وڭتۇستىك كورەيانىڭ چوندجۋ قالاسىندا جالاۋى جەلبىرەگەن اۋىر اتلەتيكادان ازيا چەمپيوناتىنىڭ العاشقى كۇنىندە ەل قورجىنىنا العاشقى جۇلدە ءتۇستى.
55 كيلو سالماق دارەجەسىندە باق سىناعان ارلي چونتەي بيىلعى سارى قۇرلىق دوداسىندا ەكى ۆەتنام سپورتشىسىن العا جىبەرىپ, قولا جۇلدەگەر اتاندى. قازاقستان اۋىر اتلەتى جۇلقا كوتەرۋدە 117 كيلومەن العاشقى باعدارلامادا كوش باستاعانىمەن, سەرپە كوتەرۋ جاتتىعۋىندا 141 كيلو زىلتەمىردى باعىندىرىپ, ۇزدىك ۇشتىكتىڭ قاتارىنان كورىنە المادى. الايدا ول قوسسايىس قورىتىندىسى بويىنشا 258 كيلو سالماقپەن ازيا چەمپيوناتىنىڭ قولا جۇلدەگەرى اتاندى.
بۇل – ارلي چونتەيدىڭ ازيا چەمپيوناتىنداعى ءتورتىنشى جۇلدەسى. ول بىلتىر باحرەيننىڭ استاناسى مانامەدە وتكەن بىرىنشىلىكتە – كۇمىس, ونىڭ الدىندا تاشكەنتتە – التىن, ال 2019 جىلى قىتايدىڭ نينبو قالاسىنداعى جارىستا قولا جۇلدە جەڭىپ العان ەدى. وڭتۇستىك كورەياداعى ازيا چەمپيوناتى – كەلەسى جىلى پاريجدە وتەتىن وليمپيا ويىندارىنا جولداما بەرەتىن ماڭىزدى جارىستاردىڭ ءبىرى.