىنشا 6:1 دەگەن ەسەپپەن جەڭىسكە جەتتى.
ءسويتىپ, ەۋروپا ليگاسىندا ويناپ جاتقان قازاقستاننىڭ ءۇش كومانداسى دا ىرىكتەۋ راۋندىنىڭ كەلەسى كەزەڭىنە ءوتتى.
دامير قوجامقۇل.