ەگىنشى – ءمارت, جەر – جومارت

ناۋقاننىڭ باستالۋىنا وراي جالاعاش اۋدانىنىڭ تاڭ اۋىلىندا وتكەن «دالا كۇنى» سەمينار-كەڭەسىندە وسى سالادا اتقارىلار جۇمىستار ايتىلىپ, الدا تۇرعان ماسەلەلەر تالقىلاندى. وسىعان وراي اۋدانعا كەلگەن وبلىس اكىمى نۇرلىبەك نالىباەۆ الدىمەن «تاڭ» جاۋاپكەرشىلىگى شەكتەۋلى سەرىكتەستىگىندەگى ەت ونىمدەرى تسەحىنىڭ جۇمىسىمەن تانىستى. اۋىل شارۋاشىلىعى تەحنيكالارى مەن ونىمدەرى قويىل­عان كورمەنى تاماشالادى. جابدىقتاۋشى مەكەمە وكىلدەرىمەن پىكىرلەستى.

ايماق باسشىسى ءىس-شاراعا جي­نالعان قوناق­تارمەن بىرگە ال­عاشقى ءدان سەبۋ ءراسىمىن وتكىزىپ, بىرقا­تار شارۋاشىلىق ۇزدىكتەرىن «ەڭبەك ارداگەرى» مەدالىمەن, «اۋىل شارۋاشىلىعى سالاسى­نىڭ ۇزدىگى» توسبەلگىسىمەن جانە قىزىلوردا وبلىسىنىڭ قۇرمەت گراموتاسىمەن, وبلىس اكىمىنىڭ العىس حاتىمەن ماراپاتتادى. ەگىس القابىندا وتكەن «دالا كۇنى» سەمينار-كەڭەسىنىڭ پلەنارلىق ماجىلىسىندە اگرارلىق سالانى وركەندەتۋدىڭ ءوڭىر ءۇشىن ومىرلىك ماڭىزى ايتىلدى.

«مەملەكەت باسشىسى ەلىمىز­دىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەي­تىلگەن كەڭەستە ازىق-ت ۇلىك قىم­باتشىلىعى مەن ينفلياتسيانى تۇراقتاندىرۋ ءۇشىن ۇكىمەتتىڭ الدىندا اگروونەركاسىپ كەشەنىنىڭ تۇراقتى ءوسىمىن قالىپتاستىرۋ مىندەتى تۇرعانىن اتاپ ءوتتى. وسى مىندەتتى ورىنداۋدىڭ بىردەن-ءبىر جولى – جەرگىلىكتى جەردە وندىرىلەتىن ءونىم كولەمىن ارتتىرۋ. بيىل وبلىستا 195,6 مىڭ گەكتارعا ەگىن ەگۋدى مەجەلەپ وتىرمىز. ونىڭ ىشىندە نەگىزگى داقىل – كۇرىش 83,9 مىڭ گەكتارعا سەبىلەدى. سونىمەن قاتار الەۋمەتتىك ماڭىزى بار كارتوپ, كوكونىس, باقشا ونىمدەرىن ەگۋ ءۇشىن 5 500 جەرگىلىكتى تۇرعىنعا قوسىمشا 3 300 گەكتار جەر دا­يىنداۋ جۇمىستارى جۇرگىزىلىپ جاتىر», دەدى وبلىس اكىمى.

بىلتىر ەگىس ماۋسىمى باس­تالار شاقتا شارۋالار سۋ­دان قيىندىق كورگەن ەدى. بيىل­عى قىستا سوڭعى 4-5 جىل­دىقتا سۋال­عان داريا ارناسى تولىپ, ارتىق سۋ ايماقتاعى كولدەر جۇيەسىنە جىبەرىلدى, شابىن­دىقتار سۋلان­دىرىلدى. كىشى ارالدىڭ اياسىن­داعى سۋ 18,5 ملرد تەكشە مەتر­دەن 20,140 ملرد تەكشە مەترگە كوبەيدى.

بۇگىندە شاردارا سۋ قويما­سىندا 5 ملرد تەكشە مەتر, كوكسا­راي سۋ رەتتەگىشىندە 1,79 ملرد تەكشە مەتر سۋ بار. وبلىسقا وسى جىلعى ۆەگەتاتسيالىق كەزەڭ­­گە 3,8 ملرد تەكشە مەتر سۋ پايدالانۋ ءليميتى بەلگىلەن­گەن. بۇل بىلتىرعى جىلمەن سالىستىرعاندا 200 ملن تەكشە مەترگە ارتىق. وسى بولىن­گەن سۋدى ۋاقتىلى الا الساق, ديقاندارىمىز جازدا تاپ­شى­­لىقتى سەزىنبەۋى كەرەك. جاقىن­دا دۋشانبە قالاسىندا وتەتىن مەملەكەتارالىق سۋ شارۋا­شىلىعىن ۇيلەستىرۋ كوميس­سياسىنىڭ كەزەكتى وتىرىسىندا سۋ پايدالانۋ ماۋسىمىنداعى سىرداريا وزەنىنىڭ سۋلىلىعى بولجامىنا سايكەس شاردارا سۋ قويماسىنا تۇسەتىن كولەم ناقتىلانادى. وسىدان كەيىن سۋ ليميتتەرى قايتا بەلگىلەنەدى.

سۋدىڭ تاپشىلىعى بىرتە-بىرتە ۇنەمگە دە ۇيرەتىپ كەلەدى. وسى كۇنى كوممۋنالدىق مەنشىككە الىنعان 226 سۋ شارۋاشىلىعى نىسانىن تازالاۋ, جوندەۋ جۇ­مىس­تارىن جۇرگىزۋ ءوزىنىڭ كەزەڭ-كەزەڭىمەن اتقارىلىپ جاتىر. بيىل وبلىستىق بيۋدجەت ەسە­بىنەن ەلدى مەكەندەردى اياق سۋمەن قامتاماسىز ەتۋ ءۇشىن 78 شاقىرىم بولاتىن 7 كانالدى تازالاۋ, ەلدى مەكەندەرگە 21 سۋ سورعى قوندىرعىسىن جەت­كىزىپ بەرۋ جانە 27 كانالعا جوبا-سمەتالىق قۇجات ازىرلەۋ جۇمىس­تارى جۇرگىزىلەدى.

سونىمەن بىرگە شارۋاشى­لىقارا­لىق كانال­داردىڭ 68,0 پا­يىزى, ىشكى شارۋاشىلىق­ارالىق كانالداردىڭ 79,0 پايىزى تازالاندى. شارۋا­شىلىقارالىق كانالدار مەن سورعى قوندىرعىلارى, گيدروبەكەتتەرگە جوندەۋ جۇمىس­تارى جۇرگىزىلدى.

«جاسىل قازاقستان» ۇلتتىق جوباسى شەڭبە­رىن­دە 2025 جىلعا قاراي 16 ماگيسترالدى جانە شارۋاشىلىق كانالىن تسيفرلاندىرۋ جوسپار­لانعان. «قازسۋشار» رمك قىزىلوردا فيليالى ونىڭ بەسەۋىنە جوبا-سمەتالىق قۇجات­تاما ازىرلەپ, مەملەكەتتىك ساراپتاما قورىتىندىسى الىندى.

سۋدى ءتيىمدى پايدالانۋ ماق­ساتىندا وبلىس اكىمدىگى مەن اۋستراليانىڭ «Rubicon Global» كومپانياسى اراسىندا ايماقتىڭ سۋلاندىرۋ جۇيەلەرىن اۆتوماتتاندىرۋ, تسيفرلاندىرۋ جوباسىن ىسكە اسىرۋ تۋرالى مەموراندۋمعا قول قويىلعان. مەموراندۋم وبلىستاعى ەگىس كولەمىنىڭ 60 پايىزى ورنالاسقان رەسپۋبليكالىق مەنشىكتەگى قىزىلوردا سولجاعا ماگيسترالدى كانالى بويىنداعى اۋماقتاردى سۋلاندىرۋ جۇيەسىن جاڭعىرتۋدى كوزدەيدى. قازىر «Rubicon Global» كومپانياسى شىركەيلى كانالىنا زەرتتەۋ جۇمىستارىن جۇرگىزىپ, جوبا ۇسىنىپ وتىر.

سەمينار-كەڭەستە سالاعا قا­تىستى مەكەمە باسشىلارى مەن شارۋا قوجالىقتارىنىڭ يەلەرى قولعا الىنعان جۇمىستاردى, وزەكتى ماسەلەلەردى ورتاعا سالدى. جيىن قورىتىندىسىندا ايماق باسشىسى اۋىل شارۋاشىلىعى ەكسپورتىنىڭ ۇلەسىن ارتتىرۋ, شارۋاشىلىقتاردى قاجەتتى جا­نار-جاعارمايمەن قامتۋ جانە ەگىلگەن ءونىمدى مۇقيات باپتاپ, ۋاقتىلى جيناپ الۋ بويىنشا تاپسىرمالار بەردى.

قىزىلوردا